ەگيپەتتە جىگىتتى جەپ قويعان اكۋلانى سويعان دارىگەرلەر قورقىنىشتى مالىمەتتەردى ايتتى

None
استانا. قازاقپارات - 23 جاستاعى رەسەي ازاماتى ۆلاديمير پوپوۆ 8- ماۋسىمدا ەگيپەتتىڭ حۋرگادا قالاسىندا جولبارىس اكۋلاسىنىڭ شابۋىلىنان قايتىس بولدى.

قازىر ونىڭ دەنەسى ءمايىتحانادا - سوت-مەديتسينالىق ساراپشىلار جىگىت ءولىمىنىڭ جان تۇرشىگەرلىك جاي-جاپسارىن ايتىپ بەردى.

بۇل تۋرالى Jauns حابارلادى.

قايعىلى وقيعادان ءبىر تاۋلىك وتكەن سوڭ جەرگىلىكتى بالىقشىلار جىرتقىشتى تورمەن ۇستاپ العانى حابارلاندى. اكۋلا ىشىنەن ۆلاديميردىڭ باسى مەن قولى تابىلعان. مەديتسينالىق ساراپشى ەر ادامنىڭ ءمايىتحاناعا دەنەسىنىڭ جارتىسى كەلگەنىن ايتتى.

«قىزىل تەڭىزدەگى دەنساۋلىق ساقتاۋ باسقارماسى تىركەگەن مالىمەتتەرگە سايكەس، ءمايىت حۋرگاداداعى جالپى اۋرۋحانانىڭ ءمايىتحاناسىنا دەنەنىڭ بولشەكتەنىپ، بەت-الپەتى ادام تانىماستاي بۇزىلىپ كەلگەنىن حابارلاعان. ونى انىقتاۋ ءتىپتى قيىن. ال باسى تولىعىمەن مىجىلعان»، - دەپ ءتۇسىندىردى دارىگەرلەر.

قازىر ءمايىت پروكۋراتۋرا مەن سوت-مەديتسينالىق ساراپتامانىڭ قاراۋىندا، تەرگەۋ اياسىندا ساراپتاما جۇرگىزىپ جاتىر. قايعىلى وقيعاعا كۋا بولعان ۆلاديمير پوپوۆتىڭ اكەسى ءالى كۇنگە دەيىن دەنەنى الا الماي ءجۇر. ول ۇلىن كرەماتسيالاپ، كەيىن تۋعان جەرىندە جەرلەۋ ءۇشىن تاسىمالداۋدى جوسپارلاپ وتىر.

«مارقۇمنىڭ دەنەسى تەرگەۋ بارىسىنا قىزمەت ەتەتىن پروتسەدۋرالاردى اياقتامايىنشا ونىڭ وتباسىنا بەرىلمەيدى»، - دەدى تۋرپروم اۋرۋحاناسىنىڭ وكىلى.

ەمحاناداعى دەرەككوز اكۋلا مارقۇمنىڭ دەنەسىن بولشەكتەپ، ىشكى اعزاسى مەن قولىن، باسىن جۇتقانىن ايتتى.

8- ماۋسىمدا مىسىرداعى تانىمال دەمالىس ورنىندا جولبارىس اكۋلاسى 23 جاستاعى بالانى اكەسىنىڭ كوزىنشە جەپ قويعانى بەلگىلى بولدى. قايعىلى وقيعانىڭ ۆيدەوسى سول كۇنى جەلىدە تاراپ كەتتى. جىرتقىش ۇستالعان ءساتى دە ۆيدەودا تارالدى.


سوڭعى جاڭالىقتار