ەرلان قوشانوۆ ق ر پارلامەنتى ءماجىلىسىنىڭ ءتوراعاسى بولدى
اتاپ ايتقاندا، ق ر كونستيتۋتسياسى 58-بابىنىڭ 1-تارماعىنا سايكەس، ق ر پارلامەنتى ءماجىلىسىنىڭ ءتوراعاسى مەملەكەتتىك ءتىلدى ەركىن مەڭگەرگەن دەپۋتاتتار اراسىنان پالاتا دەپۋتاتتارى جالپى سانىنىڭ كوپشىلىك داۋسىمەن جاسىرىن داۋىس بەرۋ ارقىلى سايلانادى.
ەرلان قوشانوۆتىڭ كانديداتۋراسىن ءماجىلىس دەپۋتاتى باقتىقوجا ىزمۇحامبەتوۆ ۇسىندى.
داۋىس بەرۋ ناتيجەسى بويىنشا پالاتا دەپۋتاتتارى ق ر پارلامەنتى ءماجىلىسىنىڭ ءتوراعاسى قىزمەتىنە ەرلان جاقان ۇلى قوشانوۆتى ءبىراۋىزدان سايلادى.
ايتا كەتەيىك، بۇگىن ءماجىلىستىڭ ءبىرىنشى وتىرىسىندا پالاتانىڭ دەپۋتاتتارى انت بەردى.
بۇدان بۇرىن حابارلانعانداي، استانادا VIII سايلانعان ق ر پارلامەنتىنىڭ ءبىرىنشى سەسسياسى اشىلدى.
ەرلان جاقان ۇلى 1962 -جىلى قاراعاندى وبلىسىندا تۋعان. 1984 -جىلى - قاراعاندى پوليتەحنيكالىق ينستيتۋتىن، 1999 -جىلى قازاق مەملەكەتتىك باسقارۋ اكادەمياسىن بىتىرگەن. ينستيتۋتتى بىتىرگەننەن كەيىن جەزقازعان كەن- مەتاللۋرگيا كومبيناتى بايىتۋ فابريكاسىنىڭ سلەسارى، شەبەرى بولىپ جۇمىس ىستەگەن.
1988-1990 -جىلدارى - قازاقستان ل ك ج و جەزقازعان وبلىستىق كوميتەتىنىڭ جۇمىسشى جانە اۋىل جاستارى ءبولىمىنىڭ نۇسقاۋشىسى، جاستاردىڭ الەۋمەتتىك-ەكونوميكالىق پروبلەمالارى ءبولىمىنىڭ مەڭگەرۋشىسى.
1990-1995 -جىلدارى - جەزقازعان وبلىستىق سىرتقى ەكونوميكالىق بايلانىستار كوميتەتىنىڭ جەتەكشى مامانى، ءبولىم باستىعى، ءتوراعا ورىنباسارى، ءتوراعاسى.
1995-1999 -جىلدارى - قازاقستان رەسپۋبليكاسى پارلامەنتى سەناتىنىڭ دەپۋتاتى. 1999-2001 -جىلدارى - ۇكىمەتتىڭ قازاقستان رەسپۋبليكاسىنىڭ پارلامەنتىندەگى وكىلى.
2001-2003 -جىلدارى - قازاقستان رەسپۋبليكاسى پرەمەر-ءمينيسترى كەڭسەسى باسشىسىنىڭ ورىنباسارى - ۇكىمەتتىڭ قازاقستان رەسپۋبليكاسىنىڭ پارلامەنتىندەگى وكىلى. 2003-2006 -جىلدارى - قازاقستان رەسپۋبليكاسىنىڭ كولىك جانە كوممۋنيكاتسيا ۆيتسە-ءمينيسترى.
2006-2007 -جىلدارى - قازاقستان رەسپۋبليكاسى كولىك جانە كوممۋنيكاتسيا مينيسترلىگى ازاماتتىق اۆياتسيا كوميتەتىنىڭ ءتوراعاسى. 2007-2012 -جىلدارى - قازاقستان رەسپۋبليكاسى پرەمەر- ءمينيسترى كەڭسەسى باسشىسىنىڭ ورىنباسارى - ۇكىمەتتىڭ قازاقستان رەسپۋبليكاسىنىڭ پارلامەنتىندەگى وكىلى. 2012-2017 -جىلدارى - قازاقستان رەسپۋبليكاسى پرەمەر- ءمينيسترى كەڭسەسىنىڭ باسشىسى.
2017-2019 -جىلدارى - قاراعاندى وبلىسىنىڭ اكىمى. 2019-2022 -جىلدارى - قازاقستان رەسپۋبليكاسى پرەزيدەنتى اكىمشىلىگىنىڭ باسشىسى. 2022 -جىلعى 1-اقپاندا قازاقستان رەسپۋبليكاسى پارلامەنتى ءماجىلىسىنىڭ ءتوراعاسى بولىپ سايلاندى. «AMANAT» پارتياسىنىڭ قازاقستان رەسپۋبليكاسى پارلامەنتىنىڭ ماجىلىسىندەگى فراكسيا جەتەكشىسى. 2022 -جىلعى 26-ساۋىردە «AMANAT» پارتياسىنىڭ ءتوراعاسى بولىپ سايلاندى. I دارەجەلى «بارىس» (2021)، «پاراسات» (2013)، «قۇرمەت» (2007) وردەندەرىمەن جانە مەرەكەلىك مەدالدارمەن ماراپاتتالعان. قازاق، ورىس، نەمىس تىلدەرىن مەڭگەرگەن.
