ازيا تۋمالارى قالاي ۇلى بريتانيانىڭ تانىمال ساياساتكەرلەرىنە اينالدى
وسى ورايدا، قازاقپارات ءتىلشىسى ۇلى بريتانيادا بەدەلدى سالماققا يە بولعان ازيا تۋمالارىن تۇگەندەپ شىقتى.
شوتلانديانىڭ ەڭ جاس ءمينيسترى
گلازگودا تۋىپ-وسكەن حۋمزا يۋساف 1999 -جىلى شوتلانديا پارلامەنتى قۇرىلعاننان بەرگى ءبىرىنشى ەڭ جاس مينيستر عانا ەمەس، بۇل قىزمەتتەگى العاشقى مۇسىلمان بولدى.
حۋمزا يۋسافتىڭ اكەسى پاكىستاننان شوتلاندياعا 1962 -جىلى قونىس اۋدارعان. ساياساتكەردىڭ ءوزى نەبارى 7 جىلدا قاتارداعى پارتيا مۇشەسىنەن شوتلانديا ۇكىمەتىنىڭ حالىقارالىق دامۋ ءمينيسترى اتانعان.
«ءبىز بۇگىن تەرىنىڭ ءتۇسى نەمەسە ءدىني نانىم-سەنىم ءبارىمىز «ءۇي» دەپ اتايتىن ەلدى باسقارۋعا كەدەرگى ەمەس ەكەنىن انىق كورسەتكەنىمىزدى ماقتان تۇتۋىمىز كەرەك»، - دەگەن ەدى شوتلانديانىڭ ءبىرىنشى ءمينيسترى بولىپ سايلانعان حۋمزا يۋساف.
حۋمزا يۋساف گلازگوداعى جەكە مەكتەپتى بىتىرگەن، سودان كەيىن جەرگىلىكتى ۋنيۆەرسيتەتتە وقۋىن جالعاستىرعان. ايتا كەتسەك، سول وقۋ ورىنىندا شوتلاند لەيبوريستەرىنىڭ جەتەكشىسى، 40 جاستاعى اناس سارۆار دا وقىعان.
اناس سارۆاردىڭ دا اكەسى - پاكىستاننان شىققان مۇسىلمان، ول 1976 -جىلى شوتلاندياعا كوشىپ، ۇلى بريتانياداعى العاشقى مۇسىلمان دەپۋتات بولعان.
اناس سارۆار 2010 -جىلى ءتىس دارىگەرى مانسابىنان باس تارتىپ، ساياساتكەر بولۋدى ۇيعارادى. سول جىلى ول بريتان پارلامەنتىنىڭ دەپۋتاتى بولىپ سايلاندى جانە 11 جىلدان كەيىن شوتلانديا لەيبوريستەرىنىڭ جەتەكشىسىنە اينالدى.
ريشي سۋناك - ۇلى بريتانيا پرەمەر-ءمينيسترى
پرەمەر-مينيستر، لوندون مەرى، ىشكى ىستەر ءمينيسترى جانە شوتلاندتىق لەيبوريستەردىڭ جەتەكشىسى - تۇماندى البيونعا جاقسى ءومىر ىزدەپ كەلگەن ازيالىق ميگرانتتاردىڭ بالالارى.
حۋمزا يۋساف پەن اناس سارۆاردىڭ اتا-انالارى ءبىلىمنىڭ قۇندىلىعىن ءتۇسىنىپ، بالالارىنا جەكە مەكتەپتەردە وقۋعا مۇمكىندىك بەرۋ ءۇشىن كوپ جۇمىس ىستەگەن. ۇلى بريتانيا پرەمەر-ءمينيسترى ريشي سۋناك تا - ەليتالىق ءبىلىم بەرۋدىڭ قۇندىلىعى تۋرالى ايتۋدان جاسقانبايتىنداردىڭ ءبىرى.
«مەنىڭ اتا-انام جاقسى مەكتەپتەرگە بارۋىم ءۇشىن كوپ نارسەنى قۇربان ەتتى»، - دەگەن ر. سۋناك.
ريشي سۋناكتىڭ اتا-اناسى ءۇندىستاننان شىققان، ۇلى بريتانياعا شىعىس افريكادان كەلگەن. ساياساتكەردىڭ ءوزى 1980 -جىلى ساۋتگەمپتوندا تۋدى، اكەسى - تەراپيەۆت، ال اناسى ءدارىحاناعا يەلىك ەتكەن.
ريشي سۋناك ەليتالىق ۆينچەستەر كوللەدجى جەكە مەكتەبىندە وقىعان. سودان كەيىن وكسفوردقا ءتۇسىپ، وندا فيلوسوفيا، ساياسات جانە ەكونوميكانى مەڭگەردى. ول ءۇندىستاندىق ميللياردەردىڭ قىزى جانە ءىرى Infosys كومپانياسىنىڭ نەگىزىن قالاۋشى اكشاتا مۋرتيگە ۇيلەنگەن. 2001 -جىلدان 2004 -جىلعا دەيىن سۋناك Goldman Sachs-تە تالداۋشى بولىپ جۇمىس ىستەدى، سودان كەيىن ەكى حەدج-قوردىڭ سەرىكتەسى بولدى.
2015 -جىلى ول ۇلى بريتانيا پارلامەنتىنىڭ دەپۋتاتى، ال 2020 -جىلدىڭ اقپانىندا قارجى ءمينيسترى بولىپ تاعايىندالدى جانە بىرنەشە اپتادان كەيىن باستالعان پاندەميا جاعدايىندا ۇلى بريتانيا ەكونوميكاسىن باسقاردى.
ريشي سۋناك پرەمەر-مينيستر قىزمەتىن 2022 -جىلدىڭ قازان ايىندا ەكونوميكا ءۇشىن وتە قيىن ساتتە قابىلدادى. ءدال سول كەزدە ۇلى بريتانياداعى ينفلياتسيا 1981 -جىلدان بەرگى ەڭ جوعارى دەڭگەيگە كوتەرىلگەن ەدى.
سۋەللا براۆەرمان - ىشكى ىستەر ءمينيسترى
بريتانيا ىشكى ىستەر ءمينيسترى، 43 جاستاعى سۋەللا براۆەرمان دا جەكە مەكتەپكە بارعان، ءبىراق شىعىندى ءوز ءبىلىمىنىڭ ارقاسىندا العان ستيپەندياسىمەن وتەدى.
ونىڭ اناسى - تاميلت تەكتى ءۇندى، ال اكەسى - گوا ايماعىنان شىققان حريستيان. وتباسى 1960 -جىلدارى ماۆريكيي مەن كەنيادان ۇلى بريتانياعا قونىس اۋدارعان.
س. براۆەرماننىڭ ساياسي مانسابى 2015 -جىلى باستالدى، ول كونسەرۆاتيۆتى پارتيانىڭ دەپۋتاتى بولىپ سايلاندى جانە ۇلى بريتانيانىڭ ەۋروپالىق وداقتان شىعۋىن قولدادى.
2020 -جىلى بوريس دجونسون س. براۆەرماندى باس پروكۋرور ەتىپ تاعايىندادى، ال وتكەن جىلعى قازان ايىندا ول ىشكى ىستەر ءمينيسترى بولدى. ءوزىنىڭ شىعۋ تەگىنە قاراماستان، سۆەللا براۆەرمان كوشى- قون ماسەلەلەرىنە قاتاڭ كوزقاراسىمەن تانىمال.
سادىق حان - لوندون مەرى
لوندون مەرى، 52 جاستاعى سادىق حان - اتالعان بەس ساياساتكەردىڭ ىشىندە جەكە مەكتەپتە ءبىلىم الماعان جالعىز ادام. ول بريتان استاناسىندا دۇنيەگە كەلگەن، ال اتا-اناسى امانۋللا مەن سەرحۋن 1968 -جىلى ۇلى بريتانياعا پاكىستاننان كوشىپ كەلگەن.
سادىق حان - 2016 -جىلى ۇلى بريتانيا استاناسىنىڭ مەرى بولعان العاشقى مۇسىلمان. مەكتەپتە ول ساياساتقا قىزىعۋشىلىق تانىتىپ، 15 جاسىندا لەيبوريستەر پارتياسىنا قوسىلعان.
2005 -جىلى سادىق حان پارلامەنت دەپۋتاتتىعىنا كانديداتۋراسىن ۇسىندى جانە سول جىلى پارلامەنتكە سايلانعان بەس ەتنيكالىق ازشىلىق وكىلدەرىنىڭ ءبىرى بولىپ جەڭىسكە جەتتى.
2009 -جىلى سادىق حان لەيبوريستەر ۇكىمەتىندە كولىك ءمينيسترى جانە يسلام ءدىنى كابينەتىنىڭ ءبىرىنشى مۇشەسى بولدى. ول كەزدە بريتان پارلامەنتىنىڭ قاۋىمدار پالاتاسىندا تەك ءتورت مۇسىلمان دەپۋتاتى بولعان ەدى.
ريشي سۋناكتىڭ، اناس سارۆاردىڭ، سۋەللا براۆەرماننىڭ جانە حۋمزا يۋسافتىڭ اتا-انالارى ورتا تاپقا جاتسا، سادىق حاننىڭ اتا-اناسى جۇمىسشى تابىنان شىققان: اكەسى - اۆتوبۋس جۇرگىزۋشىسى، ال اناسى - تىگىنشى بولعان.
بالا كەزىندە اتالعان ساياساتكەرلەر ناسىلشىلدىك كورىنىسىنە تاپ بولدى جانە ءوز داستۇرلەرىن دارىپتەۋ بويىنشا تاربيەلەندى. 2019 -جىلى BBC-گە بەرگەن سۇحباتىندا ريشي سۋناك: «مادەني تاربيە تۋرالى ايتاتىن بولساق، مەن دەمالىس كۇندەرى عيباداتحاناعا باراتىنمىن - مەن يندۋيسپىن، ءبىراق سەنبى كۇندەرى فۋتبولعا دا باراتىنمىن»، - دەيدى.
2011 -جىلى شوتلانديا پارلامەنتىنە سايلانعاننان كەيىن، پاكىستاننىڭ ءداستۇرلى كيىمىن كيگەن حۋمزا يۋساف اعىلشىن تىلىندە، سودان كەيىن ۋردۋ تىلىندە انت بەرىپ، ءوزىنىڭ شىعۋ تەگىن اتاپ كورسەتتى.
ءوز كەزەگىندە سۋەللا براۆەرمان دەپۋتات بولعان كەزدە دحامماپادتىڭ بۋددا جازبالارى كىتابىن ۇستاپ، انت بەردى.
اناس سارۆاردىڭ، حۋمزا يۋسافتىڭ جانە سادىق حاننىڭ اتا-انالارى ولاردى يسلامدى قۇرمەتتەۋگە ۇيرەتكەن. پارلامەنت دەپۋتاتى رەتىندەگى العاشقى سوزىندە سادىق حان اكەسىنىڭ مۇحاممەد پايعامباردىڭ وسيەتتەرىن ۇيرەتكەنىن ەسىنە العان.
اۆتور
ايجان سەرىكجان قىزى
