سەمەيدە جولاۋشىلار قوعامدىق كولىكتەردە حاكىم ابايدىڭ ناقىل سوزدەرىن وقي الادى

سەمەي. قازاقپارات - سەمەيدەگى قوعامدىق كولىكتەردە حاكىم ابايدىڭ ناقىل سوزدەرى پايدا بولدى، دەپ حابارلايدى قازاقپارات ءتىلشىسى اباي وبلىستىق اكىمدىگىنىڭ رەسمي سايتىنا سىلتەمە جاساپ.

سونىمەن قاتار، اۆتوبۋس ىشىنە كىتاپ سورەلەرى ورنالاستىرىلدى. سورەدە «وسى كىتاپتار سىزگە ارنالعان»، «ءسىز دە كەلەسى جولاۋشىعا كىتاپ سىيلاڭىز!» دەگەن نۇسقاۋلىق بار. جولاۋشىلار سورەدەگى كىتاپتى ساپار بارىسىندا عانا وقي الادى. ونى وزىمەن بىرگە الىپ كەتۋگە بولمايدى. تەك وزگە جولاۋشىعا تابىستاۋعا نەمەسە سورەگە قايتا قويۋعا بولادى.

«دانالىق ىزىمەن» اكتسياسى اياسىندا قولعا الىنعان شارانىڭ ماقساتى تۇرعىنداردى دانالىققا باۋلۋ، بىلىمگە شاقىرۋ، كىتاپ وقۋعا دەگەن ماحابباتىن وياتۋ»، - دەيدى اباي وبلىستىق مادەنيەت باسقارماسىنىڭ باسشىسى ايدار يبرايەۆ.

ونىڭ ايتۋىنشا، يگى باستاما قوعامدىق كولىك جۇرگىزۋشىلەرىنە دە، قالا تۇرعىندارىنا دا ءوز پايداسىن تيگىزىپ، رۋحاني بايلىعىن ارتتىرا تۇسپەك.

ايتا كەتۋ كەرەك، بۇگىنگە دەيىن 6 اۆتوبۋس بەزەندىرىلىپ، 60 كىتاپ جينالعان. الداعى ۋاقىتتا اۆتوبۋستار مەن كىتاپتاردى كوبەيتۋ جوسپارلانىپ وتىرعان كورىنەدى.

ەستەرىڭىزگە سالساق، اعىمداعى جىلدىڭ ناۋرىز ايىندا سەمەيدە №1 جانە №36-باعىتتار بويىنشا 25 ورىندىق، سىيىمدىلىعى 50 جولاۋشىعا ارنالعان 12 جاڭا اۆتوبۋس قولدانىسقا بەرىلگەن بولاتىن.

بەردىبەك قارىنباي