قازاقستانعا مەملەكەتتىك ساپارمەن گەرمانيانىڭ فەدەرالدى پرەزيدەنتى فرانك- ۆالتەر شتاينمايەر كەلدى
استانا. قازاقپارات - مەملەكەت باسشىسى قاسىم-جومارت توقايەۆتىڭ شاقىرۋىمەن قازاقستانعا گەرمانيانىڭ فەدەرالدى پرەزيدەنتى فرانك- ۆالتەر شتاينمايەر مەملەكەتتىك ساپارمەن كەلدى.
اسا مارتەبەلى مەيماندى استانا اۋەجايىندا ق ر پرەمەر-ءمينيسترى ءاليحان سمايىلوۆ قارسى الدى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.
ساپار اياسىندا ەكى مەملەكەت باسشىلارى قازاقستان- گەرمانيا ستراتەگيالىق سەرىكتەستىگىن نىعايتۋ ماسەلەلەرى بويىنشا كەلىسسوز جۇرگىزىپ، ونىڭ قورىتىندىسى بويىنشا ءبىرقاتار ەكىجاقتى قۇجاتتارعا قول قويادى دەپ جوسپارلانعان.
سونىمەن قاتار گەرمانيا فەدەرالدى پرەزيدەنتى قازاقستان جانە گەرمانيا ۋنيۆەرسيتەتتەرى رەكتورلارىنىڭ فورۋمىندا ءسوز سويلەپ، قازاقستان پرەزيدەنتىمەن بىرگە قازاق- گەرمان بيزنەس فورۋمىنا قاتىسادى دەپ كۇتىلۋدە.
بۇدان بولەك، مەملەكەتتىك ساپار اياسىندا فرانك- ۆالتەر شتاينمايەر ماڭعىستاۋ وبلىسىنا بارادى. وندا قازاقستان- گەرمانيا ينجەنەرلىك ينستيتۋتىنىڭ اشىلۋىنا جانە Svevind شۆەد-گەرمان كومپانياسىنىڭ جاسىل سۋتەگى وندىرەتىن زاۋىتىندا سىناما بۇرعىلاۋ جۇمىستارىن ىسكە قوسۋ راسىمىنە قاتىسادى.
