قازاقستان اۋعانستانمەن ىنتىماقتاستىعىن ارتتىرادى

استانا. قازاقپارات - ەلىمىزدىڭ اۋعانستانمەن ساۋدا قارىم-قاتىناسىنداعى باسىم ونىمدەر اتالدى. اتالعان ەلمەن ساۋدا ىنتىماقتاستىعى ارتا تۇسپەك.

بۇل تۋرالى پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ءمالىم ەتتى، دەپ حابارلايدى قازاقپارات ءتىلشىسى.

«ءبىز اۋعانستانمەن ىنتىماقتاسامىز، ساۋدانى دامىتامىز. ەكىجاقتى ساۋدا 1 ميلليارد دوللاردى قۇرايدى. بۇل ازەربايجانمەن، تۇركىمەنستانمەن جاسالعان ساۋدامەن سالىستىرعاندا ايتارلىقتاي كوپ. وسى ورايدا ساۋدا ىنتىماقتاستىعىن ودان ءارى ارتتىرامىز. اۋعانستانمەن ەكىجاقتى ساۋدادا بيداي، ۇن، كۇنباعىس مايى باسىمدىققا يە. نەلىكتەن بۇل مۇمكىندىكتەن باس تارتۋىمىز كەرەك؟ بۇل، سايىپ كەلگەندە، ءبىزدىڭ مەملەكەتىمىزگە پايدا اكەلەدى»، - دەدى سەرىك جۇمانعارين ۇكىمەت وتىرىسىنان كەيىن ب ا ق وكىلدەرىنىڭ ساۋالىنا بەرگەن جاۋابىندا.

سونداي-اق، مينيستر اۋعانستاندا ساۋدا ءۇيى اشىلىپ، وعان ارنايى وكىل تاعايىندالعانىن ايتتى.

«رەسمي وكىل جۇمىستى ۇيلەستىرۋگە جاۋاپتى، ويتكەنى اۋعانستاننىڭ اۋماعى ۇلكەن ءارى ءارتۇرلى. ەندى ەكىجاقتى ساۋدانى دامىتۋدا نارىقتى زەردەلەپ، جەرگىلىكتى كاسىپكەرلەرمەن تانىسۋ قاجەت. اۋعان كاسىپكەرلەرىن وسىندا شاقىرىپ، بيزنەس-فورۋم وتكىزگىم كەلەدى. ولارعا ءبىزدىڭ مۇمكىندىكتەرىمىزدى كورسەتكەن ءجون»، - دەيدى ول.

قازاقستان اۋعانستاننىڭ گەرات قالاسىندا ساۋدا ءۇيىن اشاتىنىن حابارلاعان ەدىك.