الەمدەگى ەڭ قىزىقتى سالەمدەسۋ راسىمدەرى

استانا. قازاقپارات - «ءار ەلدىڭ سالتى باسقا، يتتەرى قارا قاسقا» دەگەندەي، الەم ەلدەرىندە سالەمدەسۋ راسىمدەرى ءارتۇرلى.

كەيبىر ەلدەر ادەتتەگى قول الىسۋمەن قاتار، ۇلكەن سالەمدەسۋ سالتاناتىن وتكىزەدى. نازارلارىڭىزعا الەمدەگى ەڭ قىزىقتى سالەمدەسۋ راسىمدەرىن ۇسىنامىز.

تيبەت

كوپتەگەن ەلدەردە ءتىل شىعارۋ ادەپسىزدىك بولىپ تانىلسا، كەيبىر جەردە ءتىلىن شىعارعان جان جازاعا تارتىلادى. ءتىل شىعارۋ تيبەت حالقىنا جات ەمەس، سەبەبى ولار ءبىر-ءبىرىن كورگەندە، تىلدەرىن شىعارادى. بۇل ءراسىم 9-عاسىردا باستاۋ العان. سول زامانداعى تيبەت ەلىنىڭ كوسەمى لاندارمانىڭ ءتىلى قارا بولعان دەسەدى. تيبەت حالقى وزگەلەرگە وزدەرىنىڭ جاۋىز ەمەس ەكەندەرىن كورسەتۋ ماقساتىندا ءبىر-ءبىرىن كورگەن كەزدە تىلدەرىن شىعارا باستايدى. بۇل ءداستۇر ءوز جالعاسىن ءالى كۇنگە دەيىن تابۋدا.

جاڭا زەلانديا

جاڭا زەلاندياعا ساپار شەككەن جاندار ماوري حالقىنىڭ «حونگي» سالەمدەسۋ راسىمىنە كۋا بولادى. بۇل سالەمدەسۋدىڭ سان عاسىرلىق تاريحى بار. ءبىر-ءبىرىن كورگەن جاندار سالەمدەسكەن كەزدە مۇرىندارىن تيگىزىپ امانداسادى. مۇرىنمەن ۇيكەلەسۋ ارقىلى ولار «حا» ءراسىمىن جۇرگىزەدى. «حا» ءراسىمى - تاڭىرگە قۇلشىلىق ەتۋ.

جاڭا زەلاندياعا كەلگەن كەز كەلگەن جان ۇلىسىنا جانە جىنىسىنا قاراماستان، سالەمدەسكەن كەزدە مۇرنىمەن ۇيكەلەسۋ كەرەك. بۇل زاڭعا ءتىپتى ۋيليام حانزادانىڭ ءوزى باعىنعان.

موڭعوليا

بەيتانىس جاندى ۇيىنە قوناققا شاقىرعان كەزدە موڭعولدار وعان «حادا» دەپ اتالاتىن جىبەك نە ماقتا-ماتالى جولاق بەرەدى. ادەتتە ونىڭ ءتۇسى اق. كەيدە كوك ءيا جاسىل ءتۇستى بولادى. حادا ۇسىنىلعان كەزدە كەلگەن قوناق ونى ەكى قولمەن الىپ، باستى يزەۋى ءتيىس. حادا ۇسىنۋ مەن الۋ ءراسىمى - ۇلكەن قۇرمەتتىڭ بەلگىسى.

جاپونيا

جاپون حالقى سالەمدەسۋ راسىمىنە اسا ءمان بەرەدى. ءبىر-ءبىرىن كورگەن كەزدە ولار يىلەدى. جاستار ءوزارا باستارىن يزەپ امانداسادى. ال تاتاميدە تىزەرلەپ وتىرىپ، جەرگە قاراي ءيىلۋ كەرەك.

كەنيا

كەنياعا ساپار شەككەن جاندار ماساي تايپاسىن كەزدەستىرەدى. ماساي تايپاسىنىڭ حالقى ءبىر-ءبىرىن كورگەندە، بيلەي باستايدى. بي ارقىلى ولار ءبىر-بىرىمەن امانداسادى. سالەمدەسۋ ءبيى «ادامۋ» دەپ اتالادى، ياعني «سەكىرۋ ءبيى». بيلەگەن كەزدە شەڭبەر جاساپ، ىرعالىپ، سەكىرە باستايدى.

گرەنلانديا

گرەنلانديا سياقتى اركتيكالىق ايماقتارداعى ەسكيموستار نە ينۋيتتەردىڭ «كۋنيك» دەپ اتالاتىن سالەمدەسۋ راسىمدەرى بار. بۇل ءداستۇر وتباسى مۇشەلەرى مەن عاشىق جاندار اراسىندا كەڭىنەن تارالعان. جۇزدەسكەن جانداردىڭ ءبىرى مۇرنىنىڭ ۇشى مەن جوعارعى ەرنىن ەكىنشى جاننىڭ قولىنا ءيا بەتىنە تيگىزىپ، تەرەڭ دەم الادى.

قىتاي

قىتاي حالقىنىڭ ءداستۇرلى سالەمدەسۋى «كوۋتوۋ» دەپ اتالادى. سالەمدەسكەن كەزدە قولداردى بۇگىپ، ءيىلۋ قاجەت. ايەل ازاماتتاردىڭ سالەمدەسۋ ءراسىمى «ۆانفۋ» دەپ اتالادى. ولار قولدارىن بىرىكتىرىپ، ونى دەنەسىنىڭ بويىمەن تومەن قاراي سىرعىتادى.

«كوۋتوۋ» ءداستۇرى اڭىزعا اينالعان حۋان-دي پاتشانىڭ بيلىك ەتكەن تۇسىندا باستاۋ العان ەدى. سول زاماندا بۇل ءداستۇر پاتشالارمەن امانداسقان كەزدە جانە نەكە قيۋ، ۇيلەنۋ سياقتى سالتتاردا قولدانىلعان.

تايلاند

تاي ەلىنىڭ امانداسۋ ءراسىمى «ۆاي» دەپ اتالادى. ءبىر-بىرلەرىن كورگەن جاندار الاقاندارىن بىرىكتىرىپ، باستارىنا قويادى. سودان كەيىن ءيىلىپ، «ساۆاددي» دەپ ايتادى. ەجەلدەن كەلە جاتقان «ۆاي» سالەمدەسۋ ءداستۇرى ءالى كۇنگە دەيىن كۇللى تايلاند ەلى بويىنشا ءوز مارتەبەسىن جوعالتپاعان.

فيليپپين

فيليپپين ەلىندە سالەمدەسۋ ءراسىمى جاس ەرەكشەلىكتەرىنە بايلانىستى ءار قيلى. مىسالى، جاس جىگىت ۇلكەن كىسىنى كورگەن كەزدە ول باسىن يزەپ، وڭ قولىمەن ۇلكەن كىسىنىڭ وڭ قولىن ۇستايدى. كەيىن ساۋساعىنىڭ ۇشىن ونىڭ ماڭدايىنا تيگىزەدى دە، «مانو پو» دەپ ايتادى. «مانو» - قول، «پو» - قۇرمەت دەگەن ماعىنا بەرەدى.