پرەزيدەنت اتىنان مەملەكەتتىك ب ا ق قىزمەتكەرلەرىنە پاتەر سەرتيفيكاتتارى بەرىلدى
استانا. قازاقپارات - بۇگىن باق قىزمەتكەرلەرى كۇنى قارساڭىندا ەلىمىزدىڭ جەتەكشى مەملەكەتتىك بۇقارالىق اقپارات قۇرالدارىندا ەڭبەك ەتىپ جۇرگەن جۋرناليستەر مەن باسقا دا قىزمەتكەرلەرگە پاتەر سەرتيفيكاتتارى سالتاناتتى تۇردە تابىس ەتىلدى، دەپ حابارلايدى قازاقپارات.
مەملەكەت باسشىسىنىڭ تاپسىرماسى بويىنشا «Qazaqstan» ر ت ر ك» ا ق، «حابار» اگەنتتىگى» ا ق، ق ر پرەزيدەنتىنىڭ تەلەراديوكەشەنى، «Qazcontent» ا ق جانە «قازاق گازەتتەرى» ج ش س قىزمەتكەرلەرىنە پاتەر كىلتىن پرەزيدەنتتىڭ باسپا ءسوز حاتشىسى رۋسلان جەلدىباي تاپسىردى.
ول ارىپتەستەرىن مەرەكەمەن قۇتتىقتاي وتىرىپ، ولاردىڭ وتاندىق جۋرناليستيكانى دامىتۋعا ەلەۋلى ۇلەس قوسىپ جۇرگەنىن اتاپ ءوتتى. سونداي-اق مەملەكەت باسشىسى وتاندىق باق- تىڭ باسەكەگە قابىلەتتىلىگىن ارتتىرۋ ماسەلەسىنە ايرىقشا كوڭىل بولەتىنىن ايتتى. سوندىقتان پرەزيدەنت ەلىمىزدىڭ بۇقارالىق اقپارات قۇرالدارى قىزمەتكەرلەرىن قولداۋ جونىندە شەشىم قابىلداعانىن جەتكىزدى.
سونىمەن قاتار ب ا ق قىزمەتكەرلەرىن اقپارات جانە قوعامدىق دامۋ ءمينيسترى دارحان قىدىرالى، «دارا» قورىنىڭ باسشىسى اسەل شىلدەبايەۆا جانە «حالىق» قايىرىمدىلىق قورىنىڭ ديرەكتورى ساعىنبەك شۇنكەيەۆ قۇتتىقتادى.
پاتەر سەرتيفيكاتىنا يە بولعان ب ا ق سالاسىنىڭ 65 قىزمەتكەرى ەلوردادا جاڭادان بوي كوتەرگەن ءزاۋلىم ۇيلەردىڭ بىرىنە جۋىردا قونىستانادى.
ماسس-مەديا ماماندارىنىڭ ايرىقشا ەڭبەگىن ايشىقتايتىن شارا «دارا» پرەزيدەنتتىك باستامالار قورىنىڭ جانە «حالىق» قايىرىمدىلىق قورىنىڭ دەمەۋشىلىگىمەن ۇيىمداستىرىلدى.
2022 -جىلى قۇرىلعان «دارا» پرەزيدەنتتىك باستامالار قورىنىڭ قىزمەتى قازاقستاندا كرەاتيۆتى سەكتوردى دامىتۋعا، ازاماتتاردىڭ شىعارماشىلىق الەۋەتىن ىسكە اسىرۋ ءۇشىن قولايلى جاعداي جاساۋعا، جاڭا جۇمىس ورىندارىن اشۋعا باعىتتالعان.
