پرەزيدەنت باسپانا ماسەلەسىندە مەملەكەت قانداي ادامدارعا جاردەم بەرەتىنىن ايتتى
«حالىقتىڭ باسىم كوپشىلىگى ءۇشىن تۇرعىن ءۇي - ەڭ وزەكتى ماسەلە. ماعان ازاماتتاردان كۇن سايىن جۇزدەگەن ءوتىنىش كەلەدى. ونىڭ ىشىندە قولجەتىمدى باسپانامەن قامتاماسىز ەتۋدى سۇراعان حات وتە كوپ. بۇل تۇيتكىل مەملەكەت تاراپىنان مۇمكىندىگىنشە شەشىلىپ جاتىر. تاعى دا قايتالاپ ايتامىن، مەملەكەت شىن مۇقتاج ادامدارعا عانا جاردەم بەرەدى»، - دەدى قاسىم-جومارت توقايەۆ.
پرەزيدەنتتىڭ پايىمىنشا، تۇرعىن ءۇي ساياساتى نارىقتاعى احۋالعا تىعىز بايلانىستى.
«سوندىقتان، ءبىز وسى سالاداعى ساياساتىمىزدى قايتا قاراپ، ونىڭ مەيلىنشە ءادىل ءارى يكەمدى بولۋىن قامتاماسىز ەتۋىمىز كەرەك»، - دەدى مەملەكەت باسشىسى.
سونداي-اق «ءزاۋلىم ءۇيىن تومەن تاريفپەن جىلىتاتىندار ءۇشىن گازدىڭ تەكشەمەترى قىمباتىراق بولۋعا ءتيىس»، - دەدى پرەزيدەنت.
ءزاۋلىم ۇيلەرىن كۇندىز-ءتۇنى تومەن تاريفپەن جىلىتاتىندار ءۇشىن جاڭا جۇيە بويىنشا گازدىڭ تەكشەمەترى قىمباتىراق بولۋعا ءتيىس. VIII سايلانعان ق ر پارلامەنتىنىڭ ءبىرىنشى سەسسياسىنىڭ وتىرىسىندا مەملەكەت باسشىسى قاسىم-جومارت توقايەۆ وسىلاي مالىمدەدى، دەپ حابارلايدى قازاقپارات ءتىلشىسى.
«بىلتىر تاۋار گازىنىڭ تاپشىلىعىنا تاپ بولدىق. بۇل جاعداي بۇكىل ەلىمىزدىڭ ەنەرگەتيكالىق قاۋىپسىزدىگىنە قاتەر توندىرە جازدادى. مۇنداي كەلەڭسىزدىككە جول بەرمەۋ ءۇشىن نارىقتى گازبەن قامتاماسىز ەتۋ كەرەك. قازاقستاندا گازدىڭ باعاسى كورشى مەملەكەتتەرگە قاراعاندا الدەقايدا ارزان. شەتەلدەگى سياقتى ءارتۇرلى تاريفتەردى بىزگە دە ەنگىزۋ مۇمكىندىگىن قاراستىرعان ءجون. جالپى، تومەن تاريفتەر مەن تومەن باعالار ەكونوميكامىزعا تەرىس ىقپال ەتەدى. بولىنگەن بارلىق سۋبسيديالار كورشى ەلدەرگە بوسقا كەتەدى. قانشالىقتى قيىن بولسا دا، بۇل ماسەلەنى بىرتىندەپ شەشۋ قاجەت. باسقا جول جوق»، - دەپ ءمالىم ەتتى پرەزيدەنت.
مەملەكەت باسشىسى بۇل باعىتتا الەۋمەتتىك ادىلدىك ورناتۋ قاجەت ەكەنىن باسا ايتتى. قاسىم-جومارت توقايەۆتىڭ سوزىنشە، كۇندىز-ءتۇنى ءزاۋلىم ۇيلەرىن تومەن تاريفپەن جىلىتاتىندار ءۇشىن گاز باعاسى قىمباتىراق بولۋى ءتيىس.
«قازىرگى ۋاقىتتا ءزاۋلىم ۇيلەرىن كۇندىز- ءتۇنى تومەن تاريفپەن جىلىتاتىندار ءۇشىن جاڭا جۇيە بويىنشا گازدىڭ تەكشەمەترى قىمباتىراق بولۋعا ءتيىس. الەۋمەتتىك ادىلدىك دەگەنىمىز - وسى. قولدا بار شيكىزاتتى پايدالانۋ تيىمدىلىگىن ارتتىرۋ ماڭىزدى. كۇندەلىكتى تۇرمىستا دا، مەملەكەت دەڭگەيىندە دە ۇنەمدەپ ۇيرەنۋ كەرەك. بۇل - الەمدىك تاجىريبە. ونىڭ وزەكتىلىگى قازىرگى كۇردەلى گەوساياسي احۋال جاعدايىندا كۇشەيە ءتۇستى. وندىرىستە دە، تۇرمىستا دا گازدى ارزان ەكەن دەپ بەي-بەرەكەت جاعا بەرۋگە بولمايدى. مۇنى دوعارۋ كەرەك. ۇكىمەت تاۋار گازىنىڭ ەنەرگەتيكالىق تيىمدىلىگىن ارتتىرۋ جانە ونى ۇنەمدى پايدالانۋ جوسپارىن ازىرلەۋى قاجەت»، - دەدى مەملەكەت باسشىسى.
