ءاليحان سمايىلوۆ كوشى-قون ماسەلەسىنە قاتىستى مينيسترلىكتەرگە ءبىرقاتار تاپسىرما جۇكتەدى
بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«جالپى بيىلعى ءبىرىنشى جارتىجىلدىقتا كوشى-قوننىڭ وڭ سالدوسى قالىپتاستى. سونىمەن بىرگە، مىنا ماسەلەلەرگە نازار اۋدارامىن. بىرىنشىدەن، عىلىم جانە جوعارى ءبىلىم مينيسترلىگى جەتەكشى شەتەلدىك ۋنيۆەرسيتەتتەرمەن بىرگە اكادەميالىق ۇتقىرلىقتى كەڭەيتۋ جونىندە پارمەندى شارالار قابىلداۋى قاجەت. شەتەلدىك وقىتۋشىلار مەن جاس عالىمداردى تارتۋ باعدارلاماسى اياسىندا ءىس- شارالاردى كۇشەيتۋ كەرەك. بۇل جۇمىس تۇراقتى نەگىزدە جۇرگىزىلۋى ءتيىس جانە عىلىم مينيسترلىگىنىڭ جەكە باقىلاۋىندا بولۋى كەرەك»، - دەدى ءا. سمايىلوۆ.
سونىمەن قاتار ۇكىمەت باسشىسى سيفرلىق دامۋ مينيسترلىگىنە ەلىمىزگە IT-مامانداردى تارتۋ جۇمىستارىن كۇشەيتۋدىڭ تاپسىردى.
پرەمەر-مينيستر ەڭبەك مينيسترلىگى مەن سىرتقى ىستەر مينيسترلىگىنە ەلىمىزدە جوعارى سۇرانىسى بار مامانداردىڭ نەمەسە شەتەلدە تابىستى بيزنەس-جوبالارى بار ادامداردىڭ ەلىمىزگە جەڭىلدەتىلگەن تارتىپپەن كىرۋىن قامتاماسىز ەتۋدى تاپسىردى. ياعني اتالعان بيزنەس-جوبالاردى ەلىمىزدە جۇزەگە اسىرۋعا مۇمىندىك جاساۋ كەرەك.
«مۇنىمەن قوسا، ىشكى ىستەر مينيسترلىگى ءوڭىر اكىمدىكتەرىمەن بىرگە زاڭسىز كوشى-قونمەن كۇرەستى كۇشەيتۋى قاجەت. بۇل رەتتە، باسقا مەملەكەتتىك ورگاندارمەن ءوزارا ءىس-قيمىلدى ۇيلەستىرۋ كەرەك. اتاپ ايتقاندا، ەڭبەك مينيسترلىگى قازاقستان ازاماتتارىنىڭ شەتەلدەگى قۇقىعىن قورعاۋدى قامتاماسىز ەتەتىن جۇمىستارعا ەرەكشە ءمان بەرۋى كەرەك»، - دەدى ءاليحان سمايىلوۆ.
بۇدان بۇرىن حابارلانعانداي، بيىلعى ءبىرىنشى توقسانداعى ەسەپ بويىنشا قازاقستاننىڭ 194 مىڭنان استام ازاماتى شەتەلدە جۇمىس ىستەپ ءجۇر.
