قىتايدىڭ شەنيان قالاسىندا وتباسىنداعى ءۇشىنشى بالاعا قارجىلاي كومەك تاعايىندالدى

شەنيان. سينحۋا- قازاقپارات - لياۋنيڭ پروۆينتسياسىنىڭ شەنيان قالاسى (سولتۇستىك- شىعىس قىتاي) وتباسىلاردى ءۇشىنشى بالانى دۇنيەگە اكەلۋگە ىنتالاندىرۋ ءۇشىن اقشالاي جاردەماقى بەرە باستادى.

بۇل تۋرالى جەرگىلىكتى ۇكىمەتتىڭ بالا تۋۋ ساياساتىن وڭتايلاندىرۋعا جانە حالىقتىڭ ۇزاق مەرزىمدى ءارى تەڭگەرىمدى دامۋىنا ىقپال ەتۋگە باعىتتالعان جوسپارى جوباسىندا ايتىلعان، دەپ حابارلايدى قازاقپارات سينحۋا اگەنتتىگىنە سىلتەمە جاساپ.

شەنيان قالاسىندا ءۇشىنشى بالالى بولعان ەرلى- زايىپتىلار ءسابي ءۇش جاسقا تولعانعا دەيىن اي سايىن 500 يۋان (شامامەن 72,6 دوللار) جاردەماقى الا الادى. تولەمدەر 2023 -جىلدىڭ 20 -قاڭتارىنان باستاپ ەسەپتەلەدى.

قىتايدىڭ كوپتەگەن قالاسىندا بالا تۋۋدى قولداۋ ءۇشىن ءبىرقاتار ساياسي شارا قابىلدانىپ جاتىر، سونىڭ ىشىندە بالا كۇتىمى شىعىندارىن ازايتۋ. كەيبىر پروۆينتسيالار مەن ايماقتاردا جەرگىلىكتى ۇكىمەت ەكىنشى نەمەسە ءۇشىنشى بالاسى بار وتباسىلارعا ءبىلىم بەرۋ، دەنساۋلىق ساقتاۋ جانە تۇرعىن ءۇي ماسەلەلەرىندە قولداۋ كورسەتۋدى قولعا الدى.

شىنجىن جانە ۆەنجوۋ سياقتى قالالاردا ءبىر بالالى وتباسىلار اراسىندا ساۋالناما ءجۇرىپ، بالا تۋۋدى قولداۋ ساياساتىن وڭتايلاندىرۋ تۋرالى پىكىرلەر جينالدى.

ال، حاڭجوۋ قالاسىندا تىركەلگەن وتباسىلاردىڭ بارلىعى جاڭا تۋعان بالاسى ءۇشىن جاردەماقى الۋعا ءوتىنىش بەرە الادى.