08:34, 20 - ناۋرىز 2023 | GMT +5
بايتاق پارتياسى پارلامەنتكە وتە المادى، ءبىراق جۇمىستى جالعاستىرا بەرەمىز - ازاماتحان امىرتايەۆ
استانا. قازاقپارات - «بايتاق» جاسىلدار پارتياسىنىڭ ءتوراعاسى ازاماتحان امىرتايەۆ پارتيانىڭ ەكزيت-پولل قورىتىندىسى بويىنشا پارلامەنتكە وتپەگەنىنە قاراماستان، ۇسىنعان باعدارلاما بويىنشا ءوز بەتىنشە جۇمىس ىستەي بەرەتىنىن ايتتى، دەپ حابارلايدى قازاقپارات.
«قازاقستان رەسپۋبليكاسى پرەزيدەنتىنىڭ ساياسي رەفورمالارىنىڭ ارقاسىندا جەتى جىل بويعى ساتسىزدىكتەردەن كەيىن «بايتاق» پارتياسىن تىركەۋگە قول جەتكىزدىك. سايلاۋ الدىنداعى وتكەن ايدا ءبىزدىڭ ۇجىم قازاقستاننىڭ بارلىق ايماقتارىن ارالاپ شىقتى. حالىق تاراپىنان كوتەرىلگەن 500 گە جۋىق وتكىر دە ءتۇيىندى ساۋالداردى جيناپ، پارتيا باعدارلاماسىنا ەنگىزدىك. ەكزيت-پولل ناتيجەسى بويىنشا ءبىزدىڭ پارتيا پارلامەنتكە وتكەن جوق. ءبىراق «بايتاق» پارتياسى ءوز كۇشىمەن ۇسىنعان باعدارلاماسى بويىنشا جۇمىستى جالعاستىرادى. پارلامەنتتىڭ جاڭا قۇرامىنا ەل يگىلىگى ءۇشىن جۇمىس ىستەۋگە تىلەكتەسپىن»، - دەپ جازدى «بايتاق» پارتياسىنىڭ ءتوراعاسى ازاماتحان امىرتايەۆ Facebook-تە.
