سىرىمبەك تاۋ ءماجىلىس سايلاۋىنان شەتتەتىلدى
بۇل تۋرالى Respublica پارتياسىنىڭ ليدەرى ايداربەك حوجانازاروۆ Facebook-تاعى پاراقشاسىندا جازدى.
«بۇگىن ورتالىق سايلاۋ كوميسسياسى بيۋروكراتيالىق كىدىرىستەرگە بايلانىستى مەنىڭ دوسىم، ناعىز پاتريوت، Respublica پارتياسىنىڭ تەڭ ءتوراعاسى سىرىمبەك تاۋدى ءماجىلىس سايلاۋىنان رەسمي تۇردە شەتتەتتى. بالكىم، فورمالدىلىق ماڭىزدى شىعار، ءبىراق ول وتە لايىق كانديدات بولدى. سىرىمبەكتىڭ قازاقستان حالقىنا دەگەن شىنايى قۇرمەتىن اركەز بايقايمىز. پاندەميا كەزىندە ونىڭ كومپانياسى الماتىداعى 9800 وتباسىنا ازىق- تۇلىك كومەگىن كورسەتتى. «ءبىز بىرگەمىز» جانە «شۇعىلا» قايىرىمدىلىق قورلارىنا قارجى ءبولدى.
سونداي-اق، «تاۋ شاڭىراق» قايىرىمدىلىق قورىنىڭ قۇرىلتايشىلارىنىڭ ءبىرى، تالعار قالاسىنداعى بالالاردى وڭالتۋ ورتالىعىنىڭ قۇرىلىسىنا قارجى ءبولىپ، ارىس قالاسى مەن ماقتاارال اۋدانىنىڭ سۋ تاسقىنىنان زارداپ شەككەن 100 تۇرعىنىنا كومەك كورسەتتى. سىرىمبەك نولدەن باستاپ جەكە كاسىبىن كوتەرىپ، 600 جۇمىس ورنىن اشتى، مەملەكەت بيۋدجەتىنە 10 ميلليارد تەڭگەدەن استام سالىق تولەدى.
ءبىراق مەن باسا ايتايىن، Respublica پارتياسى ەشبىر جاعدايدا بەرىلمەيدى، ءبىز كۇرەستى ءارى قاراي جالعاستىرامىز. مۇنداي وقيعالار ءبىزدى تەك قانا شىنىقتىرادى، قايرايدى جانە سىرىمبەك سياقتى لايىقتى تۇلعالارعا جول ءارقاشان اشىق بولاتىن ناعىز جاڭا قازاقستاندى قۇرۋعا ىنتالاندىرادى»، - دەپ جازدى ايداربەك حوجانازاروۆ.
ال كاسىپكەر سىرىمبەك تاۋ قولداۋ بىلدىرگەن حالىققا العىس ايتتى.
«اعايىن بارلىق جىلى لەبىزبەن قولداۋعا العىس ايتامىن. ماعان كەزدەسكەن ءاربىر قولايسىزدىق مەنى كەلەسى قادامعا قامشىلايدى! مەن سايلاۋدان شەتتەتىلسەم دە Respublica پارتياسىنان كەتپەيمىن»، - دەپ مالىمدەدى.
aikyn.kz
