باس پروكۋراتۋرا كۇدەبايەۆتىڭ ءىسى جونىندە: بارلىق مالىمەتتى جاريا ەتە المايمىز

استانا. قازاقپارات - باس پروكۋروردىڭ ورىنباسارى جاندوس ومىراليەۆ قازاقستاننىڭ سوت تورەلىگىنەن شەتەلگە قاشقان الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆتى ىزدەستىرۋگە قاتىستى بارلىق مالىمەتتى جاريا ەتە المايتىنىن ايتتى، دەپ حابارلايدى قازاقپارات ءتىلشىسى.

«كۇدەبايەۆ بويىنشا مەملەكەتتىك شەكارانى زاڭسىز كەسىپ ءوتۋ فاكتىسى بويىنشا قىلمىستىق ءىس قوزعالدى. ءىستىڭ ماڭىزدىلىعىن ەسكەرە وتىرىپ، باس پروكۋراتۋرا ءوز قاراۋىنا الدى. ىزدەۋگە ەڭ مىقتى قىزمەتكەرلەر تارتىلىپ، ىزدەۋ جالعاسىپ جاتىر. ءبىز قىرعىزستانعا سۇراۋ جىبەردىك، ەندى ىزدەۋ جۇمىستارىن بىرلەسىپ جۇرگىزەتىن بولامىز»، - دەدى جاندوس ومىراليەۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي- اق باس پروكۋروردىڭ ورىنباسارى قىرعىزستاننان كۇدەبايەۆقا قاتىستى حابار كەلگەنىن ايتتى.

«ءبىزدىڭ قىرعىز ارىپتەستەرىمىزدىڭ ايتۋىنشا، كۇدەبايەۆ ماناس اۋەجايى ارقىلى ىستانبۇلعا ۇشىپ كەتكەن. ولار وسىنداي اقپارات بەردى. بىزدە تۇركيامەن كەلىسىمشارت بار جانە قازىر ولارمەن جۇمىس ىستەيمىز. بارلىق اقپاراتتى بەرە المايمىز، ويتكەنى ول ءالى قاشىپ ءجۇر. ياعني بارلىق دەرەكتەردى اشىپ ايتا المايمىز، سەبەبى ىزدەۋ ناتيجەسىنە كەرى اسەر ەتۋى مۇمكىن»، - دەيدى ول.

باس پروكۋراتۋرا الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆقا مەملەكەتتىك شەكارانى زاڭسىز كەسىپ وتۋگە كومەكتەسكەندەردى انىقتايدى.

«قىرعىز تاراپى دا كۇدەبايەۆتىڭ مەملەكەتتىك شەكارانى زاڭسىز كەسىپ وتۋىنە قاتىستى قىلمىستىق ءىس قوزعادى. ياعني قىلمىستىق ءىس ونى ىزدەستىرۋ بويىنشا عانا ەمەس، مەملەكەتتىك شەكارانى زاڭسىز كەسىپ ءوتۋ فاكتىسىنە قاتىستى دا قوزعالىپ وتىر. ءبىز كۇدەبايەۆتىڭ مەملەكەتتىك شەكارانى زاڭسىز كەسىپ ءوتۋىن ۇيىمداستىرعانداردى دا انىقتاماقپىز. سوندىقتان قىرعىز تاراپىنىڭ كومەگى قاجەت. مەملەكەتتىك شەكارادان زاڭسىز وتۋىنە كىمنىڭ جانە قالاي كومەك كورسەتكەنى ماڭىزدى»، - دەدى باس پروكۋروردىڭ ورىنباسارى جاندوس ومىراليەۆ ءماجىلىستىڭ جالپى وتىرىسىنان كەيىن تىلشىلەردىڭ ساۋالىنا جاۋاپ بەرە تۇرىپ.

ونىڭ ايتۋىنشا، قازاقستاننىڭ تۇركيامەن قۇقىقتىق كومەك كورسەتۋ تۋرالى ەكىجاقتى كەلىسىمى بار. ونىڭ شەڭبەرىندە تۇرىك تاراپىمەن جۇمىس قولعا الىندى.

«بۇگىندە مەملەكەتتىك شەكارانى زاڭسىز كەسىپ ءوتۋ فاكتىسى بويىنشا قىلمىستىق ءىس قوزعالدى. بارلىق فاكتىلەر جان- جاقتى زەرتتەلەدى. اتالعان ىسپەن باس پروكۋراتۋرانىڭ ارنايى قىزمەتى اينالىسىپ جاتىر. كۇدەبايەۆقا قولداۋ كورسەتكەن جانە مەملەكەتتىك شەكارانى زاڭسىز كەسىپ ءوتۋ ءۇشىن جاعداي جاساعان بارلىق ءوڭىردى قامتيتىن بولامىز»، - دەيدى ول.

ەسكە سالايىق، الماتى وبلىستىق پوليتسيا دەپارتامەنتىنىڭ بۇرىنعى باسشىسى س. كۇدەبايەۆ 3-ءساۋىر كۇنى ساعات 10:00-دە سوتقا جەتكىزىلۋى ءتيىس ەدى. الايدا، پروكۋرور كۇدىكتىنى الىپ كەلۋ تۋرالى قاۋلىنى ورىنداۋ بارىسىندا س. كۇدەبايەۆتىڭ ەلدەن كەتىپ قالعانى تۋرالى مالىمەت ۇسىنعان.

«پروكۋراتۋرا قىرعىز رەسپۋبليكاسىنىڭ شەكارا قىزمەتىنەن العان اقپاراتقا سايكەس، كۇدەبايەۆ 23 -ناۋرىز كۇنى بىشكەك قالاسىنداعى ماناس حالىقارالىق اۋەجايىنان تۇركيانىڭ ىستامبۇل قالاسىنا ۇشىپ كەتكەن. بۇل شەكارا قىزمەتىنىڭ دەرەكتەر بازاسىمەن دالەلدەنگەن»، - دەلىنگەن ەدى تالدىقورعان قالالىق سوتىنىڭ حابارلاماسىندا.

ال شەكارا قىزمەتى ونىڭ ەلدەن قاشىپ كەتكەنىن 27-ناۋرىزدا بىلگەن.

باس پروكۋراتۋرا كۇدەبايەۆتىڭ ەلدەن قاشۋ فاكتىسىمەن قىلمىستىق ءىس قوزعادى.

ۇلتتىق قاۋىپسىزدىك كوميتەتىنىڭ بولجامىنشا، ول تاۋلى جەر ارقىلى شەكارا كەسىپ ءوتۋى مۇمكىن. سەبەبى شەكارانىڭ رەسمي بەكەتتەرىنەن وتپەگەن.