نيگەردەگى اسكەريلەر ەل پرەزيدەنتىن قۇلاتقانىن جاريالادى

نيمامەي. قازاقپارات - نيگەردەگى اسكەريلەر ۇلتتىق تەلەارنا ارقىلى پرەزيدەنت موحامەد بازۋمنىڭ بيلىكتەن قۇلاعانىن جاريالادى، دەپ حابارلايدى قازاقپارات ВВС- گە سىلتەمە جاساپ.
None
Фото: UN Photo/Cia Pak

ولار سونداي- اق كونستيتۋتسيا مەن بارلىق مەملەكەتتىك ينستيتۋتتار جۇمىسى توقتاتىلعانىن جانە ەلدىڭ باتىس افريكاداعى شەكارالارىنىڭ جابىلاتىنىن حابارلادى. تەلەديداردان گەنەرال- پولكوۆنيك امادۋ ابدۋراحمان سويلەدى.

«ءبىز، قورعانىس جانە قاۋىپسىزدىك كۇشتەرى وزدەرىڭىز بىلەتىن رەجيمدى توقتاتۋعا بەل بايلادىق»، - دەدى گەنەرال تەلەديدار ارقىلى سويلەگەن سوزىندە. - بۇل - قاۋىپسىزدىك سالاسىنداعى جاعدايدىڭ ناشارلاۋى مەن ەكونوميكالىق جانە الەۋمەتتىك باسقارۋدىڭ تومەندەۋىنە بايلانىستى قابىلدانعان شەشىم». ونىڭ ايتۋىنشا، مينيسترلىك باسشىلارى كۇندەلىكتى مىندەتىن اتقارا بەرەدى.

«بارلىق سىرتقى سەرىكتەستەردەن ارالاسپاۋدى سۇرايمىز. جاعداي تۇراقتانعانشا تەڭىز جانە اۋە شەكارالارى جابىلادى»، - دەدى ول.

بۇلىكشىلەر سارايىندا ۇستاعان پرەزيدەنت بازۋمگە ا ق ش مەملەكەتتىك حاتشىسى ەنتوني بلينكەن مەن ب ۇ ۇ باس حاتشىسى انتونيو گۋتەرريش قوڭىراۋ شالىپ، قولداۋ كورسەتەتىندەرىنە سەندىردى. سونداي- اق ءوزىن وتان قورعاۋ ۇلتتىق كەڭەسى دەپ اتاعان جاڭا اسكەري حۋنتا ەلدە جەرگىلىكتى ۋاقىت بويىنشا ساعات 22:00-دەن 05:00-گە دەيىن كومەندانتتىق ساعات ەنگىزدى.

2021 -جىلى دەموكراتيالىق جولمەن سايلانعان پرەزيدەنت بازۋم فرانسيانىڭ وداقتاسى. 1960 -جىلى فرانسيادان تاۋەلسىزدىك العاننان بەرى تەڭىزگە شىعا المايتىن باتىس افريكا مەملەكەتى نيگەردە ءتورت رەت ءساتتى توڭكەرىس جانە قازىرگى ۇكىمەتتى قۇلاتۋعا بىرنەشە ءساتسىز ارەكەت جاسالدى.

نيگەر رەسپۋبليكاسى - باتىس افريكاداعى مەملەكەت. جەر اۋماعى - 1267 مىڭ ك م. حالقى 10,1 ميلليون (2000). ەلدە 50 مىڭ سيريالىقتار، ليۆاندىقتار، فرانسۋزدار بار. استاناسى - نيامەي قالاسى اكىمشىلىك جاعىنان 7 دەپارتامەنتكە، 33 وكرۋگكە بولىنەدى. رەسمي ءتىلى - فرانسۋز ءتىلى. حالقىنىڭ % 80- ى مۇسىلمان- سۇننيتتەر، 1 پايىزى حريستياندار، قالعاندارى جەرگىلىكتى نانىم- سەنىمدەردى ۇستانادى. 1989 -جىلى قابىلدانعان كونستيتۋتسياسى بويىنشا مەملەكەت باسشىسى - پرەزيدەنت.

پايدالى قازبالارى - ۋران كەنتاسى، قالايى، ۆولفرام، نيوبيي، تەمىر كەنتاسى، اس تۇزى. پايدالى قازبالاردىڭ نەگىزگى كەن ورىندارى كالامۋس جانە ليپتاكو ۇستىرتتەرىندەگى كريستالدى جىنىستاردىڭ شىعىسىندا، سونداي- اق ەلدىڭ ورتالىعى مەن شىعىسىنداعى شوگىندى جىنىستاردا كەزدەسەدى. ەلدىڭ باستى بايلىعى- ۋران كەنى، ونىڭ قورى بويىنشا نيگەر الەمدە توعىزىنشى ورىندا (ءوندىرۋ بويىنشا التىنشى ورىندا). ۋران كەنى (ۋران وكسيدى) بارلانعان قورلارى 200 مىڭ تونناعا باعالانادى.

اۆتور:

سماعۇلوۆا ەركەجان


سوڭعى جاڭالىقتار