بريتان پوليتسياسى ءتىنتۋ كەزىندە بالالاردى شەشىنۋگە ماجبۇرلەيدى
بۇل تۋرالى ۇلى بريتانيانىڭ بالالار ومبۋدسمەنى رەيچەل دە سوۋزانىڭ بايانداماسىندا جازىلعان، دەپ حابارلايدى قازاقپاراتتىڭ مەنشىكتى ءتىلشىسى.
بالالار قۇقىعى بويىنشا وكىلەتتى كەڭسە 2018-2022 -جىلدارى انگليا مەن ۋەلستە 8-17 جاس ارالىعىنداعى 2847 بالانى تولىق شەشىندىرىپ ءتىنتۋ جۇرگىزىلگەنىن انىقتادى.
ولاردىڭ كەيبىرىن پوليتسەيلەر پوليتسيا فۋرگونى، مەكتەپ پەن قوعامدىق ورىنداردا شەشىنۋگە ماجبۇرلەگەن.
«مەن انگليا مەن ۋەلستە پوليتسيا ءوزىنىڭ ۇستاۋ جانە ءتىنتۋ وكىلەتتىگىن پايدالانىپ، بالالاردى شەشىندىرىپ تىنتۋىنە قاتىستى بۇرىن-سوڭدى جاريالانباعان تالداۋدى جاريالايمىن. تالداۋ بۇل لوندونعا عانا قاتىستى شەكتەلگەن ماسەلە ەمەس ەكەنىن كورسەتتى. جالپى انگليا مەن ۋەلس بويىنشا پوليتسيا ۇستاۋ جانە ءتىنتۋ اياسىندا بالالاردى شەشىندىرىپ ءتىنتۋ جاسايدى، مۇنداي تاجىريبە قاتتى الاڭداتاتىنىنا دالەلدەر دە بار»، - دەدى رەيچەل دە سوۋزا.
تولىق شەشىندىرىپ جۇرگىزىلگەن ءتىنتۋدىڭ %52 ى ەرەسەكتەردىڭ قاتىسۋىنسىز جۇرگىزىلگەنى انىقتالدى.
«مەنىڭ قورىتىندىمدا زاڭمەن بەكىتىلگەن بالالاردى قورعاۋ كەپىلى ساقتالمايتىنىنا، ونىڭ ىشىندە مەكتەپ، پوليتسيا كولىگى مەن جۇرتتىڭ كوزىنشە ءتىنتۋ مەن شەشىندىرىپ ءتىنتۋدىڭ جارتىسىنان كوبى ەرەسەكتەردىڭ قاتىسۋىنسىز وتەتىنىنە دالەلدەر بار»، - دەپ تولىقتىردى بريتاندىق بالالار ومبۋدسمەنى.
قارا ءناسىلدى بالالارعا قاتارلاستارىنا قاراعاندا التى ەسە كوپ ءتىنتۋ جۇرگىزىلەتىنى دە الاڭدارلىق جاعداي. تولىق شەشىندىرىپ، ءتىنتۋ جاسالعان ەڭ كىشكەنتاي بالا سەگىز جاستا بولعان.
كەيىنگى كەزدەرى بريتاندىق قۇقىق قورعاۋشىلارعا قاتىستى ايىپتاۋلار جيىلەپ كەتتى.
وتكەن اپتادا لوردتار پالاتاسىنىڭ مۇشەسى لۋيزا كەيسي استانالىق پوليتسيا قىزمەتىنىڭ ارەكەت ستاندارتتارى مەن ىشكى مادەنيەتىنە قاتىستى شولۋ جاسادى.
ول لوندون ءتارتىپ ساقشىلارى اراسىندا ناسىلشىلدىك، سەكسيزم مەن ايەلدى جەك كورۋ كەڭ تاراعانىن كورسەتتى.
بۇعان دەيىن انگليا مەن ۋەلستە 1,3 مىڭنان اسا پوليتسەي كۇدىكتى ەكەنى بەلگىلى بولدى.
اۆتور
بالنۇر قوجاگەلدى
