كريشتيانۋ رونالدۋ تاعى دا رەكورد ورناتتى

استانا. قازاقپارات - پورتۋگاليا قۇراماسى مەن ساۋديالىق «ال- ناسر» كلۋبىنىڭ شابۋىلشىسى كريشتيانۋ رونالدۋ رەسمي ماتچتاردا باسپەن سوعىلعان گول سانى جونىنەن رەكورد ورناتتى، دەپ حابارلايدى قازاقپارات ءتىلشىسى.

Championat.com سايتىنان ءمالىم ەتكەنىندەي، پورتۋگاليالىق ويىنشى كلۋبتىق اراب چەمپيوندارى كۋبوگىنىڭ توپتىق باسەكەسىندە «موناستيرمەن» وتكەن باسەكەدە (4:1) گول سوقتى.

وسىلايشا، رونالدۋ رەسمي ويىنداردا باسپەن 145-گول سوعىپ، كەزەكتى رەكوردتىق ناتيجەگە قول جەتكىزدى. بۇعان دەيىن ۇزدىك كورسەتكىش نەمىس شابۋىلشىسى گەرد ميۋللەرگە (144) تيەسىلى ەدى. يسپانيالىق كارلوس سانتيليان (125) ءۇشىنشى ورىندا.رونالدۋ «ال-ناسر» كومانداسىندا بيىلعى قاڭتاردان بەرى دوپ تەۋىپ كەلەدى. كەلىسىمشارت 2025 -جىلعا دەيىن ەسەپتەلگەن. وتكەن ماۋسىمدا كريشتيانۋ 20 ماتچتا 14 گول ەنگىزىپ، ەكى ناتيجەلى پاس بەردى.

ەسكە سالا كەتەيىك، بۇدان بۇرىن «اقجايىقتىڭ» «حان ءتاڭىرى» كومانداسىمەن تەڭ ويناعانىن جازعان بولاتىنبىز.