دەنساۋلىق ساقتاۋ جۇيەسىندە شەشىمىن تاپپاعان ماسەلە وتە كوپ - مەملەكەت باسشىسى
بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ۇلتتىڭ دەنى ساۋ جانە ساۋاتتى بولۋى - وتە ماڭىزدى ماسەلە. وسىنى ەسكەرمەسەك، ەكونوميكانى رەفورمالاۋ بوس اۋرەشىلىك بولادى. بۇل - مەملەكەتتىڭ مىندەتى. ەڭ الدىمەن، ادامدارعا ساپالى مەديتسينا قولجەتىمدى بولۋى قاجەت. دەنساۋلىق ساقتاۋ جۇيەسىندە شەشىمىن تاپپاعان ماسەلە وتە كوپ. مىندەتتى الەۋمەتتىك مەديتسينالىق ساقتاندىرۋ جۇيەسى وسى سالانى دامىتۋعا تىڭ سەرپىن بەرەدى دەپ ۇمىتتەنەمىز. الايدا، بۇل جۇيەدەگى قارجى اينالىمىنا باقىلاۋ جاسالمايدى»، - دەدى قاسىم-جومارت توقايەۆ.
مەملەكەت باسشىسى اقپاراتتاندىرۋدىڭ تومەن دەڭگەيدە بولۋى مەديتسينا قىزمەتكەرلەرىنە جۇكتەمەنى ايتارلىقتاي ارتتىرعانىنا باسا نازار اۋداردى.
«مەديتسينالىق ساقتاندىرۋ قورىنىڭ وڭىرلىك كوميسسيالارىنىڭ قىزمەتى اشىق ەمەس. بۇل دەنساۋلىق ساقتاۋ شىعىستارىنىڭ ارتىرۋىنا الىپ كەلەدى. مەديتسينالىق كومەكتى باقىلاۋسىز پايدالانۋ اياسىندا قىمبات دياگنوستيكالىق قىزمەتتەرى سانى 11 ەسە ارتقان»، - دەدى پرەزيدەنت.
