كەنە شاقسا وبا، سۇزەك، برۋسەللەز سياقتى قاۋىپتى اۋرۋلاردى جۇقتىرادى - دارىگەر

الماتى. قازاقپارات - كەنە تەك شاعۋىمەن عانا ەمەس، ورتالىق جۇيكە جۇيەسىنە اۋىر زاقىم كەلتىرەتىن كەنە ەنسەفاليتىن تاسىمالداۋشى رەتىندە دە قاۋىپتى.

بۇل تۋرالى الماتى قالالىق №11-ەمحانانىڭ حيرۋرگ-تراۆماتولوگى جورابەك سۇلتانوۆ ايتتى، دەپ حابارلايدى قازاقپارات ءتىلشىسى.

«كەنە ەنسەفاليتتى عانا ەمەس، سونىمەن قاتار، 30 عا دەيىن اۋرۋ تۇرلەرىن، ونىڭ ىشىندە وبا، تۋليارەميا، بوررەليوز، برۋتسەللەز، سۇزەك اۋرۋلارىن جۇقتىرۋى مۇمكىن. كەنەنىڭ شاعۋ ۋاقىتى ۇزاققا سوزىلماسا دا، كەنە ەنسەفاليتىنىڭ جۇعۋ قاۋپى جوققا شىعارىلمايدى»، - دەدى جورابەك سۇلتانوۆ.

ونىڭ ايتۋىنشا، كەنە كوكتەم، جاز مەزگىلدەرىندە قاۋىپتى، تامىز ايىندا ينفەكتسيا قاۋپى كۇرت تومەندەيدى، ال قىركۇيەك، قازان ايلارىندا جويىلادى.

«كەنە تاڭەرتەڭ جانە كەشكە بەلسەندى بولادى، ول كولەڭكەلى ىلعالدى جەرلەردى جاقسى كورەدى. كەنە تومەننەن جوعارى قاراي جورعالايتىنىن ۇمىتپاڭىز. ونىڭ اعاش نەمەسە بيىك بۇتادان شابۋىل جاسايدى دەگەن قاتە تۇسىنىك. ول ءوزىنىڭ «ولجاسىن» ورماننىڭ تومەنگى دەڭگەيىندەگى وسىمدىكتەر اراسىندا كۇتەدى، ادەتتە بيىكتىگى 1 م-دەن اسپايدى. بيىك ءشوپتىڭ ىشىندە كەنە كۇن ساۋلەسىنەن جاقسى قورعانادى جانە شابۋىل شاعۋ مۇمكىندىگى جوعارى»، - دەدى دارىگەر.

سپيكەر كەنە شاققاندا نە ىستەۋ كەرەك ەكەنىن دە ايتتى.

«ەگەر ءسىزدى كەنە شاققانىن بايقاساڭىز، العاشقى 4 كۇندە شۇعىل كومەك الۋ ءۇشىن دەرەۋ جاقىن جەردەگى تراۆمپۋنكتكە بارۋىڭىز كەرەك. سەبەبى، كەنە شاققان سوڭ ءار كۇن سايىن يممۋنوگلوبۋليننىڭ تيىمدىلىگى تومەندەيدى. تراۆمپۋنكتتە كەنە الىنىپ، شاققان جەرى ەمدەلەدى، كەنە ەنسەفاليتىنە قارسى يممۋنوگلوبۋلين ەنگىزىلەدى»، - دەدى الماتى قالالىق №11-ەمحانانىڭ حيرۋرگ-تراۆماتولوگى جورابەك سۇلتانوۆ.

ەسكە سالايىق، الماتىدا 29-ناۋرىز – 28-ءساۋىر اراسىندا ورماندى القاپتاردا، قالا ساياباقتارى مەن گۇل باقتاردا كەنەگە قارسى دەزينسەكتسيالىق وڭدەۋ جۇمىستارىنىڭ ءبىرىنشى كەزەڭى ءوتىپ جاتىر.