مەملەكەتتىك قىزمەتكە ورنالاساتىندار ەندى رۋحاني قۇندىلىقتار بويىنشا تەست تاپسىرادى

استانا. قازاقپارات - مەملەكەتتىك قىزمەتكە كەلەمىن دەگەن ادامنىڭ رۋحاني قۇندىلىعىن انىقتاۋ بويىنشا تەستىلەۋ ەنىگىزىلەدى.

ب ا ق وكىلدەرىنىڭ ساۋالىنا جاۋاپ بەرگەن مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«كەلەر جىلدان باستاپ مەملەكەتتىك قىزمەتكە ىرىكتەۋدى ونلاين جۇرگىزۋدى جوسپارلاپ وتىرمىز. وعان بايلانىستى قىزمەتكە كىرەتىن ازامات ءبىرىنشى كەزەڭدە پروكتورينگ باعدارلاماسىمەن تەست تاپسىرادى، ودان كەيىن قۇزىرەتى مەن قابىلەتىنە انىقتايتىن تەستىلەۋدەن وتەدى. سونىمەن قاتار، ءبىز تاعى ءبىر تەست ەنگىزىپ وتىرمىز. ول - ءار مەملەكەتتىك قىزمەتكە كەلەمىن دەگەن ادامنىڭ رۋحاني قۇندىلىعىن انىقتاۋ بويىنشا تەست. بۇلاردىڭ بارلىعى ونلاين فورماتتا قولجەتىمدى بولادى. ازامات ۇيىندە وتىرىپ-اق، ەمتيحانداردى تاپسىرادى. ال ءبىز ءار كەزەڭ بويىنشا بال قويىپ وتىرامىز. سوڭىندا سول ۇپايلاردىڭ جيىنتىعى بويىنشا كىم كوپ بالل جينادى، سول بوس لاۋازىمعا تاعايىندالادى»، - دەپ ءتۇسىندىردى اگەنتتىك ءتوراعاسى.

ەسكە سالايىق، بۇعان دەيىن مەملەكەتتىك باسقارۋ اكادەمياسىنىڭ رەكتورى ەرلان ءابىل مەمقىزمەتشىلەرگە ءجيى بىلىكتىلىگىن جەتىلدىرۋ مۇمكىندىگىن ۇسىنۋ قاجەت ەكەنىن ايتىپ، ۇسىنىس بىلدىرگەن بولاتىن.

قوسا كەتسەك، ەندى مەملەكەتتىك قىزمەتكە ورنالاسۋدا قازاق ءتىلىن ءبىلۋ تالابى ەنگىزىلۋى مۇمكىن.

سونىمەن قاتار، مەملەكەتتىك قىزمەتكە ورنالاسۋ تەستى الداعى ۋاقىتتا 9 ەمەس، 4 زاڭ بويىنشا الىنادى.