كينوجوبالاردى قارجىلاندىرۋ: ناۋرىز ايىندا وتكىزىلگەن كونكۋرس ناتيجەسى جويىلدى

استانا. قازاقپارات - كينوجوبالاردى مەملەكەتتەن قارجىلاندىرۋ ءۇشىن بيىلعى ناۋرىز ايىندا وتكىزىلگەن كونكۋرس ناتيجەسى جويىلدى.

قازاقپارات بۇل تۋرالى ۇلتتىق كينونى قولداۋ مەملەكەتتىك ورتالىعىنىڭ باسپا ءسوز- قىزمەتىنە سىلتەمە جاساپ حابارلايدى.

بيىل ناۋرىز ايىندا وتكىزىلگەن وتىنىمدەردى ىرىكتەۋ كونكۋرسىنىڭ ناتيجەلەرى جارامسىز دەپ تانىلىپ، كۇشى جويىلدى. مۇنداي شەشىم قابىلداۋعا اۋديتورلىق تەكسەرىس ناتيجەسى نەگىز بولدى، - دەلىنگەن ۇسىنىلعان اقپاراتتا.

ءمالىم ەتىلگەندەي، كينوجوبالاردى مەملەكەتتەن قارجىلاندىرۋ ءۇشىن وتىنىمدەر بۇگىننەن باستاپ قايتا قابىلدانادى.

قۇجاتتار قابىلداناتىن سوڭعى مەرزىم – 29-تامىز.

وتىنىمدەردى قارايتىن ساراپتامالىق كەڭەستىڭ وتىرىسى قىركۇيەك ايىنىڭ سوڭىندا وتەدى. پيتچينگتەن وتكەن كينوجوبالار قارجىلاي قولداۋعا يە بولىپ، «ۇلتتىق فيلمدەر» دەپ تانىلادى.

ۇلتتىق كينونى قولداۋ مەملەكەتتىك ورتالىعى بيىل جاڭا فيلمدەردىڭ وندىرىسىنە 3,3 ميلليارد تەڭگە ءبولۋدى جوسپارلاپ وتىر: «قازاقفيلم» كينوستۋدياسى تۇسىرەتىن كينوجوبالارعا كەم دەگەندە 1,2 ميلليارد تەڭگە، ال جەكە كينوجوبالارعا شامامەن 2,1 ميلليارد تەڭگە بولىنەدى. ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي تاراپتار ءاربىر تەڭگە ءۇشىن ەسەپ بەرەتىنىن ەسكەرتتى.

ەڭ الدىمەن، بارلىق راسىمدەردىڭ اشىقتىعىن قامتاماسىز ەتىپ، سىبايلاس جەمقورلىق تاۋەكەلدەرىن بولدىرماۋ قاجەت. كينو قاۋىمداستىعى نارىقتى دامىتۋ مەن ساپانى ارتتىرۋ ءۇشىن بىرىگىپ جۇمىس ىستەۋى كەرەك. ءبىز ءوز تاراپىمىزدان ۇمىتكەرلەرگە بارىنشا كومەكتەسۋگە ءارى كينوجوبالارعا اقپاراتتىق قولداۋ كورسەتۋگە دايىنبىز. ورتالىق تا، كينوگەرلەر دە ءار تەڭگە ءۇشىن ەسەپ بەرەتىنىن ەستە ۇستاعانى ءجون. ەشقانداي ينتريگا قاجەت ەمەس، - دەدى قۇرمانبەك جۇماعالي.