بۇگىن - قۇربان ايت مەرەكەسىنىڭ ءبىرىنشى كۇنى

قۇربان ايتتىڭ ءبىرىنشى كۇنى 28-ماۋسىمعا ءتۇسىپ تۇر. ايتا كەتەيىك، ءۇش كۇندىك مەرەكەنىڭ العاشقى كۇنى ەلىمىزدە دەمالىس سانالادى. بۇل كۇندەرى قۇرباندىققا مال شالىپ، ازىعى جوق، مۇقتاج جاندارعا تاراتىپ بەرەدى. يسلام تۇسىنىگى بويىنشا جوق- جىتىك جاندارعا كومەكتەسۋ ساۋاپتى ءىس. سونداي- اق، مۇسىلماندار قۇلشىلىق ەتىپ، كوبىرەك جاقسى امالدار جاساۋعا تىرىسقانى ءجون.

اتاپ ايتقاندا، مەرەكە كەزىندە قۇربان ايت نامازى وقىلادى. ايتا كەتەيىك، ءار وڭىردە ناماز وقۋدىڭ بەكىتىلگەن ۋاقىتى بار. اتالعان مەرەكەگە ءتان مىندەت - قۇربان شالۋ. ەسكە سالا كەتەيىك، قۇرباندىققا شالاتىن مالعا جانە سويۋعا قاتىستى قويىلاتىن ارنايى تالاپتار بار.

«27-ماۋسىم - اراپا بولسا، 28-ماۋسىم - قۇربان ايت مەيرامىنىڭ العاشقى كۇنى. قۇربان شالۋدىڭ ۋاقىتى 28 -ماۋسىم كۇنى ايت نامازى وقىلىپ بولعاننان كەيىن باستالسا، اياقتالۋى 30-ماۋسىم كەشكى اقشام نامازىنا دەيىن جالعاسادى. ياعني، اتالعان ۋاقىتتان تىس قۇربان شالۋعا، ۋاقىتىنان ەرتە جانە كەشىگىپ تە قالۋعا بولمايدى. ايت نامازى استانا قالاسىندا تاڭعى 6.00-دە باستالادى. وزگە قالالار بويىنشا اقپاراتتى muftiyat.kz سايتىنان قاراپ الساڭىزدار بولادى»، - دەدى باس ءمۇفتيدىڭ كەڭەسشىسى كەنجەتاي دۇيسەنباي ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

حانافي ءمازھابىندا قۇربان ايت كۇندەرى باي ادامعا قۇربان شالۋ - ءۋاجىپ ياعني مىندەت. شاريعات بويىنشا «باي» دەپ مال- دۇنيەسى نىساپ مولشەرىنە جەتكەن ادامعا ايتىلادى. مال- دۇنيەسى نىساپ مولشەرىنە جەتپەگەن، ياعني جاعدايى تومەن مۇسىلمانعا قۇربان شالۋ مىندەت ەمەس. ايت كۇندەرى از دا بولسا ساداقا بەرىپ، قاراۋسىز قالعان قارتتارعا، جەتىمدەر مەن كوپبالالى وتباسىلارعا كوڭىل ءبولۋ - ساۋاپتى ءىس.

قازاقستان مۇسىلماندارى ءدىني باسقارماسى قۇربان شالۋ ءراسىمىن قاشىقتان وتكىزۋگە ارنالعان qurban2023.kz سايتىن ىسكە قوستى.

«مۇسىلمان قاۋىمىنىڭ قاسيەتتى ايت مەرەكەسىنە وراي، بارشا قازاق ەلىن «قۇربان-2023» قايىرىمدىلىق اكسياسىنا ۇلەس قوسۋعا شاقىرامىز. حالىققا، اسىرەسە ۇلكەن قالالاردا تۇراتىن جاماعاتقا وڭتايلى بولۋ ءۇشىن بيىل قۇربان شالۋ وفلاين جانە ونلاين فورماتتا جۇزەگە اسادى. ايتا كەتسەك، ونلاين تۇردە قۇربان شالام دەۋشىلەر سايت ارقىلى قۇرباندىق مالىن تاڭداپ، كورسەتىلگەن رەكۆيزيتكە قاجەتتى قاراجاتتى اۋدارا الادى. قوي مەن ەشكىنى جەكە ادام، ال ءىرى قارا مەن تۇيە مالىن ءبىر نەمەسە 7 ادام بىرىگىپ شالسا بولادى. بۇدان كەيىن تولەم بارىسىندا حابارلاماعا تاپسىرىس ءنومىرى مەن قۇرباندىق شالۋشىنىڭ اتى- ءجونىن جازۋ مىندەتتى. قۇرباندىق شالىنعان سوڭ ونىڭ فوتو جانە بەينە ەسەبى تاپسىرىس بەرۋشى كورسەتكەن WhatsApp نومىرگە جىبەرىلەدى»، - دەلىنگەن رەسمي حابارلامادا.