استانادا ەكى ءبۇلدىرشىن سۋعا تيسە ىسىنەتىن ويىنشىقتى جۇتىپ قويىپ، ءولىم اۋزىنان قالدى
دارىگەرلەر بۇلدىرشىندەردىڭ ىشىنەن ويىنشىق بولشەگىن الىپ شىقتى. ولاردىڭ ايتۋىنشا، بۇل بولشەك بىرنەشە كۇن بۇرىن جۇتىلعان. بىرەۋى نەبارى 11 اي، ەكىنشىسى 1 جاس 4 ايلىق بالالارعا وتا جاسالدى. ۇل بالانىڭ جاعدايى اۋىر بولعان.
بالالار جۇتقان بۇل ءتۇرلى ءتۇستى گيدروگەلدى شارلار وتە قاۋىپتى ەكەنىن ايتادى ماماندار. جۇتۋعا جەڭىل ءارى سۋدا 100 ەسە ءوسىپ، ىشەككە تۇسكەن شار ءبىر اپتادا اجال قۇشتىرۋى ابدەن مۇمكىن.
«ىشەك ينفەكسياسى بويىنشا تەكسەرىپ، رەنتگەن ارقىلى شارلاردى جۇتىپ قويعانىن انىقتادىق. جىڭىشكە ىشەكتىڭ ىشىندە وسە باستاعاندىقتان، قۇسۋ توقتامادى. وپەراتسيا اجەپتەۋىر قيىندىق تۋعىزدى. 11 ايلىق بالانىڭ 1 جاس 4 ايعا تولعان كورشىسى دە ويناپ ءجۇرىپ، وسى زاتتى جۇتىپ قويعان»، - دەيدى №2 كوپبەيىندى قالالىق اۋرۋحانانىڭ حيرۋرگيا بولىمشەسىنىڭ مەڭگەرۋشىسى سەرىك بايمۋلدين.
بالانىڭ اناسى بەرگەن مالىمەت بويىنشا، بالالار جۇتىلعان زاتتى مارجان دەپ ويناعان.
«ۇيدەگى كىشكەنتاي 9 جاستاعى ءسىڭىلىم ويناعان سونى الىپ. ول شاشىلعاننان كەيىن بالالار مارجان دەپ جۇتىپ قويعان. وسىندا كەلگەننەن كەيىن گيدروگەلەۆىي شار ەكەنىن تۇسىندىك. قازىر بالانىڭ جاعدايى جاقسى، شۇكىر. قازىرگى بالالاردىڭ بارلىعىندا سول ويىنشىق بار. سوندىقتان ساتىلىمنان الىپ تاستاسا دا جاقسى بولاتىن ەدى نەگىزى»، - دەدى داريعا داۋلەتباي.
