تۇركىستان وبلىسىنداعى جاعداي: پرەزيدەنت قايعىلى وقيعانىڭ ءمان- جايىن مۇقيات تەكسەرۋدى تاپسىردى

قۇقىق قورعاۋ ورگاندارى ءىستى تەرگەۋ امالدارىن جۇرگىزىپ جاتىر. كۇدىكتى انىقتالدى.

قولدا بار اقپارات بويىنشا، كۇدىكتى بۇعان دەيىن كىسى ولتىرگەنى ءۇشىن سوتتالىپ، 10 جىلعا باس بوستاندىعىنان ايىرىلعان. بيىل وعان ادام دەنساۋلىعىنا قاساقانا اۋىر زيان كەلتىرگەنى ءۇشىن 3 جىلعا باس بوستاندىعىن شەكتەۋ جونىندە ۇكىم شىعارىلعان.

پرەزيدەنت باس پروكۋراتۋرا مەن ىشكى ىستەر مينيسترلىگىنە بولعان قايعىلى وقيعانىڭ ءمان- جايىن مۇقيات تەكسەرۋدى تاپسىردى. مەملەكەت باسشىسى بيىل شىعارىلعان سوت ۇكىمىنىڭ زاڭدىلىعىن قاراستىرۋ جانە ادامعا قاتىستى اسا قاۋىپتى قىلمىس جاساعانى ءۇشىن قىلمىستىق جاۋاپكەرشىلىكتى كۇشەيتۋ ماڭىزدى دەپ سانايدى.

«بالانىڭ تۋىستارى مەن جاقىندارىنا قايعىرىپ كوڭىل ايتامىز»، - دەلىنگەن حابارلامادا.

ايتا كەتەيىك، تۇركىستان وبلىسى سارى اعاش اۋدانىنىڭ تۇرعىنى 13-شىلدە كۇنى قىزىنىڭ جوعالعانى تۋرالى پوليتسياعا ارىز جازعان. ءبۇلدىرشىن اۋىلداسىنىڭ ۇيىنەن ءولى كۇيىندە تابىلدى. جانتۇرشىگەرلىك جايتقا قاتىستى تۇركىستان وبلىسى پوليتسيا دەپارتامەنتى تۇسىنىكتەمە بەردى. ۆەدومستۆونىڭ باسپا ءسوز قىزمەتىنىڭ حابارلاۋىنشا، 13-شىلدەدە سارى اعاش اۋداندىق پوليتسيا بولىمىنە جەرگىلىكتى تۇرعىن كامەلەتكە تولماعان قىزىنىڭ جوعالىپ كەتكەنى تۋرالى ارىز جازعان. «جەدەل- ىزدەستىرۋ ءىس- شارالارى بارىسىندا پوليتسيا قىزمەتكەرلەرى اۋىل تۇرعىندارىنىڭ ءبىرىنىڭ ۇيىنەن دەنە جاراقاتى بار قىزدىڭ دەنەسىن تاپتى. بۇل فاكت قىلمىستىق كودەكستىڭ 99-بابى (ادام ءولتىرۋ) بويىنشا تىركەلدى. ساراپتاما تاعايىندالدى. سوتقا دەيىنگى تەرگەۋ جۇرگىزىلۋدە»، - دەلىنگەن رەسمي حابارلامادا. سونداي- اق پوليتسيا دەپارتامەنتىنىڭ باسپا ءسوز قىزمەتى كۇدىكتىنىڭ قاماۋعا الىنعانىن ءمالىم ەتتى. وقيعا ورنىنا پوليتسيا ءبولىمىنىڭ باسشىلىعى، اۋداندىق پروكۋروردىڭ ورىنباسارى جانە جەدەل- تەرگەۋ توبى بارعان.