قازاقستان قۇتقارۋشىلارى تۇركياداعى ىزدەستىرۋ- قۇتقارۋ جۇمىستارىن اياقتادى
19-اقپاندا جەكە قۇرامنىڭ ەكىنشى توبى ەلگە ورالدى، دەپ حابارلايدى قازاقپارات ءتىلشىسى.
قازاقستان قۇتقارۋشىلارى 7-19-اقپان ارالىعىندا تۇركيانىڭ ءۇش پروۆينتسياسىنىڭ اۋماعىندا ىزدەستىرۋ- قۇتقارۋ جۇمىستارىن جۇرگىزدى. اتاپ ايتساق، نۋرداگى اۋدانىندا، گازيانتەپ جانە حاتاي قالالارىندا ازاماتتاردى ۇيىندىلەردەن شىعارۋعا اتسالىستى. سونىمەن بىرگە قاحرامانماراش پروۆينتسياسىنا ۇزدىكسىز گۋمانيتارلىق كومەك جەتكىزىپ وتىردى.
اپات ايماقتارىندا جۇمىس ىستەگەن قازاقستاندىق مامانداردىڭ سانى جۇزدەن استى. جەدەل توپتىڭ قۇرامىنا استانا، الماتى قالالارىنىڭ، قاراعاندى جانە اقمولا وبلىستارىنىڭ ماماندارى، سونداي-اق اپاتتار مەديتسيناسى ورتالىعىنىڭ مەديتسينا قىزمەتكەرلەرى كىردى. ىزدەستىرۋ- قۇتقارۋ جۇمىستارى ق ر توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمبايەۆتىڭ باسشىلىعىمەن جۇرگىزىلدى.
ۆيتسە-ءمينيستردىڭ ايتۋىنشا، اپات ايماعىنداعى جاعدايدىڭ قيىندىعىنا قاراماستان، جۇمىس تاۋلىك بويى ءجۇرىپ جاتتى. جۇكتەلگەن مىندەتتەر قاۋىپسىزدىك تەحنيكاسىن ساقتاي وتىرىپ، تولىق كولەمدە ورىندالعان.
«توتەنشە جاعدايلار ايماعىنداعى ۇيىندىلەردە قازا تاپقانداردىڭ كوپ بولۋى، سونداي-اق قۇتقارۋ- ىزدەستىرۋ جۇمىستارى قازا بولعانداردىڭ تۋىستارى مەن جاقىندارىنىڭ كوز الدىندا جۇرگەندىكتەن پسيحيكالىق- ەموتسيونالدىق جۇگى اۋىر بولدى. ىزدەستىرۋ- قۇتقارۋ جۇمىستارى ۇزدىكسىز، تۇراقتى جۇرگىزىلدى. ونىڭ ۇستىنە جەر سىلكىنىسى قايتالانسا، قۇتقارۋ جۇمىستارىن جۇرگىزىپ جاتقانداردىڭ وزىنە قاۋىپ ءتونۋى مۇمكىن ەدى. الايدا ءبىزدىڭ ماماندار جەكە قۇرامنىڭ قاۋىپسىزدىگىنە قاتەر توندىرەتىن ىقتيمال جاعىمسىز سالداردىڭ ءبارىن ەسكەردى»، - دەدى ي. كۇلشىمبايەۆ.
ىزدەستىرۋ- قۇتقارۋ جۇمىستارى كەزىندە 15-18 ادامنان تۇراتىن ارنايى توپتاردىڭ ۇيىمشىلدىعى ناتيجەسىندە ۇيىندىلەردەن تۇركيانىڭ 7 ازاماتى قۇتقارىلىپ، قازا تاپقانداردىڭ 88 ءمايىتى الىندى. سونىمەن قاتار، 200 گە جۋىق تۇرعىنعا مەديتسينالىق جانە پسيحولوگيالىق كومەك كورسەتىلدى. ونىڭ ىشىندە 30 ى ءارتۇرلى جاستاعى بالالار. مۇندايدا ءار مينۋتتىڭ ماڭىزى زور بولعاندىقتان قۇتقارۋشىلار تاۋلىك بويى ءۇش اۋىسىممەن جۇمىس ىستەدى.
قازاقستاندىق قۇتقارۋشىلار زارداپ شەككەندەردى ىزدەۋ جانە ءۇيىندى استىنان ارشۋ جۇمىسىنا پليتا كەسەكتەرىن كوتەرىپ، ارماتۋرا كەسۋگە، قۇرىلىس سىنىقتارىن تيەپ، ارشۋعا ارنالعان تەحنيكا مەن قۇرالدار پايدالاندى. سونداي- اق، قيراندىلاردان ارشىلعان قۋىستارعا ەلەكتر قۋاتى تارتىلىپ، اۋىزسۋ بەرىلدى. ىزدەستىرۋ- قۇتقارۋ جۇمىستارىن دىبىستىق ىزدەۋ قۇرالدارى مەن كينولوگيالىق توپتار ايتارلىقتاي جەڭىلدەتتى. سونداي- اق، ۇيىندىلەردەن ارشىلعان اۋماقتاردا دالا گوسپيتالى جاساقتالدى.
قازاقستاندىق قۇتقارۋشىلار تۇركيا مەن ساۋد ارابياسىنىڭ قۇتقارۋشىلارىمەن بىرلەسىپ ارەكەت ەتتى. اسىرەسە زارداپ شەككەندەردى ەسەپتەپ، ىزدەۋ جۇمىستارى ۇيىمشىلدىقپەن ورىندالدى. جەرگىلىكتى اتقارۋشى ورگاندارمەن ءوزارا ۇيلەسىمدى ءىس-قيمىل ماسەلەلەرى قازاقستاننىڭ تۇركياداعى ەلشىلىگى قىزمەتكەرلەرىنىڭ قاتىسۋىمەن ۇيىمداستىرىلدى.
بۇل رەتتە ءار ەلدىڭ قۇتقارۋ بولىمشەلەرى اراسىنداعى ءتۇسىنىسۋ ماسەلەسى تۇركيادا وقىپ جۇرگەن قازاقستاندىق ستۋدەنتتەردىڭ كومەگىمەن جەڭىلدەدى.
قۇتقارۋ وپەراتسيالارىنىڭ قورىتىندىسى بويىنشا تۇركيا ازاماتتارى، تابيعي اپاتتار مەن توتەنشە جاعدايلار باسقارماسىنىڭ (AFAD) قۇتقارۋشىلارى، جەرگىلىكتى اتقارۋشى ورگاندار قازاقستاندىق مامانداردىڭ كاسىبيلىگى مەن جەدەلدىگىنە، ادال ءارى جانقيارلىقپەن كومەك كورسەتكەنى ءۇشىن العىس ءبىلدىردى. ق ر توتەنشە جاعدايلار مينيسترلىگى قۇتقارۋشىلارىنىڭ دايىندىعى، ۇجىمداعى ءتارتىبى مەن مامانداردىڭ باتىلدىعى جوعارى باعالاندى.
ق ر پرەزيدەنتى قاسىم-جومارت توقايەۆ تۇركياداعى جەر سىلكىنىسىنىڭ سالدارىن جويۋعا قاتىسقان قازاقستاندىق قۇتقارۋشىلار ەلگە ورالعاننان كەيىن ماراپاتتالاتىنىن ايتتى.
بۇعان دەيىن مەملەكەت باسشىسى تۇركياعا شۇعىل كومەك كورسەتۋگە 1 ميلليون دوللار ءبولۋدى تاپسىرعان بولاتىن. جاقىندا ق ر پرەزيدەنتى ۇكىمەتكە تۇركياعا 55 توننا كولەمىندە قوسىمشا گۋمانيتارلىق كومەك جىبەرۋدى تاپسىردى. قازىرگى تاڭدا قازاقستاننان شىققان اقىرعى ارنايى بورت گازيانتەپ اۋەجايىندا قاجەتتى قۇرالداردى ءتۇسىردى.
ەسكە سالساق، 6-اقپاندا قاحرامانماراش پروۆينتسياسىنىڭ پازاردجيك اۋدانىندا جەتى بالدان اساتىن ەكى جەر سىلكىنىسى بولدى. جەراستى دۇمپۋلەرى كەيىن جۇزدەگەن تەربەلىسكە ۇلاسىپ، 11 پروۆينسيادا، سونداي-اق كورشى مەملەكەتتەردە، سونىڭ ىشىندە سيريادا اپاتتار تىركەلدى. ساراپشىلاردىڭ پىكىرىنشە، ايماقتاعى جەر سىلكىنىستەرى تاعى التى اي بويى جالعاسۋى مۇمكىن.
19-اقپانداعى جاعداي بويىنشا 11 پروۆينسياداعى قۇربانداردىڭ سانى 40689 عا جەتتى. ال زارداپ شەككەندەردىڭ سانى 108068 دەن اسادى. 12141 عيمارات پەن قۇرىلىس قيرادى.
اقجىگىت شۇكىبايەۆ
