پامير ۇستىرتىندەگى قوداس مىنگەن كوكپارشىلار - شەتەلدەگى قازاق باسپا ءسوزى
پامير ۇستىرتىندەگى قوداس مىنگەن كوكپارشىلار - «حالىق» گازەتى
شىنجاڭنىڭ تاشقۇرعان تاجىك اۆتونوميالىق اۋدانى پامير ءۇستىرتىنىڭ شىعىس ەتەگىندە ورنالاسقان. ونىڭ تەڭىز دەڭگەيىنەن ورتاشا بيىكتىگى 4000 مەتردەن اسادى. قوداس - تاشقۇرعان اۋدانىنىڭ فەرمەرلەرى مەن مالشىلارى وسىرەتىن نەگىزگى مال تۇرلەرىنىڭ ءبىرى جانە جەرگىلىكتى حالىقتىڭ تۇرمىسىمەن ەتەنە بايلانىستى جانۋار، - دەپ جازادى قىتايدىڭ «حالىق» گازەتى اقپاراتتىق پورتالى.
قىتايلىق ب ا ق كەلتىرگەن مالىمەتىنە سۇيەنسەك، قوداسپەن كوكپار تارتۋ - تاشقۇرعان اۋدانىندا كەڭ تارالعان ءداستۇرلى حالىقتىق سپورت ءتۇرى.
كەيىنگى جىلدارى بۇل ەرەكشە ءداستۇرلى سپورتتىق ءىس-شارا تاشقۇرعان اۋدانى تۋريستىك يندۋسترياسىنىڭ دامۋىمەن بىرگە، ساياحاتشىلار اراسىندا تانىمال بولا باستاپتى.
تاشقۇرعاندىقتار توي-تومالاقتا قوداسپەن كوكپار تارتىپ، مەرەكەنىڭ كوركىن قىزدىرادى. قازىرگى ۋاقىتتا كوكپارشىلار تۋريستەرگە وسى ەرەكشە سپورت ءتۇرىن تانىستىرۋ ءۇشىن اۋداننىڭ مادەني تۋريزم مەكەمەسى ۇيىمداستىراتىن اۋقىمدى ءىس- شارالارعا قاتىسىپ ءجۇر.
قىتايلىق باسىلىمنىڭ دەرەگىنشە، سپورتتىڭ بۇل ءتۇرى 2009 -جىلى شىنجاڭ-ۇيعىر اۆتونوميالىق ولكەسىنىڭ ماتەريالدىق ەمەس مادەني مۇرالارى تىزىمىنە ەنگىزىلگەن.
قاينار قايساناي ۇلى حالىقارالىق دارەجەدەگى تورەشى اتاندى - «Kaznews»
2023 -جىلعى اقپان ايىندا موڭعوليا استاناسى ۇلانباتىر قالاسىندا بوكستان جاتتىقتىرۋشىلار مەن تورەشىلەرگە ارنالعان سەمينار ءوتىپ، وندا موڭعوليالىق ماماندار دا ءبىلىمىن تولىقتىرعان، دەپ حابارلايدى موڭعوليالىق «Kaznews» اقپاراتتىق پورتالى.
اتالعان اقپارات كوزىنىڭ دەرەگىنشە، حالىقارالىق بوكس فەدەراتسياسى (IBA) ۇيىمداستىرعان سەمينار قورىتىندىسى بويىنشا 16 موڭعوليالىق مامان حالىقارالىق دارەجەدەگى «1-جۇلدىزدى تورەشى» اتاعىنا يە بولدى. ولاردىڭ اراسىندا بايان- ولگيي ايماعىنىڭ سپورت جانە دەنەشىنىقتىرۋ باسقارماسىنىڭ باسشىسى، بوكستان سپورت شەبەرى قاينار قايساناي ۇلى بار.
ايتا كەتۋ كەرەك، قاينار قايساناي ۇلى باسقارما باسشىسى قىزمەتىنەن بۇرىن بوكستا باپكەرلىكپەن اينالىسىپ، ءوز ايماعىنان كوپتەگەن شاكىرتتەر دايىنداپ شىعارعان.
سونىمەن قاتار، وسى اپتادا «Kaznews» اقپاراتتىق پورتالىندا «سەرىكبول سەزحان ۇلى كاراتەدەن ەل چەمپيونى اتاندى» دەگەن تاقىرىپتاعى اقپارات جارىق كوردى.
موڭعوليالىق ب ا ق-تىڭ دەرەگىنشە، 8-ءساۋىر كۇنى ۇلانباتىر قالاسىندا كاراتەدەن ەل چەمپيوناتى وتكەن. بايراقتى باسەكەدە بايان-ولگي ايماعىنىڭ ابىرويىن قورعاپ، سەرىكبول سەزحان ۇلى -65 كەلى سالماقتا چەمپيون اتاندى.
ەل چەمپيوناتىندا بارلىعى 42 مەدال ساراپقا سالىنىپ، 14 كلۋبتان 120 سپورتشى كۋميتە جانە كاتانا بويىنشا باق سىناستى.
«بايان- ولگي ايماعى «تارلان» كلۋبىنىڭ باپكەرى، Ⅱ دارەجەلى قارا بەلبەۋ يەگەرى، حالىقارالىق سپورت شەبەرى سەرىكبول سەزحان ۇلى بۇل جولى كاراتەدەن بارلىق قارسىلاستارىن ۇتىپ، -65 كەلى سالماقتا ەل چەمپيونى اتاندى»، - دەپ جازادى «Kaznews».
اقىن نەسىپبەك ايت ۇلى «ناۋاي قالاسىنىڭ قۇرمەتتى ازاماتى» اتاندى - «ءوز ا»
الىشەر ناۋايدىڭ «ەسكەندىر قورعانى» جانە «ءلايلى- ءماجنۇن» داستاندارىن قازاق تىلىنە اۋدارعان اقىن، اۋدارماشى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى نەسىپبەك ايت ۇلى وسى جىلدىڭ 29-30-ناۋرىز كۇندەرى ناۋاي قالاسىندا وتكەن حالىقارالىق «مۋمتوز شەريات» ادەبيەت فەستيۆالىنە قاتىستى، دەپ حابارلايدى «ءوز ا» اقپاراتتىق اگەنتتىگى.
اتالعان باسىلىمنىڭ دەرەگىنشە، وسىناۋ حالىقارالىق شارادا نەسىپبەك ايت ۇلىنا «ناۋاي قالاسىنىڭ قۇرمەتتى ازاماتى» اتاعى بەرىلىپ، وزبەكستان جازۋشىلار وداعىنىڭ مۇشەلىگىنە قابىلداندى. سونداي- اق، قازاقستاندىق اقىنعا ءتيىستى كۋالىكپەن بىرگە، باعالى سىيلىقتار دا تابىس ەتىلدى. اقىن فەستيۆال قاتىسۋشىلارىنا «الىشەر ناۋاي جانە قازاق ادەبيەتى» تاقىرىبىندا بايانداماسىن دايىنداپ بارعان.
«الايدا، فەستيۆال اياسىندا كوپتەگەن شارا جوسپارلانىپ، قاتىسۋشىلاردىڭ ۋاقىتى تىعىز بولعانى ءۇشىن ناۋايعا ارناپ جازعان كەرەمەت ولەڭىن وقۋمەن شەكتەلۋىنە تۋرا كەلگەن. دەگەنمەن، حالىقارالىق فەستيۆالگە قوناقكادە جاساعان نەسىپبەك ايت ۇلىمەن ناۋاي قالاسىنان ەلوردامىز تاشكەنت قالاسىنا قايتار شاقتا وسى شارادا ايتپاق بولعان پىكىرلەرى جايلى سۇحبات قۇرۋدىڭ ءساتى ءتۇستى»، - دەپ جازادى وزبەكستاندىق باسىلىم. وسى اپتادا سۇحباتتى «ءوز ا» اقپاراتتىق اگەنتتىگى وقىرماندارىنا ۇسىندى.
قازاقستان يرانمەن استىق ەكسپورتتاۋ تەرمينالىن سالۋ بويىنشا كەڭەسۋدى جالعاستىردى - «Parstoday»
قازاقستان پارسى شىعاناعى جاعالاۋىندا استىق ەكسپورتتاۋ تەرمينالىن سالۋ ءۇشىن يرانمەن كەڭەسۋدى جالعاستىردى، دەپ حابارلايدى يراندىق «Parstoday» اقپارات اگەنتتىگى.
«Parstoday»-دىڭ دەرەگىنشە، قازاقستاننىڭ يندۋستريا جانە ينفراقۇرىلىمدىق دامۋ ءمينيسترى مارات قارابايەۆ جۇما كۇنى قازاقستاندىق كومپانيالاردىڭ يرانداعى پارسى شىعاناعى جاعالاۋىندا ەكسپورتتىق پوليۋس سالۋ جونىندەگى كەلىسسوزدەرىنىڭ جالعاسىپ جاتقانىن حابارلادى. ول استانانىڭ باندار- ابباستا تەرمينال سالۋدى كوزدەپ وتىرعانىنا توقتالىپ، بۇل تەرمينالدىڭ ىسكە قوسىلۋ مەرزىمىن 2025 -جىلى جاريالاپ، تەرمينالدىڭ قۇرىلىسى قازاقستاندىق Semurg Invest كومپانياعا تاپسىرىلعانىن ايتقان.
«قارابايەۆ بۇل باعدارلامانى جۇزەگە اسىرۋ ماقساتىن قازاقستاننان تاۋار شىعارۋدىڭ ءبىر جولى رەتىندە جاريالاپ، كومپانيانىڭ كاسپي تەڭىزىنىڭ شىعىس جاعالاۋىندا «سارجا» كوپ فۋنكسيونالدى تەرمينالىن ورناتۋعا دا اتسالىساتىنىن ايتتى. قازاقستاننىڭ يندۋستريا جانە ينفراقۇرىلىمدىق دامۋ ءمينيسترىنىڭ ايتۋىنشا، جەكە سەكتور يران تەرمينالىنان ەلدىڭ ونىمدەرىن الەمنىڭ تۇكپىر- تۇكپىرىنە جونەلتۋ ماقساتىندا وسى ەلدە ەكسپورتتىق حاب قۇرۋعا تىرىسىپ جاتىر»، - دەپ جازادى يراندىق باسىلىم.
تۇركياعا گۋمانيتارلىق كومەكتى «قازاقستان تەمىر جولى» جەتكىزەدى - TRT
«قازاقستان تەمىر جولى» ۇلتتىق كومپانياسى قىتايدان تۇركياعا جونەلتىلگەن گۋمانيتارلىق جۇكتى پويىزبەن جەتكىزەدى. قازاقستان ارقىلى جەدەل جەتكىزىلىم پرەزيدەنت قاسىم-جومارت توقايەۆتىڭ تاپسىرماسى بويىنشا جۇزەگە اسىرىلادى، دەپ حابارلادى تۇركيا راديو تەلەۆيزيا پورتالى.
پويىز قازاقستان اۋماعىنان رەكوردتىق 90 ساعاتتا ءوتىپ، جۇك ترانسكاسپي حالىقارالىق كولىك باعىتى ارقىلى تۇركياعا جەتكىزىلەدى.
تۇركيالىق باسىلىمنىڭ كەلتىرگەن دەرەگىنە سۇيەنسەك، «قازاقستان تەمىر جولى» ۇلتتىق كومپانياسى جەر سىلكىنىسىنەن زارداپ شەككەندەر ۋاقىتشا پانالاۋى ءۇشىن الدىمەن شاتىرلار جونەلتىلىپ، تۇركياعا 200 كونتەينەر گۋمانيتارلىق جۇك جەتكىزىلەتىنىن حابارلادى.
ايتا كەتەيىك، كومپانيانىڭ جۇك پويىزى قىزمەتى ارقىلى قىتايدان گرۋزيا پورتتارىنا جەتكىزۋ مەرزىمى 18 كۇنگە جانە تۇرىك پورتتارىنا 25 كۇنگە دەيىن قىسقاردى. قازاقستان اۋماعى ارقىلى جۇك كاسپي تەڭىزىنىڭ جاعالاۋىنداعى اقتاۋ پورتىنا، ودان ءارى ازەربايجان مەن گرۋزيا ارقىلى تۇركياعا جونەلتىلەدى.
اۆتورى
بەيسەن سۇلتان ۇلى
