قاي ەلدەر پرەزيدەنتتەرىن سوتتادى
بۇرىنعى مەملەكەت باسشىسى ءارى 2024 -جىلى وتەتىن پرەزيدەنت سايلاۋىنا رەسپۋبليكالىق پارتيانىڭ اتىنان ۇمىتكەر بولعالى وتىرعان ول ىسكەرلىك قۇجاتتاردى قولدان جاسادى دەگەن ايىپتىڭ 34 تارماعى بويىنشا كىناسىن مويىنداعان جوق.
اتالعان ايىپتاۋلار ترامپتىڭ 2016 -جىلعى پرەزيدەنتتىك ناۋقانى كەزىندە پورنواكتريسا ستورمي دەنيەلسكە اۋىزباستىرىق رەتىندە تولەگەن اقشاعا قاتىستى بولىپ وتىر.
Axios دەرەكتەرىنە سۇيەنسەك، 2000 -جىلدان بەرى كەمىندە 78 ەلدە، ونىڭ ىشىندە ەۋروپادا تاقتان تۇسكەن مەملەكەت باسشىلارى تۇرمەگە توعىتىلىپ نەمەسە جاۋاپقا تارتىلىپتى.
حورۆاتيادا بۇرىنعى ۇكىمەت باسشىسى يۆو سانادەر جەمقورلىق ارەكەتى ءۇشىن ايىپتالىپ، 8 جىلعا باس بوستاندىعىنان ايىرىلدى. بۇگىندە ول جازاسىن وتەپ جاتىر.
فرانسيادا بۇرىنعى ەكى پرەزيدەنتىنە ايىپ تاعىلدى.
الدىمەن جاك شيراك سوتتالدى. ول 2011 -جىلى جەمقورلىق ءۇشىن ءىستى بولىپ، 2 جىلعا شارتتى جازا ارقالادى. ول سونداي- اق پاريج مەرى بولىپ تۇرعان كەزىندە قىزمەت بابىن جەكە مۇددەسىنە پايدالانعانى، سەنىمدى اسىرا پايدالانعانى جانە قاراجاتتى وڭدى- سولدى شاشقانى ءۇشىن كىنالى دەپ تانىلدى.
ەكىنشىسى - نيكوليا ساركوزي. ونىڭ 2021 -جىلى جەمقورلارمەن اۋىزجالاسىپ جانە ءباز بىرەۋلەردى اقشاعا قولپاشتاعانى اشكەرە بولدى. وسىلايشا 3 جىل باس بوستاندىعىنان ايىرىلدى. بۇگىندە ول وسى جازانىڭ شارتتى 2 جىلىنا قاتىستى ءىستى قايتا قاراۋعا شاعىم تۇسىرگەن جايى بار.
گەرمانيادا كريستيان ۆۋلف تا جوعارىداعىلاردىڭ كەبىن كيدى. بۇرىنعى پرەزيدەنت قىزمەتتىك مىندەتتەرىن ورىنداۋ كەزىندە قىزمەت ءتۇرىن پايدالانعانى ءۇشىن سوت الدىنان ءبىر- اق شىقتى. دەگەنمەن ول 2014 -جىلى ابىرويىن اقتاپ شىقتى.
پارا الدى دەپ ايىپتالعان يتاليانىڭ بۇرىنعى پرەمەر- مينيستر سيلۆيو بەرلۋسكونيدىڭ 2021، 2022 جانە 2023 -جىلدارى وتكەن ءۇش سوت پروتسەسىندە قىلمىسى اقىرى دالەلدەنگەن جوق.
بەرلۋسكوني ساياساتقا كەلگەن 1994 -جىلدان بەرى ۇستىنەن 30-دان استام قىلمىستىق ءىس قوزعالىپتى.
پورتۋگاليادا بۇرىنعى ۇكىمەت باسشىسى جوزە سوكراتەشكە جەمقورلىقپەن اينالىستى دەگەن ايىپتار تاعىلىپ، الايدا سۋديا ولاردىڭ بارلىعىن جوققا شىعارىپ، تەك اقشا جىلىستاتۋعا قاتىستى كىنالى دەپ تاپتى.
سوڭعى جيىرما جىلدا مەملەكەت باسشىلارى ءجيى- ءجيى ءىستى بولعان جالعىز عانا ايماق بار - ول لاتىن امەريكاسى. مىسالى، پەرۋدە 1985 -جىلدان بەرى تاقتا وتىرعان پرەزيدەنتتەردىڭ بىرەۋىنەن وزگەسى دەرلىك اباقتىعا قامالىپ نەمەسە ايىپ تاعىلعان.
