قازاقستان قۇراماسى ەۋروپا چەمپيونى اتانعان دانيانى جەڭدى
ەل قۇراماسى قۇرلىقتىق دودادا H توبىندا سىنعا تۇسەدى. قارسىلاستارى - دانيا، سلوۆەنيا، فينليانديا، سولتۇستىك يرلانديا جانە سان- مارينو.
بۇگىنگى كەزدەسۋدە دانيالىق فۋتبولشىلاردىڭ باسىمدىعى بايقالىپ تۇردى. ناتيجەسىندە ولاردىڭ قاتارىنان راسمۋس حيەلۋنن 21,36-مينۋتتا قوس گول سوعىپ، باسىمدىقتى ارتتىردى.
ەكىنشى كەزەڭدە قازاقستاندىق قۇرامانىڭ دا بەلسەندىلىگى بايقالىپ تۇردى. قارسىلاستار قاقپاسى ماڭىندا ءجيى بوي كورسەتتى. ويىننىڭ 73-مينۋتىندا دانيالىق فۋتبولشىلار ءوزىنىڭ ايىپ الاڭىندا ەرەجە بۇزدى. قاقپاعا بەلگىلەنگەن پەنالتيدەن باقتيار زاينۋتدينوۆ ءمۇلت كەتكەن جوق.
ال 86-مينۋتتا اسحات تاعىبەرگەننىڭ الىستان شىرەنە تەپكەن دوبى قاقپا تورىندا تۋلاپ جاتتى. قازىرگە دەيىن 43 ويىن وتكىزگەن ول العاشقى گولىن سوقتى. سونداي- اق، 89-مينۋتتا اۋەلەپ كەلگەن دوپتى ابات ايىمبەتوۆ باسپەن قاقپاعا ەنگىزدى.
وسىلايشا قازاقستان قارسىلاسىنان 3:2 ەسەبىمەن باسىم ءتۇستى. ەكى كوماندا بۇعان دەيىن ءتورت مارتە كەزدەسكەن- ءدى.
ماماندار تاراپىنان «ن» توبىنىڭ كوشباسشىسى دەپ باعالانىپ جاتقان دانيامەن قازاقستان قۇراماسى العاش رەت 2006 -جىلعى الەم چەمپيوناتىنىڭ ىرىكتەۋىندە ەكى قۇرامانىڭ جولدارى ءتۇيىسىپ، ەكى ماتچتا دا دانيا فۋتبولشىلارى جەڭىسكە جەتكەن بولاتىن. كوپەنگاگەندە الاڭ يەلەرى 3:0 ەسەبىمەن باسىم تۇسسە، الماتىداعى ماتچتا جەرلەستەرىمىز 1:2 ەسەبىمەن جول بەردى. اراعا 11 جىل سالىپ ەكى قۇراما 2018-جىلى رەسەيدە وتكەن الەم چەمپيوناتىنىڭ ىرىكتەۋىندە تاعى كەزدەستى. بۇل جولعى ويىنداردا دا دانيا قۇراماسىنىڭ مەرەيى ۇستەم بولدى - 4:1,3:1.
1992-جىلى ەۋروپا چەمپيونى اتانعان دانيا قازىرگى تاڭدا ف ي ف ا رەيتينگىندە 10-ورىندا تۇر. قۇرامانى جەرگىلىكتى مامان كاسپەر يۋلمانن 2020 -جىلدان بەرى جاتتىقتىرىپ كەلەدى.
ەندى قازاقستان الداعى ويىنىن 16- ماۋسىمدا سىرت الاڭدا سان- مارينوعا قارسى وتكىزەدى.
بۇگىن ن توبىندا، سونداي- اق سلوۆەنيا - سان- مارينو، سولتۇستىك يرلانديا - فينليانديا قۇرامالارى كەزدەسەدى.
