استانا كوشەلەرىن ءتۇتىن باستى - دارىگەرلەر كوشەگە شىقپاۋعا شاقىردى

استانا. قازاقپارات - ەلوردا اكىمدىگى قۇرعاق ءشوپتىڭ ورتەنۋىنە بايلانىستى تۇرعىندارعا كوشەگە شىقپاۋعا كەڭەس بەرۋدە، دەپ حابارلايدى قازاقپارات.

«قورعالجىن تاس جولى مەن قوسشى قالاسىنىڭ اينالما جولىندا قۇرعاق ءشوپ ورتەنىپ جاتىر. وسىعان بايلانىستى قالانىڭ قوعامدىق دەنساۋلىق ساقتاۋ باسقارماسى تۇرعىنداردى كوشەگە ەش سەبەپسىز شىقپاۋعا، پاتەردىڭ تەرەزەلەرىن اشپاۋعا، كوشەدە بەتپەردە تاعىپ جۇرۋگە شاقىرادى. بۇل ۇسىنىستار ەڭ الدىمەن تىنىس الۋ ورگاندارىنىڭ اۋرۋلارى بار ادامدارعا قاتىستى»، - دەپ جازىلعان اكىمدىك حابارلاماسىندا.

قازىرگى ۋاقىتتا ءورت سوندىرۋشىلەر الدىن الا بولجام بويىنشا 15 گەكتار اۋماقتا ءورتتى ءسوندىرۋ جۇمىسىن جۇرگىزۋدە. ول ءۇشىن جەكە قۇرامنىڭ 140 ادامى جانە 40 قا جۋىق تەحنيكا جۇمىلدىرىلعان.

بۇعان دەيىن قورعالجىن تاسى جولى مەن قوسشى قالاسىنا قاراي اينالما جولدىڭ اراسىندا قۋراعان اعاشتىڭ ورتەنىپ جاتقانىن حابارلاعان ەدىك.