اقمولا لاگەرىندە دەمالىپ جاتقان بالالار «استانالىق» جانە «جەتىمدەر» بولىپ ەكىگە بولىنگەن - فوتورەپورتاج

استانا. قازاقپارات - اقمولا وبلىسىنداعى بالالاردىڭ جازعى دەمالىسى تۋرالى كەزەكتى فوتورەپورتاجدا قازاقپارات تىلشىلەرى «ARMAN» بالالار لاگەرى تۋرالى اڭگىمەلەيدى.
None

مۇندا حالىقتىڭ الەۋمەتتىك وسال توپتارىنىڭ بالالارى جانە جەتىم بالالار دەمالادى.

وعان قوسا، بۇل لاگەردە «اقىلى» نەگىزدە دەمالىپ جاتقان بالالار دا بار.

وسىلايشا «ارمان» لاگەرى «استانالىق» جانە «جەتىمدەر» بولىپ ەكىگە بولىنگەن. ايتسە دە بۇكىل دەمالۋشى بالالار مۇنداعى جاعدايدىڭ ءماز ەمەستىگىن ايتىپ وتىر.

نەلىكتەن ولاي ايتقانى العاشقى مينۋتتاردا-اق تۇسىنىكتى بولدى. سەبەبى ويىن الاڭدارى بوس، بالالاردى ەش قىزىقتىرا الماعان.

بالالار مۇمكىندىگىنشە كوڭىل كوتەرىپ ءجۇر. كۇندىز ولار كولەڭكە ىزدەپ، دوپ وينايدى، كەشكە 10 ادامعا ارنالعان تىمىرسىق بولمەلەرىنە كەتەدى.


ىستىق، شاڭدى كۇننەن كەيىن بالالاردىڭ دۋش قابىلدايتىن مۇمكىندىگى جوق.


بىرنەشە اپتا بويى بالالار وركەنيەتتىڭ بۇل جەتىستىگىن كورمەيدى. بۇل دەمالىستى جالعاستىرۋعا ۇمتىلىس تۋدىرمايدى.

اۋىر انتيسانيتاريا جاعدايىندا جيھازداعى «مۇندا تازا» دەگەن سوزدەر، ونداعى «تازالىققا جاۋاپتى ادامنىڭ» قولتاڭباسى مازاق سياقتى كورىنەدى.

«جەتىم بالالار كوپ تاماق جەيدى»

قىزداردىڭ بولمەسىنەن كەپكەن نان، پەچەنە سەكىلدى دەنساۋلىققا اسا پايداسى جوق ءتۇرلى تاعامداردىڭ بوس قۇتىلارىن تاپتىق.

وسىعان قاراپ، بالالاردىڭ تويىپ تاماق ىشپەيتىنىن اڭعاردىق جانە بۇل سۇراقتى توتەسىنەن قويدىق.

بالالار تاڭعى 8 دە ويانادى، ءبىراق تاڭعى استى 10 عا قاراي ىشەدى. ولاردىڭ بىزگە ايتۋىنشا، الدىمەن «اقىلى» تۇردە دەمالاتىن استانالىق بالالار تاماقتانادى.

سودان كەيىن عانا قالعان بالالاردى كىرگىزەدى. ولار ءوز كەزەگىن كۇتىپ تۇرعاندا سىرتتا دوپ وينايدى نەمەسە بولمەلەرىندە جاتادى.

«بىزدە ءالى تاڭعى اس بولعان جوق. ويتكەنى استانادان كەلگەن «ءۇيى بار» بالالاردىڭ تاماقتانىپ بولعانىن كۇتەمىز. ولاردىڭ وتباسى بار. ال ءبىز بالالار ۇيىنەن كەلگەنبىز»، - دەدى قىزداردىڭ ءبىرى.

«تاعامدارى ءدامدى مە؟» دەگەن سۇراققا بالالار حورمەن «جوق» دەپ جاۋاپ بەردى.

«كەيدە تۇزى جوق تاماق بەرەدى، ودان تابەت جوعالادى. ەتى بار، ءبىراق وتە از. ىرىمشىك ۇنەمى ۇستەلگە قويىلا بەرمەيدى. ءبىزدىڭ كەلگەنىمىزگە ءبىر اي بوپ قالدى. تاڭعى اسقا سارى ماي، بوتقا بەرەدى، كەشە شۇجىق بەردى»، - دەپ ءبولىستى بالالار تاڭعى اس كەزىندە.

لاگەردىڭ ماۋسىمدىق باسشىسى جانات ابەنوۆا ماسەلەنى بىلاي ءتۇسىندىردى:

«جەتىم بالالار كوپ تاماق جەيدى، سوندىقتان ولار اسحاناعا سوڭعى بولىپ كىرەدى. قوسىمشا تاماق ءۇشىن ءۇش-ءتورت رەت كەلەدى. سوندىقتان ولارعا كوبىرەك بەرۋ ءۇشىن سوڭىنان كىرگىزەمىز».

لاگەر اسپازى گۇلنار دوسماعامبەتوۆا دا بالالاردىڭ تابەتىنە تاڭ قالعان.

«راتسيون بارىنە بىردەي. استانادان كەلگەن بالالار العاشىندا جارتىسىن عانا جەيتىن، كەيدە مۇلدەم جەمەيتىن. ءۇي تاماعىنان كەيىن وسىلاي جۇرەدى دە، ءتورتىنشى-بەسىنشى كۇندەرى قالىپتى كولەمدە جەي باستايدى. بالالار ءۇيىنىڭ تاربيەلەنۋشىلەرى ناندى دا، بوتقانى دا قوسىمشا سۇراپ وتىرادى. پىسىرگەن بوتقامىز تۇگەل تاۋسىلادى»، - دەيدى ول.


اسپازدار استانالىق بالالاردى تاماقتاندىرىپ جاتقاندا، ءبىز ۇلداردىڭ قانداي جاعدايدا تۇرىپ جاتقانىن كوردىك.


ەرەسەك بالالار لاگەردە زەرىگەدى. ولار نەگىزىنەن سابيلەرگە ارنالعان باسسەيندە شومىلىپ ءجۇر.

«ۇلكەن باسسەين ءۇش جىل بويى جوندەلىپ جاتىر. شاماسى، قاراجات پروبلەماسى بار سەكىلدى. سوندىقتان ءبىز جاساندى باسسەين ساتىپ الدىق. ۇلكەن باسسەين جارتىلاي جاسالدى، ءبىراق قانداي كۇيدە ەكەنىن وزدەرىڭىز كورىپ تۇرسىزدار»، - دەدى ماۋسىمدىق لاگەر باستىعى.

«تەندەرگە شىعاردىق. جوندەۋگە سۋ جۇيەسىن تولىعىمەن اۋىستىرۋ دا كىرەدى. بىزدە باسسەين بار، ءار 10 كۇن سايىن سۋدى اۋىستىرامىز. كورىپ وتىرعانىڭىزداي، اشىق اۋادا ورنالاسقاندىقتان جاپىراقتار، ۇساق قۇم تۇسەدى. الايدا مۇندا تازالاۋ جۇرگىزەتىن ەلەكتر سۇزگىسى بار»، - دەدى استانا قالاسى اكىمدىگىنىڭ بالالار- جاسوسپىرىمدەر تۋريزمى جانە ولكەتانۋ ورتالىعى ديرەكتورىنىڭ مىندەتىن اتقارۋشى ازامات ءسابيتوۆ.

ويىن الاڭىن ءشوپ باسىپ كەتكەن

جاسوسپىرىمدەر مۇندا فۋتبولمەن شۇعىلدانا الار ەدى، ءبىراق مۇنداعى الاڭدى دا ارام ءشوپ باسىپ كەتكەن.

«الاڭقايدى كوردىڭىزدەر مە؟ وندا دالاداعىداي باسكەتبول مەن فۋتبول ويناۋعا بولادى. ءشوپ پەن ەسكى سىنعان شىعىرشىقتار بار، ءوزىمىزدىڭ دوبىمىز بار. ءبىراق وندا ويناۋ ىڭعايسىز. قاقپاسى بار، ءبىراق ءشوپ باسىپ كەتكەن»، - دەدى بالالار.

جاقىندا جاز مەزگىلى اياقتالادى. جاڭا وقۋ جىلى باستالادى. «ARMAN» لاگەرىندە دەمالعان بالالار قۇرداستارىنا نە ايتۋى مۇمكىن؟

مۇنى جەرگىلىكتى جازعى دەمالىستى ۇيىمداستىرۋشىلاردىڭ ويلاي قويۋى ەكىتالاي، ءبىراق ويلانۋى كەرەك.

ويتكەنى ولاردىڭ تاربيەلەنۋشىلەرى ءوز دەمالىسىنا، دەنساۋلىعى مەن جاعىمدى كوڭىل- كۇيىنە ەرەسەكتەردىڭ ەش ءمان بەرمەيتىنىن كوردى.

كورگەننەن سوڭ تومەندەگىدەي تۇجىرىمدار جاساپ العان:

«وسكەندە باسكەتبول جاتتىقتىرۋشىسى بولعىم كەلەدى. ءبىراق بولا المايتىن شىعارمىن. ويتكەنى ءبارىن اقشا شەشەدى، بۇل قيسىندى دا. ءبىر كۇنى بايدىڭ ۇلى كەلەدى دە ورنىڭدى تارتىپ الادى. ءبارى ادەتتەگىدەي»، - دەيدى بالالاردىڭ ءبىرى.


نەلىكتەن ەرەسەكتەر وسىنداي نەمقۇرايدىلىققا جول بەردى؟ ماسەلەنىڭ ءبارى ساۋىقتىرۋ لاگەرلەرىن تەكسەرۋگە جاريالانعان موراتوريدە مە؟

الدە قاراپايىم جاۋاپسىزدىقتا، نەمقۇرايلىلىقتا جانە وسكەلەڭ ۇرپاقتى - ۇلتتىڭ بولاشاعىن تاربيەلەۋ سالاسىنداعى مەملەكەت جۇمىسىن قاساقانا بۇلدىرۋدە مە؟

قۇزىرلى ورگانداردىڭ حابارلاۋىنشا، جازعى دەمالىس نىساندارىن تەكسەرۋ تامىز ايىنىڭ سوڭىنا دەيىن جۇرگىزىلەدى.

تەكسەرۋ ناتيجەسى تۋرالى مىندەتتى تۇردە كەيىنىرەك حابارلانادى.

Upd: بۋرابايداعى «سامۇرىق» بالالار لاگەرى تۋرالى ءبىز جاريالاعان ماقالادان سوڭ اقمولا وبلىسىنىڭ سانيتاريالىق قىزمەتى لاگەردىڭ جاي- كۇيىن تەكسەردى.

ۆەدومستۆونىڭ حابارلاۋىنشا، اتالعان لاگەردىڭ قىزمەتىن قولدانىستاعى نورماتيۆتىك- قۇقىقتىق اكتىلەرگە سايكەس توقتاتۋ ماسەلەسى قارالىپ جاتىر.

سونداي-اق، «سامۇرىقتا» دەمالۋعا رۇقسات ەتىلگەن كولەمنەن ەكى ەسە كوپ بالالار قابىلدانعانى انىقتالدى، جاس دەمالۋشىلار ەش ازىرلەنبەگەن كورپۋستارعا ورنالاستىرىلعان.

اۆتور:

ايجان سەرىكجان قىزى


سوڭعى جاڭالىقتار