سەرىك كۇدەبايەۆ الاتاۋ ارقىلى شەكارانى كەسىپ وتكەن بولۋى مۇمكىن – ۇ ق ك

استانا. قازاقپارات - الماتى وبلىستىق پوليتسيا دەپارتامەنتىنىڭ بۇرىنعى باستىعى سەرىك كۇدەبايەۆ تاۋلى جەر ارقىلى شەكارا كەسىپ ءوتۋى مۇمكىن.

بۇل تۋرالى ۇلتتىق قاۋىپسىزدىك كوميتەتى ءتوراعاسىنىڭ ورىنباسارى-شەكارا قىزمەتىنىڭ ديرەكتورى ەرلان الداجۇمانوۆ ايتتى، دەپ حابارلايدى قازاقپارات ءتىلشىسى.

«قىرعىزستانمەن مەملەكەتتىك شەكارا 1257 شاقىرىمعا سوزىلىپ جاتىر. الماتى باعىتىندا بىزدە الاتاۋ تاۋلى القابى بار. مەنىڭشە، نيەت بولسا جانە بۇل باعىتتا كۇزەتۋگە قاجەت تەحنيكالىق قۇرالدار جوق ەكەنىن ەسكەرە وتىرىپ وسى تاۋلار ارقىلى مەملەكەتتىك شەكارانى كەسىپ ءوتۋ مۇمكىندىگى بار. مۇنى انىقتاۋ ءۇشىن تەكسەرۋ جۇرگىزىلىپ جاتىر»، - دەدى ەرلان الداجۇمانوۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ دەرەگىنشە، كۇدىكتىنىڭ قايدا ەكەنىن انىقتاۋ ءۇشىن ۇلتتىق قاۋىپسىزدىك كوميتەتىمەن بىرلەسكەن توپ قۇرىلعان.

سونىمەن قاتار ىشكى ىستەر مينيسترلىگى مەن وزگە دە مەملەكەتتىك ورگاندار جانىندا ارناۋلى توپ جۇمىس ىستەپ جاتىر.

5 شەكارا بەكەتىنىڭ 300-گە جۋىق قىزمەتكەرى دە وسى جۇمىسقا جۇمىلدىرىلعان.

سونىمەن قاتار ول ب ا ق وكىلدەرىنىڭ سەرىك كۇدەبايەۆتىڭ قاشىپ كەتكەنى جايلى اقپارات نەلىكتەن كەش جاريالانعانى تۋرالى ساۋالىنا جاۋاپ بەردى.

«ءبىز ونىڭ قاشىپ كەتكەن- كەتپەگەنىن بىلمەدىك. بۇعان دەيىن دە اتاپ وتكەنىمدەي، ول مەملەكەتتىك شەكارانى رەسمي وتكىزۋ پۋنكتەرى ارقىلى كەسىپ وتكەن جوق»، - دەدى ول.

ەسكە سالا كەتەيىك، 3-ساۋىردە سەرىك كۇدەبايەۆقا حالىقارالىق ىزدەۋ جاريالانعان بولاتىن.

الايدا، بۇگىن كۇدىكتىنىڭ ەل اۋماعىنان تىسقار بوي تاسالاعانىن شەكارا قىزمەتى ناۋرىزدىڭ 27- كۇنى ءبىر- اق بىلگەنى انىقتالدى.

اۆتور

مارلان جيەمباي