كونكۋرستىق نەگىزدە وتكىزىلەتىن پاتەرلەر ۇتىسى تۋرالى حابارلاما جالعان - مينيسترلىك

استانا. قازاقپارات - يندۋستريا جانە ينفراقۇرىلىمدىق دامۋ مينيسترلىگى «كونكۋرستىق نەگىزدە وتكىزىلەتىن پاتەرلەر ۇتىسى» تۋرالى حابارلامانى جوققا شىعارىپ، الاياقتاردان ساق بولۋعا شاقىرادى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

«قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنە «كونكۋرستىق نەگىزدە وتكىزىلەتىن پاتەرلەر ۇتىسى» تۋرالى ازاماتتاردىڭ تاراپىنان قوڭىراۋلار ءجيى ءتۇسىپ جاتىر.

الاياقتار وزدەرىن ۆەدومستۆو قىزمەتكەرلەرى رەتىندە تانىستىرىپ، «مينيسترلىك جەرگىلىكتى اتقارۋشى ورگانمەن بىرلەسە وتىرىپ، كونكۋرستىق نەگىزدە پاتەرلەردىڭ ۇتىسىن وتكىزەتىنى» تۋرالى ايتىپ، تۇرعىندارعا حابارلاسادى. سونىمەن بىرگە، «مەملەكەتتىك ورگانعا قارجىلاي بەرەشەگى تۋرالى مالىمدەپ، ول وتەلگەن جاعدايدا ازامات كونكۋرستىق نەگىزدە پاتەر الاتىنى» تۋرالى جالعان اقپار بەرەدى.

مينيسترلىك بۇل اقپاراتتى رەسمي تۇردە جوققا شىعارادى. ويتكەنى، تۇرعىن ءۇي بەرۋ ماسەلەسى جەرگىلىكتى اتقارۋشى ورگانداردىڭ قۇزىرەتىنە كىرەدى ءارى ساناتتارعا سايكەس جانە كەزەككە قويۋ كۇنىنە بايلانىستى بولەك تىزىمدەرمەن جۇزەگە اسىرىلادى.

مەملەكەتتىك تۇرعىن ءۇي قورىنان تۇرعىن ءۇي بەرۋ بويىنشا وزەكتى اقپارات الۋ ءۇشىن يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ Call-ورتالىعىنا حابارلاسۋ قاجەت.

وسى رەتتە كۇماندى جارنامالارعا نازار اۋدارماي، ارانداتۋشىلىققا جول بەرمەۋگە جانە تەك رەسمي اقپارات كوزدەرىنە سەنۋگە شاقىرامىز»، - دەلىنگەن رەسمي حابارلامادا.