شەتەلگە زاڭسىز شىققان اكتيۆتەردى قايتارۋ: ءماجىلىس دەپۋتاتى ماسەلە كوتەردى

استانا. قازاقپارات - ءماجىلىستىڭ جالپى وتىرىسىندا دەپۋتات ەرلان سايروۆ شەتەلگە زاڭسىز شىعارىلعان اكتيۆتەردى قايتارۋ ماسەلەسىن كوتەردى، دەپ حابارلايدى قازاقپارات ءتىلشىسى.

«قازىر مەملەكەتتەن زاڭسىز شىعارىلعان اكتيۆتەردى شەتەلدەن قايتارۋ ماسەلەسى وتكىر. شامامەن 140-160 ميلليارد دوللار شىعارىلدى. ءبىز سىبايلاس جەمقورلاردىڭ ءالى دە ەلدە جۇرگەنىن جانە اكتيۆتەردى شەتەل اسىرعانىن كورىپ وتىرمىز. ەۋروپا ەلدەرىمەن شارت جاسالعان با؟ ەگەر شارت بار بولسا، نەگە ءبىز سىبايلاس جەمقورلاردى ۇستاۋ بويىنشا قۇقىقتىق كومەككە جۇگىنە المايمىز؟» - دەپ ساۋال جولدادى ە. سايروۆ ءماجىلىستىڭ جالپى وتىرىسىندا.

دەپۋتات ساۋالىنا سىرتقى ىستەر ءمينيسترىنىڭ ورىنباسارى ەرمۇحامبەت قونىسپايەۆ جاۋاپ قاتتى.

«قولدا بار دەرەكتەر بويىنشا بۇگىندە 12 ەۋروپا ەلىمەن قىلمىستىق ىستەر بويىنشا كەلىسىم بار. بۇل - يسپانيا، رۋمىنيا، ۆەنگريا، يتاليا جانە تاعى باسقا. ولاردىڭ 11- ءى كۇشىنە ەندى جانە 12 مەملەكەتپەن ءبىز قازىر مەموراندۋم جاساۋدى قاراستىرىپ، شارتتاردى پىسىقتاپ جاتىرمىز. ايتا كەتەتىنى، سىرتقى ىستەر مينيسترلىگى مۇنداي شارتتاردى ازىرلەۋشى ەمەس، كەلىسىمدى قۇزىرەتتى ورگاندار جاسايدى. ال ءبىز، ءوز تاراپىمىزدان وسىنداي ماسەلەلەردى تالقىلاۋدى ۇيىمداستىرۋعا جاۋاپتىمىز»، - دەيدى ول.