استانادا ءوتىپ جاتقان مەندەلەيەۆ وليمپياداسىنىڭ جەڭىمپازىنا قانشا سىياقى بەرىلەدى
وسىمەن 57- رەت ءوتىپ جاتقان حالىقارالىق ءبىلىم سايىسىنا بۇل جولى لاتۆيا، ازەربايجان، بولگاريا، برازيليا، قىرعىزستان، ماكەدونيا، رەسەي، ساۋد ارابياسى، تۇركىمەنستان، تۇركيا، ارمەنيا، بەلارۋس، ماجارستان، يزرايل، موڭعوليا، بىرىككەن اراب امىرلىكتەرى، سيريا، تاجىكستان، حورۆاتيا، وزبەكستان، قازاقستان سياقتى 21 ەلدەن 116 وقۋشى قاتىسۋدا.
ءبىلىم سايىسى قازاقستاننىڭ وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگىنىڭ، رەسەي تاراپىنان م. ۆ. لومونوسوۆ اتىنداعى ممۋ حيميا فاكۋلتەتى مەن اندرەي مەلنيچەنكو قورىنىڭ ۇيىمداستىرۋىمەن ءوتىپ جاتىر.
وليمپيادانىڭ اشىلۋ سالتاناتىندا ءسوز العان وقۋ- اعارتۋ ۆيتسە-ءمينيسترى شولپان قارينوۆا ءبىلىم بايقاۋىنىڭ قازاقستان حالقىنىڭ بىرلىگى كۇنىمەن قاتار كەلگەنىن اتاپ ءوتتى.
«پرەزيدەنتىمىز قاسىم-جومارت توقايەۆ بالالاردىڭ دامۋىنا، دارىندىلاردى قولداۋعا ۇلكەن كوڭىل ءبولىپ، عىلىم مەن ءبىلىمنىڭ مادەنيەتتىڭ دامۋىنا قاجەتتى جاعدايدىڭ ءبارىن جاساپ وتىر. حالىقارالىق زياتكەرلىك وليمپيادالاردىڭ جەڭىمپازدارى مەن جۇلدەگەرلەرى ءبىزدىڭ ەلدە 5 ميلليون تەڭگە كولەمىندە سىياقى الادى جانە ەلدەگى ۇزدىك جوعارى وقۋ ورىندارىندا كونكۋرسسىز- اق، اقىسىز ءبىلىم الۋعا مۇمكىندىك الادى»، - دەدى ۆيتسە-مينيستر.
ۇيىمداستىرۋ كوميتەتىنىڭ ءتوراعاسى، رەسەيلىك عالىم ستەپان كالمىكوۆتىڭ ايتۋىنشا، سايىسقا برازيليا كومانداسى العاش رەت قاتىسپاقشى. بۇل - وليمپيادانىڭ 57 جىلدىق تاريحىندا لاتىن امەريكاسىنان قاتىسىپ وتىرعان العاشقى ەل.
«بۇل سايىسقا ءوز ەلدەرىندەگى ۇلتتىق وليمپيادالاردا ۇزدىك تانىلعاندار كەلىپ وتىر. ولميپيادا ءبىر تەوريالىق، ءبىر پراكتيكالىق كەزەڭنەن تۇرادى. تاپسىرمالار جىل سايىن تۇبەگەيلى وزگەرتىلىپ وتىرادى. ياعني، الدىڭعى جىلدارى كەلگەن تاپسىرمالارعا قاراپ، بيىل قانداي تاپسىرما بولاتىنىن انىقتاۋ مۇمكىن ەمەس. بۇل وتە ماڭىزدى. ويتكەنى وقۋشىلار زاماناۋي حيميانىڭ ماتەريالىن كەڭىنەن مەڭگەرگەن بولۋى كەرەك.
21 ەلدىڭ ءبىلىم بەرۋ جۇيەسى، باعدارلاماسى ءار ءتۇرلى ەكەنى تۇسىنىكتى. ءبىراق بۇل بالالاردىڭ ءبارى شەتىنەن قابىلەتتى، تالانتتى. ءار ەلدەگى وقۋشىلاردىڭ 2-3 پايىزى دارىندى دەپ الساق، بۇلار سولاردىڭ ىشىندەگى تاڭداۋلىلار. مۇنداعى تاپسىرمالار مەكتەپ باعدارلاماسىنىڭ اياسىنا سىيماۋى دا مۇمكىن. ياعني، حيميالىق پروتسەستەردى قانشالىقتى تەرەڭ تۇسىنگەنىن انىقتاۋ باعىتىندا مەكتەپ باعدارلاماسىنان سالماقتى تاپسىرمالار بەرىلۋى مۇمكىن. ويتكەنى مەكتەپتە زاماناۋي حيميانىڭ بازالىق ماتەريالى وقىتىلادى. بۇلار سول بازالىق ءبىلىمدى تەرەڭدەتىپ مەڭگەرگەن وقۋشىلار. تاپسىرمالاردى حالىقارالىق ارىپتەستەرىمىزبەن بىرلەسىپ دايىندادىق. وليمپياداعا قاتىسۋشىلاردىڭ ءبىلىمىن باعالايتىن قازىلار القاسىندا دا حالىقارالىق ارىپتەستەرىمىز بار»، - دەدى ستەپان كالمىكوۆ.
قازاقستان اتىنان بۇل وليمپياداعى 15 ۇمىتكەر قاتىسىپ جاتىر. وليمپيادانىڭ قورىتىندىسى 6- مامىردا بەلگىلى بولادى. وليمپيادانىڭ قولا، كۇمىس، التىن مەدالدەرىنەن بولەك ءابسوليۋتتى جەڭىمپازعا بەرىلەتىن اكادەميك ۆ. ۆ. لۋنين اتىنداعى سىياقىسى بار. اندرەي مەلنيچەنكو اتىنداعى قور تاعايىنداعان سىياقىنىڭ مولشەرى - 2 ميلليون رەسەي رۋبلى (شامامەن 11 ميلليون 260 مىڭ تەڭگە - رەد).
