قازاق كوشپەندىلەرىنىڭ مادەنيەتى حورۆاتيادا تانىستىرىلدى - فوتو
قازاقستان ەلشىلىگىنىڭ قولداۋىمەن حورۆاتيادا تۇڭعىش رەت «TURAN» ەتنو-فولكلورلىق انسامبلىنىڭ كونسەرتى ءساتتى ءوتتى. حورۆاتيا رەسپۋبليكاسى پارلامەنتىنىڭ ۆيتسە-سپيكەرى داۆوركو ۆيدوۆيچ ءوزىنىڭ قۇتتىقتاۋ سوزىندە ءوتىپ جاتقان مادەني ءىس-شارانىڭ ماڭىزدىلىعىن اتاپ ءوتتى.
ونىڭ ايتۋىنشا، كونسەرت قازاق حالقىنىڭ باي شىعارماشىلىعىمەن تانىسىپ قانا قويماي، ەلدەر اراسىنداعى دوستىق پەن ءوزارا تۇسىنىستىكتى نىعايتۋعا ۇلەس قوسۋعا مۇمكىندىك بەردى.
توپتىڭ قۋاتتى ەنەرگياسى، كلاسسيكالىق كۇيلەردىڭ ۆيرتۋوزدى ءۇنى، قايتالانباس جانرداعى حالىق شىعارمالارى مەن كومەيمەن ءان سالۋ تەحنيكاسى زالداعى ەشكىمدى بەيجاي قالدىرماي، حورۆاتيا جۇرتشىلىعىنىڭ زور تاڭدانىسىن تۋدىرىپ، قوشەمەتتەرىنە يە بولدى. مۋزىكا سۇيەر قاۋىم قوبىز، سىبىزعى، جەتىگەن، شەرتەر، دومبىرا جانە باسقا دا قازاقتىڭ كونە اسپاپتارىنىڭ سيقىرلى ۇنىنە ءتانتى بولدى.
زاگرەب مۋزىكا اكادەمياسىنىڭ كونسەرت زالىنىڭ ساحناسىندا قازاق كونسەرتتىڭ باسقا سوليستەرى دە تاماشا ونەر كورسەتتى - قازاقستاننىڭ ەڭبەك سىڭىرگەن قايراتكەرى اقتوتى رايىمقۇلوۆا، بەلگىلى تەنور مەدەت شوتابايەۆ، بەلگىلى پيانيست جانە كونسەرتمەيستەر دينا ميرمانوۆا، سونداي-اق ۆيولونچەلشى، شاڭحاي كونسەرۆاتورياسىنىڭ ستۋدەنتى تالعار تولقىن ۇلى. زالعا جينالعان جۇرتشىلىق ارتىستەردىڭ ونەرىن دۋ قول شاپالاقتاۋمەن سۇيەمەلدەدى.
كەشتىڭ ەرەكشە اتموسفەراسىن ەتنو-كورمە بەردى، ونىڭ اياسىندا حورۆاتيا استاناسىنىڭ تۇرعىندارى ءۇشىن العاش رەت كيىز ءۇيدىڭ ءتۇرلى-ءتۇستى ىشكى بەزەندىرىلۋى ۇسىنىلدى. ساندىك- قولدانبالى ونەر نىساندارى، قازاقتىڭ ۇلتتىق كيىمدەرى، فوتوسۋرەتتەر مەن قازاق تاعامدارىنىڭ ءداستۇرلى دەليكاتەستەرى بالقان تۇبەگىندە كوپ عاسىرلىق تاريحى مەن باي مۇراسى بار ۇلى دالانىڭ كوشپەلى حالىقتارىنىڭ مادەنيەتىن پاش ەتتى.
شاراعا قازاقستان ازاماتتارى، حورۆاتيا ۇكىمەتىنىڭ مۇشەلەرى، ەلدىڭ ەكس-پرەزيدەنتتەرى، پارلامەنت دەپۋتاتتارى، ىسكەرلىك، ديپلوماتيالىق، اكادەميالىق جانە شىعارماشىلىق توپتاردىڭ وكىلدەرى قاتىستى. زالدىڭ تولىپ كەتۋىنە بايلانىستى كونسەرتكە كەلە الماعان قوناقتار ءۇشىن «YouTubە» ارناسىندا تىكەلەي ترانسلياتسيا ۇيىمداستىرىلدى.
وتكەن ءىس-شارا قازاق كوشپەندىلەرىنىڭ مادەني مۇراسىنىڭ شەتەلدە تانىمال بولۋىنا ىقپال ەتىپ قانا قويماي، قازىرگى قازاقستانعا دەگەن قىزىعۋشىلىقتى ايتارلىقتاي ارتتىردى. مادەني كەشتىڭ كوپتەگەن قوناقتارى ەلىمىزدى جاقىنىراق تانىپ، جاقىن ارادا بارىپ قايتۋعا نيەت ءبىلدىردى.
