ارنايى كۇزەت، دابىل تۇيمەلەرى، تۋرنيكەتتەر: ەل مەكتەپتەرىندە قاۋىپسىزدىك قالاي كۇشەيتىلەدى

استانا. قازاقپارات - پرەمەر-ءمينيستردىڭ ورىنباسارى التاي كولگىنوۆ ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ ماسەلەسى بويىنشا كەڭەس وتكىزدى. وعان مينيسترلەردىڭ جانە بارلىق ءوڭىر اكىمدەرىنىڭ ورىنباسارلارى قاتىستى.

قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.

وقۋ- اعارتۋ ءبىرىنشى ۆيتسە- ءمينيسترى شولپان كارينوۆا ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ جونىندەگى جاعداي تۋرالى، 2022 -جىلى ءبىلىم بەرۋ نىساندارىن تەرروريزمگە قارسى قورعاۋ نۇسقاۋلىعى تۋرالى، ءبىلىم بەرۋ ۇيىمدارىندا پايدالانۋ ءۇشىن شەكتەلگەن تىيىم سالىنعان زاتتاردىڭ ءتىزىمىن بەكىتۋ جونىندە باياندادى. مىسالى، الماتى، قوستاناي، تۇركىستان، ۇلىتاۋ، جەتىسۋ، اباي وبلىستارىندا بەينەباقىلاۋ جۇيەسىنىڭ تالاپقا ساي كەلمەۋى انىقتالدى.

سولتۇستىك قازاقستان، قوستاناي، تۇركىستان وبلىستارىنىڭ ءىرى قالالارىندا مامانداندىرىلعان كۇزەت قىزمەتىمەن كەلىسىمشارت جاسالماعان. بارلىق وقۋ ورىندارى قاۋىپسىزدىكتىڭ كەشەندى جۇيەسىمەن قامتاماسىز ەتىلۋى تەكسەرىلەدى.

سونداي-اق وقۋ-اعارتۋ مينيسترلىگى بالالاردى زورلىق-زومبىلىقتان قورعاۋ، ءسۋيتسيدتىڭ الدىن الۋ جانە بالالار قۇقىعىن قامتاماسىز ەتۋ، ونىڭ ىشىندە قاۋىپسىزدىك جۇيەسىن ۇيىمداستىرۋ جونىندەگى كەشەندى جوسپاردىڭ جوباسىن ازىرلەۋدە. وعان 20 عا جۋىق مەملەكەتتىك ورگان مەن وڭىرلەر جۇمىلدىرىلعان. نەگىزگى ماسەلە قاۋىپسىزدىك سالاسىنداعى قىزمەتتەردى ساتىپ الۋ ءۇشىن جەرگىلىكتى اكىمدىكتەردەن قارجىلاندىرۋدىڭ ازدىعى.

ىشكى ىستەر ءمينيسترىنىڭ ورىنباسارى يگور لەپەحا ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ جونىندەگى ىشكى ىستەر ورگاندارىنىڭ جۇمىسى جانە لاۋازىمدى تۇلعالاردىڭ كۇزەت قىزمەتى مەن جاۋاپكەرشىلىگىنە قويىلاتىن تالاپتاردى كۇشەيتۋ جونىندەگى شارالار تۋرالى حابارلادى. پەتروپاۆل قالاسىنداعى №4-ورتا مەكتەپتە بولعان وقيعاعا قاتىستى تەكسەرۋ بارىسىندا نىساندا تۋرنيكەت پەن مامانداندىرىلعان كۇزەتتىڭ جوقتىعى انىقتالعانىن اتاپ ءوتتى. 15 مەكتەپپەن بەينەباقىلاۋ جۇيەلەرىن جەدەل باسقارۋ ورتالىقتارىنا قوسۋ تۋرالى شارتتار جاسالعان. ونىڭ ىشىندە №4-ورتا مەكتەبىنىڭ شارتى 2022 -جىلدىڭ 12-جەلتوقسانىندا اياقتالعانى انىقتالدى. قاراجات بولىنگەنىمەن، مەكتەپتەر كەلىسىمشارتتار جاساماعان. قازىرگى ۋاقىتتا لاۋازىمدى تۇلعالاردىڭ جاۋاپكەرشىلىگى قاراستىرىلۋدا.

ۆيتسە-پرەمەر التاي كولگىنوۆ وقۋشىلاردىڭ قاۋىپسىزدىگىن قامتاماسىز ەتۋ ماسەلەسىنىڭ وزەكتىلىگىن اتاپ ءوتتى.

«ءبىلىم بەرۋ ۇيىمدارىندا تەحنيكالىق جاراقتاندىرۋ جانە ليتسەنزيالانعان كۇزەت ماسەلەلەرى بويىنشا جەرگىلىكتى اتقارۋشى ورگانداردىڭ جۇمىسىندا ايتارلىقتاي كەمشىلىكتەر مەن ولقىلىقتار بار. مۇنىڭ بارلىعىن كەلەسى وقۋ جىلىنىڭ باسىنا دەيىن تۇزەتۋ قاجەت. ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ بويىنشا شارالار قابىلدانباعان جاعدايدا قاتاڭ جاۋاپكەرشىلىككە تارتاتىن بولامىز»، — دەدى التاي كولگىنوۆ.

كەڭەس قورىتىندىسى بويىنشا جاۋاپتى مەملەكەتتىك ورگاندارعا وقۋ جىلى باستالعانعا دەيىن ءبىلىم بەرۋ ۇيىمدارىن دابىل تۇيمەلەرىمەن، تۋرنيكەتتەرمەن، ليتسەنزيالانعان كۇزەتپەن جاراقتاندىرۋ جانە ىشكى ىستەر ورگاندارىنىڭ جەدەل باسقارۋ ورتالىقتارىنا قوسىلعان بەينەباقىلاۋ جۇيەلەرىن ورناتۋ جۇمىستارىن اياقتاۋ تاپسىرىلدى.

ق ر وقۋ-اعارتۋ مينيسترلىگى بالالاردى قورعاۋ جونىندەگى كەشەندى جوسپاردىڭ جوباسىنا پسيحولوگيالىق قىزمەتتەردىڭ، ولاردىڭ كادرلىق قۇرامىنىڭ جانە تاعى باسقاسىنىڭ قىزمەتىن كۇشەيتۋ ماسەلەلەرىن ەنگىزۋى كەرەك. ق ر ءى ءى م ق ر ت ج م- مەن بىرلەسىپ ءبىلىم بەرۋ ۇيىمدارىندا قاۋىپسىزدىك تالاپتارىن ساقتاۋ بويىنشا مونيتورينگ جۇرگىزۋگە ءتيىس.