اباي وبلىسىنداعى شوشقالى كولىندە بالشىقپەن ەمدەيتىن شيپاجاي سالىنباق

سەمەي. قازاقپارات - اباي وبلىسىنداعى شوشقالى كولىندە دەمالۋشىلاردى بالشىقپەن ەمدەيتىن شيپاجاي سالىنادى، دەپ حابارلايدى قازاقپارات ءتىلشىسى.

اباي وبلىسى اكىمدىگىنىڭ مالىمەتىنە سۇيەنسەك، بەسقاراعاي اۋدانىنداعى قاراعايلى ورمانمەن قورشالعان شوشقالى تۇزدىكولىنىڭ تۋريستىك الەۋەتى جوعارى.

«شيپالى كول بەسقاراعاي اۋدانىنىڭ سولتۇستىك- باتىس بولىگىندە، اۋدان ورتالىعىنان 85 شاقىرىم جەردە «سەمەي ورمانى» رەزەرۆاتىنىڭ اۋماعىندا ورنالاسقان. ءوزىنىڭ ەمدىك قاسيەتتەرىمەن تانىمال كول ءبىر-بىرىنە جاقىن ورنالاسقان شاعىن سۋ قويمالارىنان تۇرادى. سۋ قويمالارىنىڭ بارلىعى تۇزدى بولعانىمەن ولاردىڭ قۇرامىنداعى تۇز كورسەتكىشى ءارتۇرلى. بۇل توعاندار ەمدىك بالشىققا دا باي»، - دەلىنگەن اقپاراتتا.

«سەمەي ورمانى» رەزەرۆاتى دەمالۋشىلارعا جاعداي جاساۋ ماقساتىندا كول جاعاسىندا جاعاجايعا قۇم توسەپ، كيىم اۋىستىرۋعا ارنالعان كابينكالار، جاتار ورىندار، كۇننەن قورعايتىن نىساندار ورناتتى. سونداي-اق ۆولەيبول الاڭى، جابدىقتالعان اس ازىرلەۋ ايماعى، ءۇش قوقىس كونتەينەرى قويىلدى. كول جاعاسىندا 12 توسەك- ورىنعا ارنالعان شاعىن قوناق ءۇي بار.

«جىل سايىن كولگە جاقىن وبلىستاردان مىڭنان استام ادام كەلەدى. سەمەي قالاسىنان دەمالىس كۇندەرى ارنايى تۋرلار ۇيىمداستىرىلادى. تۋر اياسىندا قالا جانە باسقا اۋدانداردىڭ تۇرعىندارى كولگە اۆتوبۋستارمەن بارا الادى. 2024-2025 -جىلدارى «شوشقالى» كولىندە بالشىقپەن ەمدەيتىن جانە دەمالىس ايماعى بار شيپاجاي سالۋ جوسپارلانعان»، - دەلىنگەن حابارلامادا.