قوس ازاماتتىق فاكتىلەرىنە قارسى زاڭناما كۇشەيتىلىپ جاتىر - مينيستر
بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«ىشكى ىستەر مينيسترلىگى - كوشى-قون ساياساتى تۇجىرىمداماسىندا ءبىرقاتار ءىس-شارا بويىنشا نەگىزگى ورىنداۋشى. بىرىنشىدەن، ەلىمىزدە تۇراقتى تۇرۋ رۇقساتىن بەرۋگە توقتالساق، مۇنداي رۇقسات ەلىمىزگە، ەكونوميكامىزعا پايدالى ماماندارعا وڭاي تارتىپپەن بەرىلەدى. مىسالى، IT- ماماندارىنا، عىلىم، دەنساۋلىق جانە ءوندىرىس سالاسىنىڭ كاسىبي شەبەرلەرى ەسكەرىلگەن. ەكىنشىسى ماسەلە - ول ۆيزا الۋدى جەڭىلدەتۋ. بۇل تۇزەتۋ ەلىمىزدىڭ ەكونوميكاسىنا 300 مىڭ ا ق ش دوللارىنان ارتىق ينۆەستيتسيا سالعان شەتەلدىكتەرگە قاتىستى بولادى»، - دەدى م. احمەتجانوۆ.
سونىمەن قاتار ول تۇجىرىمداما اياسىندا ازاماتتىق تۋرالى زاڭنامانى جەتىلدىرۋ باعىتىنا توقتالدى.
«قازاقستان ازاماتتىعىن الۋ شارتىنىڭ ءبىرى - مەملەكەتتىك ءتىلدى، تاريحتى جانە كونستيتۋتسيانى قاراپايىم دەڭگەيدە ءبىلۋ. ول ءبىزدىڭ مادەنيەت پەن ءداستۇردى تانۋعا، ياعني قوعامعا قينالماي بەيىمدەلۋگە مۇمكىندىك بەرەدى»، - دەدى مينيستر.
«بۇدان باسقا، قوس ازاماتتىق فاكتىلەرىنە قارسى زاڭنامانى كۇشەيتۋ جوسپارلانىپ وتىر. ەگەر قازاقستان ازاماتى باسقا ەلدىڭ ازاماتتىعىن راستايتىن قۇجاتتى السا نەمەسە پايدالانسا، وندا ءبىزدىڭ ازاماتتىقتان دەرەۋ شىعارىلادى. قازىر زاڭنامادا مۇنداي شارالار قاراستىرىلماعان. سوندىقتان بۇل جوبا مەن ءتيىستى تۇزەتۋلەردى ۇكىمەت جانە پرەزيدەنت اكىمشىلىگى ماقۇلدادى. ياعني كوشى-قون سالاسىنداعى زاڭ جوباسىنا ەنگىزىلدى (پارلامەنت ماجىلىسىندە)»، - دەدى ۆەدومستۆو باسشىسى.
