الەۋمەتتىك ماڭىزى بار ازىق-تۇلىك باعاسىن تۇراقتاندىرۋعا جەڭىلدەتىلگەن نەسيە بەرىلەدى

استانا. قازاقپارات - ەلىمىزدە الەۋمەتتىك ماڭىزى بار ازىق-تۇلىك باعاسىن تۇراقتاندىرۋ تەتىكتەرى ىسكە اسادى.

تولىعىراق اۋىل شارۋاشىلىعى ءمينيسترى مىندەتىن اتقارۋشى ەربول قاراشوكەيەۆ ايتىپ بەردى، دەپ حابارلايدى قازاقپارات ءتىلشىسى.

«بيىل جىل باسىندا تۇراقتاندىرۋ قورلارىنىڭ جۇمىسى قايتا فورماتتالدى. وسىلايشا الەۋمەتتىك ماڭىزى بار ازىق- تۇلىك باعاسىن تەجەۋدىڭ ءۇش كەزەڭدىك جۇيەسى ەنگىزىلدى. بۇل جەردە تۇراقتاندىرۋ قورى ارقىلى فەرمەرلەرگە كۇزگى جانە ەرتە پىسەتىن كوكونىستەردى بەلگىلەنگەن باعامەن جەتكىزۋگە الدىن الا اۆانس بەرىلەدى. بۇل ماۋسىمارالىق كەزەڭدە كوكونىس باعاسىنىڭ ءوسىمىن رەتتەۋگە اسەر ەتەدى. قازىر وڭىرلەر كوكونىستى وتكەن جىلى جاسالعان كەلىسىمشارت نەگىزىندە بەلگىلەنگەن باعامەن ساتىپ جاتىر. سونىمەن قاتار، بيىل تاۋار وندىرۋشىلەرمەن كوكونىس جەتكىزۋگە فورۆاردتىق شارتتار جاساسۋ بويىنشا جۇمىس ءجۇرىپ جاتىر»، - دەدى ەربول قاراشوكەيەۆ ۇكىمەت وتىرىسىندا.

ونىڭ مالىمەتىنشە، بۇگىندە ارزانداتىلعان استىقتى ساتۋ بويىنشا مەملەكەتتىك قولداۋ تەتىگى جەكە پىسىقتالدى.

«بۇل تەك ۇن ونىمدەرى بويىنشا عانا ەمەس، سونىمەن قاتار ءتورت تۇلىك مالدى جەم- شوپپەن قامتۋ ارقىلى مال شارۋاشىلىعى ونىمدەرى باعاسىنىڭ ءوسۋىن ۇستاپ تۇرۋعا مۇمكىندىك بەرەدى. جالپى، الەۋمەتتىك ماڭىزى بار ازىق- تۇلىك تاۋارلارى باعاسىن تۇراقتاندىرۋ تەتىكتەرى ىسكە اسادى. جاڭا ءتاسىل بويىنشا ءوڭىر اكىمدىكتەرى جەرگىلىكتى بيۋدجەتتەن شامامەن 125 ميلليارد تەڭگە قاراستىرىپ وتىر. ونىڭ ىشىندە جەڭىلدىكپەن نەسيە بەرۋگە 99 ميلليارد تەڭگە جانە تاۋار وندىرۋشىلەردەن تىكەلەي ساتىپ الۋعا 26 ميلليارد تەڭگە كوزدەلگەن»، - دەيدى ول.