مەملەكەتكە جىلىتۋ ماۋسىمىنا قاۋىپ توندىرگەن ج ە و-نى مەنشىكتەن ايىرۋ قۇقىعى بەرىلەدى
«بيىل ۇكىمەت بىرىنشىدەن، ەنەرگيالىق باقىلاۋ قىزمەتىن زاڭنامالىق تۇرعىدان كۇشەيتەدى جانە جوسپاردان تىس تەكسەرۋلەر جۇرگىزۋ قۇقىعىن بەرەدى.
ەكىنشىدەن، ەنەرگيا وبەكتىلەرىن ءتيىستى دەڭگەيدە كۇتىپ ۇستاماي، تىرشىلىككە قاجەتتى جۇيەلەردىڭ قىزمەتىنە ءقاۋىپ تونگەن جاعدايدا مەملەكەتكە ولاردى مەنشىكتەن الىپ قويۋ قۇقىعى بەرىلەتىن بولادى.
ۇشىنشىدەن، ۇكىمەت پەن اكىمدىكتەر جانە مەنشىك يەلەرى ءتيىستى ەنەرگەتيكالىق ينفراقۇرىلىمدى جوندەۋ جانە رەكونسترۋكتسيالاۋ جوبالارىن قارجىلاندىرۋدى باسىم تارتىپپەن قامتاماسىز ەتەدى»، - دەدى ءاليحان سمايىلوۆ.
ونىڭ اتاپ وتۋىنشە، وڭىرلەردەن كەلىپ تۇسكەن وتىنىمدەر نەگىزىندە جەلىلەردى اۋىستىرۋ بويىنشا قۇنى 69 ميلليارد تەڭگەنى قۇرايتىن 47 جوبادان تۇراتىن پۋل جاساقتالدى.
«بۇل جۇمىستى ساپالى جانە ۋاقىتىلى جۇرگىزۋدىڭ ماڭىزى وتە زور. سونداي-اق 2 مىڭ شاقىرىم جىلۋ جەلىلەرى جەكە مەنشىكتە ەكەنىن باسا ايتقىم كەلەدى. ولاردىڭ توزۋ دەڭگەيى شامامەن 77 پايىزدى قۇراپ وتىر. وسى جەلىلەردىڭ جاعدايىنا جانە جوندەۋ جۇمىستارىنىڭ مىندەتتى تۇردە جۇرگىزىلۋىنە باقىلاۋدى كۇشەيتۋ كەرەك. ەنەرگيا وبەكتىلەرى يەلەرىنىڭ جاۋاپكەرشىلىگىن ارتتىرىپ، ونى قىزمەت كورسەتۋ كەلىسىمشارتتاردا قاراستىرۋ كەرەك. شارت تالاپتارىن ورىنداۋ ۇسىنىم تۇرىندە ەمەس، مىندەتتى بولۋى ءتيىس»، - دەدى ول.
پرەمەر-مينيستر جەكە مەنشىكتەگى جىلۋ جەلىلەرىن بيۋدجەتتىك كرەديتتەۋ ارقىلى رەكونسترۋكتسيالاۋ ماسەلەسىن پىسىقتاۋ كەرەكتىگىن دە باسا ايتتى.
«قارجىنى قايتارۋ «تاريفتى ينۆەستيتسياعا ايىرباستاۋ» اياسىندا جۇرگىزىلەتىن بولادى»، - دەدى ءاليحان سمايىلوۆ.
