مەنشىگىندە بىرنەشە پاتەرى بار ازاماتتاردىڭ مۇلىك سالىعى ارتادى

استانا. قازاقپارات - بىرنەشە پاتەرى بار ازاماتتارعا سالىق يەلىگىندەگى جىلجىمايتىن مۇلىكتىڭ جيىنتىق قۇنىنان ەسەپتەلۋى مۇمكىن.

بۇل تۋرالى ۇلتتىق ەكونوميكا ءمينيسترى ازامات ءامرين سەناتتا وتكەن دوڭگەلەك ۇستەلدە ايتتى، دەپ حابارلايدى قازاقپارات ءتىلشىسى.

«سالىق ساياساتىنىڭ وزەكتى ماسەلەلەرى جانە سالىقتىق اكىمشىلەندىرۋدى جەتىلدىرۋ» تاقىرىبىندا وتكەن جيىندا ۇ ە م وكىلى ءسان- سالتانات سالىعىن جاڭاشا ەسەپتەۋ جولدارى قالاي ىسكە اساتىنىن ءتۇسىندىردى.

«قازىر ءبىز ءسان- سالتانات سالىعىن ارتتىرۋ باعىتىندا جۇمىس ىستەپ جاتىرمىز. پرەزيدەنت بەرگەن تاپسىرمانىڭ ءبىرى وسى بولاتىن. ياعني، بۇل جەردە جەكە ءبىر سالىقتىڭ ءتۇرى تۋرالى ايتىپ وتىرعان جوقپىز. تاۋارلاردىڭ جەكە ساناتىنا قوسىمشا سالىق ەسەپتەلەدى دەگەن ءسوز. اكتسيزدەر ارقىلى، مۇلىككە سالىق ارقىلى الىنادى. ءبىز بۇل جەردە نە ۇسىنىپ وتىرمىز؟

قازىر بىزدە جەكە تۇلعالاردىڭ مۇلكىنە سالىناتىن سالىقتىڭ ونسىز دا پروگرەسسيۆتى شكالاسى بار. ياعني، مۇلىكتىڭ قۇنى نەعۇرلىم جوعارى بولسا، سالىق مولشەرلەمەسى دە سوعۇرلىم جوعارى بولادى - 0,01 پايىزدان 1,5 پايىزعا دەيىن»، - دەگەن ءمينيستردىڭ ورىنباسارى مەنشىگشىگىندە بىرنەشە جىلجىمايتىن مۇلكى بار ادامعا جاڭا شكالا قالاي اسەر ەتەتىنىن ءتۇسىندىردى.

«مىسالى، 10 بىردەي پاتەرى بار مەنشىك يەلەرى بار. ولاردىڭ يەلىگىندەگى ءار پاتەردى جەكە الىپ ەسەپتەسە، سالىق مولشەرلەمەسى ءار پاتەر ءۇشىن جەكە ەسەپتەلەدى. 1 بولمەلى پاتەرىنىڭ قۇنى 20 ملن تەڭگە بولسا، سالىق مولشەرلەمەسى باسقاشا بولادى. ال ەگەر 10 پاتەردىڭ قۇنىن قوسىپ ەسەپتەسەك، 200 ميلليون تەڭگە بولادى. سايكەسىنشە 200 ميلليون تەڭگەگە سالىناتىن سالىق مولشەرلەمەسى دە جوعارى بولۋى كەرەك. سوندىقتان وسىنداي ساناتتار ءۇشىن مۇلىك سالىعى جيىنتىق قۇنىنا بايلانىستى ەسەپتەلۋى كەرەك. تيىسىنشە سالىق مولشەرلەمەسى دە جوعارى بولادى»، - دەدى ۆيتسە- مينيستر.