كانادالىق عالىمدار ءولىم قاۋپىن ارتتىراتىن الكوگول مولشەرىن اتادى

استانا. قازاقپارات - عالىمدار الكوگولدىڭ ادامعا اسەرى تۋرالى جۇزدەن استام زەرتتەۋلەردى تالداپ، ءبىر ستاقان شاراپ دەنساۋلىققا پايدالى دەگەن ميفتى جوققا شىعاردى. ولار سونداي-اق ءولىم قاۋپىن ارتتىراتىن الكوگول مولشەرىن دە اتادى.

دەنساۋلىققا زيان كەلتىرمەۋ ءۇشىن كۇنىنە قانشا ىشىمدىك ىشۋگە بولادى؟ بۇل سۇراق الكوگولدى جاقسى كورەتىندەردى عانا ەمەس، عالىمداردى دا الاڭداتادى.

كانادانىڭ ۆيكتوريا ۋنيۆەرسيتەتىنىڭ عالىمدارى ۇنەمى ىشەتىندەردىڭ قاۋىپ-قاتەرىن زەرتتەگەن. ۇلكەن مەتا-اناليزدە ولار 1980 جانە 2021-جىلدار ارالىعىندا جۇرگىزىلگەن، 4,8 ميلليون ادام قاتىسقان الكوگولدىڭ ولىمگە اكەلەتىن اسەرى تۋرالى 107 زەرتتەۋدىڭ دەرەكتەرىن جينادى. زەرتتەۋ JAMA Open Network-تە جاريالانعان.

عالىمدار الكوگولدى از، ورتاشا نەمەسە وتە كوپ ىشەتىندەر اراسىندا ءولىم قاۋپىن سالىستىردى. الكوگولدى از تۇتىناتىندار اراسىندا مەزگىلسىز ءولىم قاۋپى ايتارلىقتاي وسپەگەن. كورسەتكىشتەر ىشپەيتىندەردىڭ كورسەتكىشتەرىمەن بىردەي بولعان.

«از الكوگول» تەرمينى نەنى بىلدىرەتىنىن ءتۇسىنۋ ماڭىزدى. زەرتتەۋشىلەر ايەلدەر ءۇشىن كۇنىنە ءبىر ستاقان شاراپ، ەرلەر ءۇشىن كۇنىنە 45 گرامنان از الكوگول، بۇل ەكى ستاكان شاراپ، نەمەسە 2 ساپتىاياق سىرا نورما ەكەنىن ايتادى.

عالىمدار سونىمەن قاتار از مولشەردەگى الكوگول دەنساۋلىققا پايدالى دەگەن ميفتى جوققا شىعاردى.

كۇنىنە ءبىر-ەكى ستاكان شاراپپەن شەكتەلە المايتىندار ءۇشىن جاعىمسىز جاڭالىق. زەرتتەۋشىلەر بەلگىلى ءبىر مولشەردەن ارتىق الكوگولدى ىشەتىن ادامدار ءۇشىن مەزگىلسىز ءولىم قاۋپى شىنىمەن دە، ايتارلىقتاي جوعارى ەكەنىن انىقتادى.

«تاۋلىگىنە ەكى ستاكاننان ارتىق شاراپ ىشەتىن (45-64 گرام الكوگول) ەرلەردىڭ ءولىم قاۋپى ىشپەيتىندەرگە قاراعاندا %15 جوعارى. ايەلدەر ءۇشىن تاۋلىگىنە 25 پەن 44 گرامعا دەيىن الكوگولدى ىشەتىن بولسا، قاۋىپ %21 عا ارتادى. ال جالپى ىشىمدىك ىشەتىندەردىڭ مەزگىلسىز ءولۋ قاۋپى %61 عا ارتادى»، - دەلىنگەن زەرتتەۋدە.