سارايشىقتا جەتى حان جەرلەنگەن

استانا. قازاقپارات - اتىراۋعا اياق باسقانداردىڭ التىن وردا داۋىرىندە استانا بولعان سارايشىق قالاسىنىڭ تاريحي ورنىنا تابان تىرەمەيتىنى كەمدە-كەم.

مۇندا تاريحشى-زەرتتەۋشى، وبلىس قوناقتارىنان باسقا دا وسى ورىندى كورۋ ءۇشىن شەت مەملەكەتتەردەن ارنايى كەلەتىندەر دە از ەمەس. اتىراۋ وبلىسىنىڭ ورتالىعىنان 50 شاقىرىم قاشىقتىقتا ورنالاسقان ەجەلگى استانانىڭ تاريحي ورنى مەملەكەت قامقورلىعىنا الىنعان.

قاسىم حان حاندىق قۇرعان كەزەڭدە ساياسي-ەكونوميكالىق تۇرعىدا ايرىقشا دامىعان، عىلىمي ورتالىق بولعان سارايشىقتا بۇگىندە «حان وردالى سارايشىق» مۇراجاي قورىعى جۇمىس ىستەپ، وتكەننىڭ ۇلاعاتىن ۇرپاق جادىنا سىڭىرۋدە ايرىقشا رول اتقارىپ تۇر. 1999 - جىلى قىركۇيەكتە اشىلعان كەشەن ءۇش قۇرامنان تۇرادى. ونىڭ العاشقىسى - حاندار پانتەونى. سول تۇستا وبلىستى باسقارعان يمانعالي تاسماعامبەتوۆتىڭ يدەياسىنان تۋىنداعان بۇل پانتەون سەگىز قابىرعادان قۇرالعان. قابىرعالار اراسىنا سارايشىقتا جەرلەنگەن جەتى حانعا ارنالىپ قۇلپىتاستار قويىلعان. موڭكە-تەمىر، توقتاعۋ (توقتى)، جانىبەك، ءامىر - وقاس، قاسىم حان، شيح ماماي، ءجۇسىپ حانداردىڭ ەسىمدەرى وسىلايشا تاۋەلسىز ەلدىڭ تورىندە تاعى ءبىر جاڭعىردى.

ال مۇراجاي ىشىنە سارايشىق قازباسىنان شىققان تاريحي جادىگەرلەر قويىلىپ، ХІV عاسىرداعى سارايشىق قالاسىنىڭ ماكەتى جاساقتالعان. كەشەن ىشىندەگى مەشىتتە اتا-بابالار رۋحىنا دۇعا باعىشتاپ، وتكەنگە يمان تىلەۋ ۇنەمى ورىندالىپ وتىرادى.