س ق و-دا جەلشەشەك جۇقتىرعاندار سانى ءۇش ەسە ارتتى
س ق و سانيتاريالىق- ەپيدەميولوگيالىق باقىلاۋ دەپارتامەنتىنىڭ مالىمەتىنشە، جەلشەشەكتى جۇقتىرعانداردىڭ شامامەن %90 ى 14 جاسقا دەيىنگى بالا، ولاردىڭ اراسىندا 943 جاعداي تىركەلدى. بىلتىر وسى كەزەڭدە 396 ادام جۇقتىرعان.
ناۋقاستاردىڭ %61 ى پەتروپاۆل تۇرعىندارى.
مامانداردىڭ ايتۋىنشا، جەلشەشەك اۋا تامشىلارى ارقىلى تارالادى.
«جەلشەشەكپەن اۋىراتىن ناۋقاستاردى انىقتاۋدى مەديتسينالىق ۇيىمداردىڭ مەديتسينا قىزمەتكەرلەرى امبۋلاتوريالىق قابىلداۋ، ۇيگە بارۋ، مەديتسينالىق تەكسەرۋلەر كەزىندە جۇرگىزەدى.
مەكتەپكە دەيىنگى ۇيىمداردا جەلشەشەكتى جۇقتىرعان سوڭعى ناۋقاس وقشاۋلانعان ساتتەن باستاپ كۇنتىزبەلىك جيىرما ءبىر كۇنگە كارانتين بەلگىلەنەدى.
كارانتين ەنگىزىلگەن ۇجىمداردا كادىمگى دەزينفەكسيالىق جۇمىستار جۇرگىزىلەدى، كۇن سايىن. بولمەنى جەلدەتىپ وتىرادى. بالالاردىڭ قولدارىن ءجيى جۋىپ، جەكە باس گيگيەناسىن ساقتاۋىن قاداعالاپ وتىرادى»، - دەيدى س ق و سانيتاريالىق- ەپيدەميولوگيالىق باقىلاۋ دەپارتامەنتىنىڭ باس مامانى ايناش ساعىندىقوۆا.
س ق و- دا 21 بالاباقشانىڭ جەكەلەگەن توپتارىندا كارانتين ەنگىزىلدى. ونىڭ 19ى - پەتروپاۆلدا، ءبىر-بىردەن ايىرتاۋ جانە تايىنشا اۋداندارىندا.
