الماتىدا يممۋنداۋ اپتالىعى باستالادى
يممۋنداۋ اپتالىعىنىڭ ماقساتى - تۇرعىنداردى ۆاكسيناتسيامەن قامتۋ دەڭگەيىن ارتتىرۋ، حالىققا ءاربىر بالانىڭ ەكپەمەن الدىن الاتىن اۋرۋلاردان قورعالۋى قاجەت ەكەنىن ءتۇسىندىرۋ.
«ۆاكسينوپروفيلاكتيكا - مەديتسينانىڭ ەڭ ۇلكەن جەتىستىگى جانە قازاقستاندا عانا ەمەس، بۇكىل الەمدە قوعامدىق دەنساۋلىق ساقتاۋدىڭ ەكونوميكالىق ءتيىمدى شاراسى. ۆاكسيناتسيا - حالىقتى جۇقپالى اۋرۋلاردىڭ پايدا بولۋى مەن تارالۋىنان قورعاۋدىڭ ەڭ ءتيىمدى قۇرالدارىنىڭ، سونىمەن قاتار ەڭ ءقاۋىپسىز مەديتسينالىق ارالاسۋلاردىڭ ءبىرى. ۇلتتىق ەگۋ كۇنتىزبەسىنە سايكەس جوسپارلى تۇردە تۋبەركۋلەزگە، ۆ ۆيرۋستىق گەپاتيتىنە، پوليوميەليتكە، كوكجوتەلگە، سىرەسپە ديفتەرياسىنا، قىزىلشاعا، قىزامىققا، ەپيدەميالىق پاروتيتكە، گەموفيلدى جانە پنيەۆموكوككتى ينفەكسياعا قارسى ۆاكسيناتسيا جۇرگىزىلەدى»، - دەدى الماتى قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى.
ونىڭ ايتۋىنشا، بۇگىندە ۆاكسينالاردىڭ ەكىدەن التىعا دەيىنگى كومپونەنتتەرىن ءبىر دوزادا بىرىكتىرۋگە مۇمكىندىك بەرەتىن، ينەكسيالاردىڭ سانىن ازايتاتىن ۆاكسينالار بار. ءبىزدىڭ ەلدە قولدانىلاتىن بارلىق ۆاكسينالاردى ددۇ پايدالانۋعا ۇسىنعان جانە قازاقستاندا تىركەلگەن.
«رەسپۋبليكا اۋماعىندا قولدانىلاتىن ۆاكسينالار ءقاۋىپسىز جانە تيىمدىلىگى جوعارى»، - دەدى ول.
سونىمەن قاتار، ول كوپتەگەن اتا-انا پروفيلاكتيكالىق ۆاكسينانى بالالارىنا ەگۋدەن باس تارتاتىنىن تىلگە تيەك ەتتى.
«بۇل رەتتە ءارتۇرلى الەۋمەتتىك جەلىدە تارالاتىن بۇرمالانعان، دۇرىس ەمەس اقپارات كەرى اسەر ەتەدى. بالاسىنا ۆاكسينا سالعىزۋدان باس تارتقان اتا- انالار تەك وزدەرىنە عانا ەمەس، باسقا بالالارعا دا جۇقتىرۋ قاۋپىن تۋدىرادى»، - دەدى ول.
الماتى قالاسىندا ەۋروپالىق يممۋنداۋ اپتالىعىن وتكىزۋ كەزەڭىندە ۆاكسيناتسيا تۇرعىلىقتى جەرى بويىنشا ەمحانالاردا تەگىن جۇرگىزىلەدى. قالا ەمحانالارى ۆاكسيناتسيا ماسەلەلەرى بويىنشا حالىققا كونسۋلتاتسيالىق كومەك كورسەتۋگە، ۆاكسيناتسيا تۋرالى دەرەكتەرسىز باسقا وڭىرلەردەن كەلگەن نەمەسە ەكپە الماعان بالالاردى ەگۋگە دايىن.
