شەكارادان جاباق دەگەن شالدىڭ ارتىنا مىنگەسىپ ءوتتىم - جاركەن بودەش، اقىن

- اعا، ءسىز كوبىندە پوەزيانى تاعدىرمەن بايلانىستىرىپ جاتاسىز؟ وسى جايىندا كەڭىرەك توقتالا كەتسەڭىز؟
- اقىننىڭ تاعدىرى دا، پوەزياسى دا - ءوزى. اقىن قاشاندا باسىنان نە ءوتتى، نە كەتتى، ياعني، ءوزىن جىرلايدى. ءبىزدىڭ قازاقتىڭ تاعدىرى اۋىر حالىق قوي، ءتۇرلى سەبەپتەرمەن شەت جەرگە كوشىپ كەتتى، مۇنىڭ ءوزى قازاق ادەبيەتىنىڭ بۇگىنگى بيىككە كوتەرىلۋىنە وزىندىك ىقپالى بولدى، مەنىڭ تاعدىرىم قىتايدىڭ «مادەنيەت زور توڭكەرىسى» دەگەن الماعايىپ زامانعا تۋرا كەلدى، سوندا توڭكەرىلىپ ءجۇرىپ توڭكەرىلىپ قالدىق، سوسىن اتاجۇرتتى تابۋ كەرەك بولدى. سوسىن وسىندا كەلدىك، 40 جىل بولدى، جامان بولعامىز جوق. ءبىز اتا جۇرتىمىزدى اداسپاي تاپتىق، سوندىقتان، ءبىز باقىتتى ادامبىز. شەكارادان جاباق دەگەن شالدىڭ ارتىنا مىنگەسىپ ءوتتىم، بالا كۇنىمدە تۇك سالماق جوق، كىپ-كىشكەنتاي بالا بولدىم. جەتى اتىمىز بار ەدى، جولدا جۇرىسكە جاراماي قالدى، سوسىن جاباق اقساقال: «اتتاردى جىبەرىڭدەر، ءوزى ەلدى تاۋىپ الادى» دەپ جىبەرتتى. سوندا بىزبەن بىرگە ءۇش ءيت ەرىپ شەكاراعا دەيىن كەلدى دە، ءۇرىپ، ۇلىپ قايتادان ارتقا قايتىپ كەتتى، سودان بەرى ءيتتى قاتتى جاقسى كورەمىن.
- جاركەن اعا، ءبىر ولەڭىڭىزدە «الدىمدا مۇقاعالي ماقاتايەۆ، سوڭىمدا ەسەنعالي راۋشانوۆ» دەپسىز. مۇنى اتالعان اقىنداردىڭ قاي قىرىنان ايتتىڭىز؟
- بۇنى تالانت جاعىنان ايتتىم، ەسەنعالي جاسى جاعىنان دا مەنەن كىشى، ولەڭنەن دە وزىپ كەتە المايدى، مەن، جالپى ەشكىمدى الدىما تۇسىرگىم كەلمەيدى، ال، وزىپ كەتسە قۋانام!
ەسەنعاليدى قاتتى جاقسى كورەم، ول - ناعىز تالانت. تالانتتى تالانت قانا سىيلايدى.
قاراعان بۇتانىڭ تۇبىنەن،
ۇيقىسى قانىپ تۇنىمەن،
ورعىپ شىققان قويانداي،
ورعىپ-ورعىپ جۇگىرەم، - دەپ باستالاتىن تۋعان جەرگە بارعاندا جازعان ولەڭىمدى ەسەنعالي تۇتاس جاتقا بىلەدى. ال ول مەن تۋرالى جازىپ ءجۇر مە، جازباي جۇرمە بىلمەيمىن، سۇرامايمىن دا، جازسا ءبىر كۇنى ەستيتىن شىعارمىز.
- قازاق كوشىنىڭ قازىرگى جايىنا نە ايتاسىز اعا؟
- قازىر كوشى-قون تۋرالى ءتۇرلى اڭگىمە بار، جالپى قوعام ارالاسىپ كەتتى، بۇكىل الەم قۇدا مەن قۇداعيداي. سونداي كەزدە ءبىر داعدارىس بولۋى - زاڭدىلىق، كوشتىڭ توقتاعانى راس، مەنىڭ ءدانىشپاندىعىم جوق، اقىن عانامىن عوي، بولجامىم بويىنشا شەكارا ەشقاشان جابىلمايدى، ءوزىڭ ەبىن تاپتا كەل، وتانىڭدى، اتاجۇرتىڭدى كور.
- جاس اقىنداردىڭ لەگىنەن كىمدەردى اتايسىز؟
- تالانتتى باۋىرلارىم وتە كوپ، قايسىسىنىڭ ەسىمى اۋىزعا ءىلىنسىن. ءبىرىن ايتسام، ءبىرى قالىپ كەتەدى، سوندىقتان بۇل سۇراقتىڭ جاۋابىن، جازعان ماقالالارىمنان الىپ السىن.
مەن اقىن ەمەسپىن، تاعدىرىم – اقىن
- «اقىندىق جاسپەن ولشەنبەيتىنىن» دالەلدەپ كەلە جاتقان جاننىڭ ءبىرىسىز... ءباز بىرەۋلەر ايتاتىنداي «شابىتتى» قايدان الىپ ءجۇرسىز اعا؟
- كەشە كەڭەس ۇكىمەتىندە سەنزۋرا دەگەن بولدى، نە جازعانىمىزدى قاداعالاپ وتىراتىن. قالاي تاۋەلسىزدىك كەلدى، مەن سولاي اعىلدىم. كوگالدى سۋارۋ ءۇشىن سۋدى باسىنان بۋىپ، توسىپ، كەرەكتى كەزىندە عانا جىبەرىپ وتىرادى، سولاي توسىلىپ وتىرعان شابىت ەركىندىك كەلگەندە كوسىلە ءتۇستى، ول - تاۋەلسىزدىك.
- ءسىزدىڭ پوەزياڭىزدى كىمدەر زەرتتەدى؟
- بولات بوپاي مەنىڭ پوەزيامدى ولەڭ سياقتى جازدى، ونى بىرەۋ ءتۇسىندى، بىرەۋ تۇسىنگەن جوق، وتە ريزامىن. ارداق «سەزىم ماڭگى گۇلدەپ تۇرادى» دەپ تالداعاندا، ريزا بولعاندىقتان الدىنا بارىپ سالەم بەردىم، وقىماعانى جوق، بىلەتىنى وتە كوپ ەكەن. ءوزىڭ بىلەسىڭ تەمىرحان مەن تۋرالى ۇلكەن ماقالا جازدى. «جاركەننىڭ قىرىق قىرى بار اقىن، مەن ونىڭ ءبىر عانا قىرىن اشا الدىم، ول - تۋعان جەرگە دەگەن ساعىنىشى» دەدى، بۇل دەگەنىڭ سۇمدىق ءسوز ەمەس پە؟ قۋانىشباي قۇرمانعاليەۆ دەگەن سىنشى بار، وتە ءبىلىمدى جىگىت، كولەمدى ماقالا جازدى، سوسىن «ەگەمەن قازاقستان» گازەتىنىڭ پرەزيدەنتى ساۋىتبەك ءابدىراحمانوۆ تا پوەزيام تۋرالى جازدى، مەنىڭ ءبىر ولەڭىمدە بار ەكەن، «مەن اقىن ەمەسپىن، تاعدىرىم اقىن» دەگەن، ول سوعان قاراپ، سەن ناعىز اقىنسىڭ دەگەن باعا بەردى. مەن وسىنداي باعالاۋدان كەيىن وزگەلەردىڭ ماقتاۋىنا ءزارۋ ەمەسپىن.
- قاتارلاستارىڭىز دۇركىرەتىپ مەرەيتوي توي وتكىزىپ جاتادى، ءسىز قاشان وتكىزەسىز؟
- ەلدى اۋىرەلەگىم كەلمەيدى.
اڭگىمەلەسكەن حازىرەت ءابدىلدا
دەرەككوز: baq.kz
2012 ج