دەنساۋلىق ساقتاۋ سالاسىندا بىركەلكى اقپاراتتىق جۇيە جوق - اسحات ايماعامبەتوۆ

استانا. قازاقپارات - مىندەتتى الەۋمەتتىك مەديتسينالىق جۇيەسىن قارجىلاندىرۋ ءادىسىن وزگەرتۋ قاجەت.

بۇل ۇسىنىستى ق ر پارلامەنتى ءماجىلىسىنىڭ الەۋمەتتىك- مادەني دامۋ كوميتەتىنىڭ ءتوراعاسى اسحات ايماعامبەتوۆ «Jibek Joly» تەلەارناسىنىڭ كوشپەلى ستۋدياسىنا بەرگەن سۇحباتىندا ايتتى، دەپ حابارلايدى قازاقپارات ءتىلشىسى.

«ءبىز مىندەتتى الەۋمەتتىك مەديتسينالىق ساقتاندىرۋ جۇيەسىن سىناپ وتىرعان جوقپىز. ونىڭ جۇمىسىن جەتىلدىرۋ باعىتىندا ناقتى ۇسىنىستار ءبىلدىرىپ وتىرمىز. ازاماتتارىمىز م ءا م س ارقىلى اۋرۋحاناعا بارسا، «قازىر مۇمكىندىك جوق، 1 ايدان كەيىن كەل، 3 ايدان كەيىن كەل» دەپ شىعارىپ سالادى. ال ەگەر پاتسيەنت اقىلى وتەم دەسە شارۋا تەز شەشىلەدى. بۇل ادىلەتسىزدىك. بۇل جەردە ماسەلە اۋرۋحاناعا نەمەسە دارىگەرگە قاتىستى ەمەس. جۇيەنى قارجىلاندىرۋعا بايلانىستى. مىسالى، قارجىنى 5 ناۋقاسقا عانا بولەدى، اۋرۋحاناعا ودان كوپ 10-15 پاتسيەنت كەلسە، ولاردى كەلەسى ايعا جازىپ قويادى. سالدارىنان كەزەك پايدا بولادى»، - دەدى اسحات ايماعامبەتوۆ سۇحبات بارىسىندا.

حالىق قالاۋلىسىنىڭ ايتۋىنشا، م ءا م س جۇيەسىن قارجىلاندىرۋ ءتاسىلىن اۋىستىرۋ قاجەت.

«كەلەسى ماسەلە - دارىگەرلەر جۇكتەمەسى شامادان تىس. ولار پاتسيەنتتى قابىلداعان ۋاقىتتا كومپيۋتەرگە ءۇڭىلىپ وتىرادى، ءسويتىپ وتىرعاندا ناۋقاستى قاراۋعا ۋاقىتى بولمايدى. سوسىن دارىگەردىڭ ۇستىنەن دۇرىس قارامادى دەگەن شاعىم ءتۇسۋى مۇمكىن. بۇل جەردە دارىگەردىڭ كىناسى جوق، ماسەلە جۇيەگە بايلانىستى. بىزدە دەنساۋلىق ساقتاۋ سالاسىندا بىركەلكى اقپاراتتىق جۇيە ءالى دە جوق. 30-40 جۇيە بار، دارىگەر ونىڭ ءارقايسىسىن اشىپ، پاتسيەنت تۋرالى مالىمەتتەردى ەنگىزىپ وتىرعاندا ۋاقىتى ءوتىپ كەتەدى»، - دەيدى ول.