پولشادا «ديماش» راديوسى جۇمىس ىستەپ تۇر

None
استانا. قازاقپارات – بۇل كادىمگى ديماش قۇدايبەرگەننىڭ قۇرمەتىنە اشىلعان ارنا. ۆارشاۆادان شىققان تولقىن الەمگە تارايدى. 24 ساعات بويى ۇلى دالا اۋەندەرى شىرقالادى بۇل ءبىر.

ەكىنشىدەن راديو قازاق ءتىلىن ۇيرەتەدى. ودان قالدى ءبىزدىڭ ەل جايىندا تانىمدىق ماتەريالدار بەرىلىپ تۇرادى. پولشادا «ديماش» راديوارناسىن اشۋ يدەياسىن جەرگىلىكتى جانكۇيەرلەر ىسكە اسىردى. مەديا سالاسىندا تاجىريبەسى جوق جانداردى بىرىكتىرگەن، شابىتتاندىرعان - وتاندىق ءانشىمىزدىڭ عاجاپ داۋىسى. ونەردە ۇلت جوق. راديو تاۋلىگىنە 24 ساعات جۇمىس ىستەيدى، داۋىسى الەمگە تارالادى.

زبيگنيەۆ كۋجينسكي، «ديماش» راديوسىنىڭ نەگىزىن قالاۋشى:

- مەن ديماشتاي تالانتپەن «Singer» جوباسى ارقىلى تانىستىم. «S. O. S.» ءانى مۋزىكاعا دەگەن ماحابباتىمدى وياتتى. ونىڭ ورىنداۋشىسىن ومىردە كورگىم كەلدى. كونسەرتىنە بارۋدىڭ امالىن ىزدەي باستادىم. فرانسۋز تىلىندەگى ءاندى ەستىپ العان سوڭ، ءبىر ايدان كەيىن ديماشتىڭ لوندونداعى كونسەرتىن تاماشالادىم. سودان كەيىن راديوارنا اشتىق. ءبىزدىڭ دەمەۋشىمىز جوق. رەداكتور، جۇرگىزۋشى - ءبارىمىز تەگىن قىزمەت اتقارامىز.

راديوارنا قازاقستاننىڭ كورىكتى جەرلەرى، تاريحى، قازاق جانە پولياك ۇلتىنىڭ قاھارماندارى تۋرالى اقپارات بەرەدى. ءبىزدىڭ ەلدەگى بارلىق ايتۋلى ءىس- شارانى اتاپ وتەدى. ماسەلەن، تامىز ايى ۇلى اقىن اباي شىعارماشىلىعىنا ارنالعان. ەڭ باستىسى، ديماشتىڭ اندەرىن جانە جالپى حالقىمىزدىڭ مادەنيەتىن ءتۇسىنۋ ءۇشىن راديودا ارنايى قازاق ءتىلى ساباعى جۇرگىزىلەدى.

تەرەزا كونكول، «پولشاداعى ديماش قۇدايبەرگەن جانكۇيەر كلۋبى» قاۋىمداستىعىنىڭ پرەزيدەنتى:

- مەن قازاق ءتىلىن بىلمەسەم دە ساباق بەرۋگە تىرىسىپ ءجۇرمىن. ءبىزدىڭ قازاقستاننان كەلگەن دوسىمىز بار، بىزگە سوزدەردى سول جازىپ بەرەدى. سودان كەيىن سەيسەنبى سايىن باس قوسىپ، ونى قايتالاپ، وقىپ ۇيرەنەمىز.

ەميليا ليپكا- ميحاليك «پولشاداعى ديماش قۇدايبەرگەن جانكۇيەر كلۋبى» قاۋىمداستىعىنىڭ مۇشەسى:

- ديماشتى ەستىگەندە، مەن ونىڭ داۋىسىنا بىردەن عاشىق بولدىم. ونىڭ ارقاسىندا مەن قازاقستان تۋرالى ءبىلدىم. ءسىزدىڭ ەلىڭىزگە ارنايى بارىپ، ديماشتىڭ كونسەرتىنە قاتىسقىم كەلەدى. بۇل ارمانىمدى مىندەتتى تۇردە ورىندايمىن. ءبىزدىڭ سۇيىكتى ديماش - الەم ءانشىسى. «ديماش» راديوستانسياسىنىڭ اشىلعانىنا بيىل 3 جىل. وسى ۋاقىت ارالىعىندا ارنا ءوز تىڭدارمانىن الەمنىڭ ءار كونتينەنتىنەن تاپتى. اسىرەسە ەۋروپا، كانادا جانە ا ق ش تۇرعىندارىنىڭ قىزىعۋشىلىعى جوعارى.

ۆارشاۆاداعى ديماشتىڭ جانكۇيەرلەرى كونسەرتتە كەزدەسىپ قانا قويماي، جاز سايىن سلەت ۇيىمداستىرادى. بيىل دا، شىلدە ايىندا باس قوسپاق. ال ديماش راديوسى توقتاۋسىز جۇمىس ىستەي بەرمەك.

سىمبات عالىمجان قىزى، شولپان نايمانبايەۆا، ميلوسلاۆ لاۆرينوۆسكي

www.24.kz


سوڭعى جاڭالىقتار