حالىق شاعىمىنان سوڭ «قوي كوتەرۋ» سايىسىندا ءتىرى مال پايدالانىلمايتىن بولدى

قوستاناي. قازاقپارات - سپورت جارىستارىندا جانۋاردى پايدالانۋعا قاتىستى قوستانايلىقتار بىلدىرگەن نارازىلىقتان كەيىن بيىل ناۋرىز مەرەكەسىندە وتەتىن «قوي كوتەرۋ» سايىسىندا ءتىرى قوي پايدالانىلمايتىن بولدى.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگىدە قوستاناي قالالىق ىشكى ساياسات ءبولىمىنىڭ باسشىسى قايرات قازەز ايتتى، دەپ حابارلايدى قازاقپارات ءتىلشىسى.

«بۇل جارىس ءتۇرى بويىنشا سپورت ءبولىمى ءتىرى قويدىڭ ورنىنا سالماعى اتالعان جانۋارمەن شامالاس قۇم سالىنعان قاپتى پايدالانۋ تۋرالى شەشىم قابىلدادى. ءبىراق جۇلدە ءداستۇرلى فورماتتا قالادى. جەڭىمپازعا قوي بەرەمىز»، - دەپ ءمالىم ەتتى قايرات قازەز.

سونىمەن قاتار ول سايىستاردىڭ وتەتىن ورنى وزگەرگەنىن ايتتى.

«ءبىز بۇعان دەيىن ۇلتتىق سپورت تۇرلەرىنەن جارىستاردى قالا ورتالىعىندا وتكىزەتىنبىز. شاھار ورتالىعىندا ورنالاسقان ساۋدا نىساندارى كوپ بولعاندىقتان، تيىسىنشە مۇندا ادامدار اعىنى كوبەيەدى. سوندىقتان سپورتتىق سايىستار وتەتىن ورىن رەتىندە بايتۇرسىنوۆ كوشەسى تاڭدالدى. قاتىسۋشىلار سپورتتىڭ 9 تۇرىنەن باق سىنايدى»، - دەدى قايرات قازەز.