ەكونوميكا ءالى كۇنگە دەيىن پايدالى قازبالارعا تاۋەلدى بولىپ وتىر - پرەزيدەنت
«ەلىمىزدىڭ وندىرىستىك الەۋەتىن بارىنشا ارتتىرۋ ماڭىزدى. قازاقستان ەكونوميكاسى ءالى كۇنگە دەيىن پايدالى قازبالارعا تاۋەلدى بولىپ وتىر، ياعني ەل ەكونوميكاسىنىڭ قۇرىلىمى قاراپايىم. شىن مانىندە، بىزگە قارقىندى دامۋ ءۇشىن كۇردەلى، ءارتاراپتى ەكونوميكالىق قۇرىلىم قاجەت. ارينە، شيكىزات نارىعىنداعى الەمدىك باسەكەدە ءبىزدىڭ ءوز ارتىقشىلىعىمىز بار. قازىرگى جانە ستراتەگيالىق مىندەتتەردى ورىنداۋ ءۇشىن ونى ءتيىمدى پايدالانۋ قاجەت. سوندىقتان، وسى سالانى ودان ءارى دامىتا بەرۋ كەرەك»، - دەدى قاسىم-جومارت توقايەۆ پارلامەنتتىڭ VIII شاقىرىلىمىنىڭ ءبىرىنشى سەسسياسىندا.
«ءبىراق، جەر قويناۋىن پايدالانۋ سالاسىندا ونداعان جىل بويى قوردالانعان پروبلەمالار از ەمەس. گەولوگيالىق بارلاۋ جۇمىستارىنىڭ ويداعىداي جۇرگىزىلمەۋى تاۋ- كەن ونەركاسىبىن وركەندەتۋگە كەدەرگى كەلتىرىپ وتىر. مينەرالدى شيكىزات بازاسىن تولىقتىرۋ قارقىنى باسەڭدەپ بارادى. ونىڭ ۇستىنە، قازىر يگەرىلىپ جاتقان كەن ورىندارىنىڭ قورى سارقىلا باستادى»، - دەيدى پرەزيدەنت.
سونداي-اق، مەملەكەت باسشىسى قازبا بايلىقتى ءتيىمدى جانە ۇنەمدى پايدالانۋ قاجەتتىگىن ايتتى.
«ول ءۇشىن زاڭنامانى جاقسارتىپ، راسىمدەردى جەڭىلدەتۋ كەرەك. گەولوگيالىق بارلاۋ جانە كەنىشتەردى يگەرۋ ىسىنە ينۆەستيتسيا تارتۋ ايرىقشا ماڭىزدى. ۇكىمەت پەن پارلامەنت وسى سالاعا قاتىستى ناقتى شارالار ازىرلەۋگە ءتيىس»، - دەدى قاسىم-جومارت توقايەۆ.
سونىمەن قاتار، «شاعىن جانە ورتا بيزنەستى تولىققاندى قولداۋ ءۇشىن كەشەندى شارالار قابىلداۋ كەرەك»، دەدى پرەزيدەنت.
قازاقستان ەكونوميكاسىن دامىتۋ جولىندا وزىنە جاۋاپكەرشىلىك الا الاتىن كاسىپكەرلەردىڭ «جاڭا تولقىنى» قاجەت.
بۇل تۋرالى VIII سايلانعان ق ر پارلامەنتىنىڭ ءبىرىنشى سەسسياسىنىڭ وتىرىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«شاعىن جانە ورتا كاسىپكەرلىك ەكونوميكا مەن ەڭبەك نارىعىنىڭ قوزعاۋشى كۇشىنە اينالۋعا ءتيىس. بۇل جونىندە كوپ ايتىلدى. ءبىراق اتالعان باعىتتا ايتارلىقتاي ىلگەرىلەۋ بولعان جوق. دەمەك، ەكونوميكالىق ساياساتقا وزگەرىس ەنگىزۋ قاجەت. شاعىن جانە ورتا بيزنەستى تولىققاندى قولداۋ ءۇشىن كەشەندى شارالار قابىلداۋ كەرەك. ولار ەلىمىزدى دامىتۋدا ماڭىزدى ءرول اتقاراتىنىن تولىق سەزىنۋگە ءتيىس. بىزگە قازاقستان ەكونوميكاسىن دامىتۋ جولىندا وزىنە جاۋاپكەرشىلىك الا الاتىن كاسىپكەرلەردىڭ «جاڭا تولقىنى» قاجەت. ونىڭ بەل ورتاسىندا اكىمشىلىك رەسۋرستارعا يەك ارتپاي، كاسىپكەرلىك تالانتى مەن ەڭبەكقورلىعىنىڭ ارقاسىندا كاسىبىن تابىستى جۇرگىزە العان بيزنەسمەندەر بولۋعا ءتيىس»، - دەدى قاسىم-جومارت توقايەۆ.
وسى ورايدا پرەزيدەنت ونداي ادامدار ءار ايماقتا بار ەكەنىن ايتتى.
«ولارعا ەلىمىزدە ءوز بيزنەسىن دامىتۋعا مۇمكىندىك بەرۋ جانە ناقتى كومەك كورسەتۋ ماڭىزدى. قازاقستاننىڭ قازىرگى ەكونوميكالىق مودەلى، ەڭ الدىمەن، شيكىزات سەكتورىنا ينۆەستيتسيا تارتۋعا نەگىزدەلەدى. سوندىقتان ۇلتتىق بۋرجۋازيانىڭ نەگىزىن قۇرايتىن ورتا بيزنەس جۇيەسىز دامىپ جاتىر. تەك جەكەلەگەن ايماقتاردا عانا وڭ قارقىن بايقالادى. جالپى، ۇكىمەتكە ەكونوميكانىڭ نەگىزگى سالالارىنا قوماقتى ينۆەستيتسيا، سونىڭ ىشىندە شەتەلدىك ينۆەستورلاردى تارتۋ مىندەتى جۇكتەلەدى. ولار ورتا بيزنەستىڭ دامۋىنا تىڭ سەرپىن بەرۋگە ءتيىس. بۇل ماسەلەنى سوزبالاڭعا سالۋعا بولمايدى»، - دەدى مەملەكەت باسشىسى.
